ايااام الله لايعوودها

[ملكعه بس غير]

مووولازم مقدمه صح خلينا نخوش بالقصه دووغري :D


يوم الاحد كان يوم عادي حاله حال اي يوم من ايام الاسبوع الى ان جا ذاك اليوم في ذاك الاسبوع في ذاك الشهر في ذيك السنه<< ياشين اللي يبي يتفلسف ولاهوب عارف وشلون
الين جا قبل سنتين وتغير الحال وصار اتعس يوم من ايام الاسبوع
لاجا يوم السبت بالليل يبدى العماس وضيقة الخلق ان بكره الاحد ونحاول نطقها نومه للعصر انا واختي << عاطلات عن العمل بس ماش امي ماتخلينا الله يهديها

عندي اوختين ثانيات بس يتحججن بالدراسه وهن احلف مايفتحن الكتاب << والله ياوحده منهن انها تنام من بدري وامي تغصبني احل واجباتها "" خشه فيها بكوه"
نقوم من النوم مايمدينا ناكل لقمه ولانريح الا ونبدي كرف في هالبيت انا استلم التنظيف واقعد امسح بهالمكتبه وافرك بهالجدار تقول جدار جمعيه مكتوب عليها ذكريات يعني هو مومن حب بزاريننا للعلم ولاهو من قل الاوراق يوم يكتبون عالجدار بس مدري وش علتهم
,, قسم يافيه بلاك كهرب خربان وحاطين عليه علامة x وكاتبين فوقه خطر طيب حنا دارين انه خربان ليه حركات استراحه على طريق بقيق الدمام بقيق << كنها صارت رحله داخليه

اما اختي تستلم المطبخ تسوي حلويات وفطاير وان سألناها وش سويتي قالت سم "ن" هاري عساه زقوم << ماتسوى على اللي بياكله

ولاجا المغرب راحت امي وجدتي لجيراننا
وانا واختي بهالوقت متوهقات وش نلبس الا هالبدله ينقدون علينا العجز وهذي لا ماارتاح فيها وهذي ضيقه وهذي زحمه وعقب ساعه مستحيل تكون اقل يالله نجهز << حاسدينكم يالشباب كشختكم طرق الدشداشه والشماغ وصل الله وبارك


نرجع لجيراننا
وجيراننا تدرون منهم لجنه خيريه مأجرين بيت ومسنترين فيه وكل يوم احد يسوون ندوه دينيه يجيبون فيها شيخ واذا ماحصلو خلو وحده من هاللي تشتغل عندهم تفتح كتاب وتقرى لها كم صفحه وصلى الله وبارك
ودايم رواد هاللجنه عجز الا مره اذكر اني جايه من الجمعيه ولا البراحه صااكه سيارات وعالم وهنووود ودنيا ياربي وش السالفه وكان ودي اعيش دور الشرطيه في حياتي فقلت فرصتي انزل وانظم حركت السير واخلي سيارتنا تعدي للبيت بسلام :D
بس ماش سواقنا جويد دبر عمره ووصلنا للبيت
عقب دريت انه كان فيه سحب على خطوط جوالات ويوزعون طوفريات << صواني برواية اخرى وهدايا فوريه على قولتهم وتشوف كل عجوز قااشه كل اللي بالبيت علشان ياخذون ارقام اكثر واذا ماطلع رقم الام طلع رقم البنت وان ماطلع للبنت يمكن لااختها وهلم جرا
المهم ماني مطوله وانا اتكلم عن هاللجنه لاني لوطولت ادري بتقرشعون هالموضوع :D ولابتاخذون فكره عني مش كويسه وانا والله كويسه فخلوني ساكته ابرك :zip:

الوكاد هم دايم يخلصون الندوه لما يأذن العشا واغلب مافي هالندوه نعرفهم ويعرفوننا ولما يطلعون يتجمعون عند باب اللجنه ويمطقون في بعض وكل وحده تنشد الثانيه الين يصيرن نقطه سودا بالبراحه ويمرن امي وجدتي على هالتجمع ويجرونهم للبيت وعمتي ماننساها ماتقصر تجي للندوه ومعها قصيراتها ولاخلصن تجيبهن لبيتنا
اول مايدخلن ماتسمع الا " لاااله الا الله "" سبحااان الله " استغفر الله"" << للحين بجو الندوه
لما نسمعهم نركض انا واختي ونقعد عند الدلال يابلفيت ان حنا نتحراهم ومن نسمع الصوت كل وحده تقول للثانيه يالله طقيها بسمه صناعيه لان حنا مندبله كبودنا ومغصوبات عليهن
وطبعا بهالوقت يكون البيت ورده يلق وريحة البخور والطيب والقهوه والشاهي والسم الهاري على قولة اختي وانا واختي << تحسون اشكالنا تحف :D
دخلن وسلمنا واصطفن بالصاله وللحين ماخذن عالجو ساكتين ويقلبون عيونهم اما فينا ولافي البيت وحتى في بعض وانا واختي اكثر من يخزنا تدرون من :sad:


امــي وجدتي
يامال العافيه يدورن الاخطاء العشره فينا والله اني اتجنب احط عيني بعين امي كل ماالتفت عليها غمزت لي ولاادري هو شعري معتفس ولابلوزتي ولاماسكه الدله غلط مدررررري ""صورة وحده تمعط شعرها ""

واصب القهوه لهن واوقف فوق كل وحده منهم ومرات اجي فوق ثنتين وتقعد كل وحده تحلف عالثانيه الا انتي اخذي الفنجال لاوالله من عقبش وانا محرقته بالفنجال وانا احولف بقلبي لو يطولن لاتجيهن الدله طايره مليون
وعندي مرت عمي مأذيتني بسالفة القهوه ماتشبع منها ولاتهز الفنجال ولاتقول بس الا عقب ماتقطر المطاره والله لولا الخوف من امي لااحط الدله عندها واقول صبي لنفسش الين تشبعين

وطبعا الطلبات تهل اخذي اغسلي الفناجيل وجيبي تمر وهاتي كلينكس و جيبي وحطي ولاغثني مره الا وحده ياهي تعبتني
قالو جيبي ماي حق ام سلطان واروح واجيب لها يوم اجي قالو ماتشرب الا بطاسه وانا اقول انشاءالله واتبوسم وهي من كبدي وارجع للمطبخ وترى مطبخنا بعيد مفصول عن البيت يعني مشوار يتعب واجيب لها الطاسه واشوف انها ماشربت الا شوي وترجعها لي وتقول بارد جعلني ماابكيش
قالت امي روحي اخلطيه بدافي وجيبيه < لاتسألوني وشلون مسكت نفسي ولاقلت شي لاني مدري وشلون

وماغير رايحه جايه وامي جايزن لها اني مسويه عرض للنساوين
ويابلفيت ان بنتي جيده وراعية بيت وانا من جنبها :D
اما اختي في نص القعده تطق للمطبخ ولاعاد ترجع للصاله << وربي دايم تسويها وتنكبني

وطول هالقعده وهن مستلمين خلق الله حش ولايخلن احد بحاله وعقب ساعتين حش :secret:
وجن بيروحن قالن ""سبحانك اللهم وبحمد واستغفر الله واتوب اليه وكل اجر وحسنه كسبوها في هالندوه اللي كانن فيها وزعوها في هالقعده ويمكن اكثر بعد الله يغفر لنا ولهن ""

ويصرفن اعمارهن ويروحن ويفرج عني واروح القط اول ثوب فضفاض والم شوشتي وامسح هالمكياج << قسم ياهو شعوور اسئلو كل بنت ياهي راحه :D

تقوم امي تاخذ غسول الفناجيل وتبينا نشربه عن العين << تخيلو لونه مصوفر مغسلين فيه فناجيلهم وايدينهم عقب التمر وانواع السعابيل<< الله يلوع كبدهااا
وخناق وطلايب الا تشربون لامانبي نشرب واللي ماتشرب تسوي فيها امي حركه باااااااااايخه تجي على غفله وتكب الماي على العلبا << الرقبه من ورى :D
اقول لامي عادش بتخلعيني بهالحركه ويطير عقلي وبتقولين عين


ملاحظات لها دخل بالموضوع من قريب وبعيد:
_ يااااااااااكرررهي للعزااااااااااايم خصوصا اذا في بيتنا تعب وصك كعب << تحريها قريب
_ ياشين لاجيت تكشخ لعجايز ماتدري وش تلبس وش تحط
_ يازين عزيمة البنات فله ووناسه وضحك بلا عجز ينقدن ولابزارين من فرط السعاده ماغير يطربقون رايحين جايين << يازين قبصتهم
_ طبعا الشطه هذي والسوالف هذي كانت اول مافتحو اللجنه قبل سنتين عقب استحو العالم على وجييههم ولاعاد يجي الا ثمان خمس عجايز ووثلاث حريم لوقتكم هذا وهن مايقطعن في مجلس الاحد غير عمتي ونسوان عماني وتعودنا عليهم صار شي عادي ولانكشخ ولاشي من زود الميانه والله اقوم من النوم مرات واقعد معهن :D


سلاااااااااااااااااااااااام