جفن الصباح ..

[عبدالله ال مجحود]

غفوة الليل وسكونه فارقت جفن الصباح = وقامت الشمس اتغنّج بالجفون الناعسه
وانطلق من رمش شمسي نود ٍ يهيض الجراح = يلعب بقذلة ظلامي لين قفّت بائسه
جرحي اللي صاحبه طولات بالي والسماح = احسب ان صبري يعينه واثر صبري دايسه
جرحي اوطانه منيعه ماهي دوم ٍ تستباح = سورها من دون موج وفوق حد اليابسه
كل ماجيت اتهنّى لحظة ٍ فيها انشراح = عانق اللحظه خفوقي فيه شي ٍ حايسه
اعتصرها بالالم وناسي الفرض ارتياح = وذبلت ما بين كفّين الخفوق اليائسه
لاهي احكاية مصيبة ضحكة افواه السلاح = ولاهي احكاية مفارق ام قد ٍ مايسه
لكن بجوفي خفاها بالمجي وبالمراح = وياعساني لكل شي ٍ في وزونه قايسه
والهدوء اللي اضمه من على صدر الجماح = تنطقه اشفات دمع ٍ بالجفون الحابسه
والطموح اللي تسوقه راية وصيحة نجاح = ماتردى حد سيفه بالحظوظ الناحسه
من فضل ربي ومنّه ذقت لي لذة مباح = نعمة ٍ من فضل ربي للشجون امجانسه
وانتعش جوفي بلذة شهوة ارواح الكفاح = واخمدت لوعة ضميري والرياح الكانسه
عززت جد وصراحه وابتسامات المزاح = وانتهض عزم ٍ وقوة للفوايت طامسه
نورها يقبل على نحر المواضي باجتياح = لين ما راية ظلامي تقفي منّي ناكسه
يالله تسوق البشاير والسعاده والرباح = والخساير جعلها تذرف دموع ٍ خارسه
جعله بفضلك يا ربي ينجلي الهم ويزاح = تبرد النيران وتدفى بي مواسم قارسه

[ليــه يازمـــن]

صح الله لسانك على القصــيده الطيــبه يــاطيب

[ناصر الحطيم]

صــح لسانك ... ولاهنت على القصيدة الجزله

[عبدالله ال مجحود]

المشاركة الأصلية كتبت بواسطة ليــه يازمـــن

صح الله لسانك على القصــيده الطيــبه يــاطيب

صح بدنك ولاهنت على المرور

[عبدالله ال مجحود]

المشاركة الأصلية كتبت بواسطة الحطيم

صــح لسانك ... ولاهنت على القصيدة الجزله

صح بدنك وهذا من ذوقك

[مطنوووخ وكلي شموووخ]

صح الله لسانك قصيده راااااااااااائعه من انسااااااااااااان اروع

[عبدالله ال مجحود]

صح بدنك والاروع تواجدك ومرورك طال عمرك

لاهنت