الحر يبقى فوق ..

[عبدالله ال مجحود]

اهلين حبايبي .. هذه قصيده قلتها قبل امس ..

وماودي اقول وش سالفتها .. تعرفونها انتم من الابيات ,,



ألشعر له ناسه وله من يذوقون
احد ٍ بعيد الحوم وأحد ٍ حمامه

والشاعر الصادق به الناس يحسون
واللي تخفى بينكشف عن لثامه

واللي احاسيسه على الحرف يزفون
يشمخ شموخ طويق ولّا تهامه

واللي تزيّف بالزخارف ورا لون
لا بد له وقت ٍ يعجّل عدامه

الشعر خالد خلّد اللي يعرفون
يرّخ علوم المرجله والشهامه

يستعجلك لاجاك يمشي على الهون
ويستمهلك لا صار فيها ندامه

اللي صدوق ٍ خير من الف مليون
من بين ناسه صار عال ٍ مقامه

واللي يملّح سيرته كيف وشلون
يبقى كديش ٍ ما خطى من لجامه

والحر يبقى فوق قدام العيون
وغيري دفن راسه سوات النعامه