لو تدري العجمان عن بنت من روق ..... إهــــــــداء ...

[بنت الحمايل]

الســــلام عليكم ورحمة الله وبركاته

بعد الغيبه الطويله ودخولي للمنتدى كتبت هالكي بورديه ..

وإهداء مني لكل عجمي على وجه الأرض وللمنتدى والإداره والأعضاء ..
بسيطه ولكن أتت وفاء لكم أتمنى أن تليق بكم ...

وهي في الحقيقه لاتفي أبدا بما أشعر به تجاه هذه القبيله الغاليه ..

وعندما قرأت الكثير عن بطولات قبيلة العجمان , أزداد أعجابي وحبي ..

ملاحظه : كل القبايل ونعم فيها وكل القبايل فيها خيرها , ولكن هذه محبه شخصيه مني وهديه خاصه للعجمان فالعذر مُسبق ..

لو تدري العجمان عن بنت من روق = وحبٍ تشيله وسط الاعماق ألهم
ان كان حطوني على الراس من فوق = بين الغمام وبين ضافي اعممهم
حبي لهم ماهوب ببيتٍ في طاروق = مشاعرٍ في القلب غالي ثمنهم
ماينصفه خطٍ ولازود منطوق = ولا فيه كيلٍ في الوسيعه يزنهم
بنت ٍ من عتيبه لها شأن مرموق= من طيب اهلها شاقها المدح فيهم
يعني تراني اعرف السِلم والذوق = مدحي لهم حق عليّه وصلهم
للي غلاهم غير عن كل مخلوق = الحق مايخفى وعلى من عرفهم
أتوق لمدح أهل الوفا والله اتوق = اذهلني التاريخ و ماقيل عنهم
والله لو أني ماني ببنت من روق = إن كان قلت ياليتني كنت منهم

لكم مني أرق التحايا ..

وسامحوني على القصور ...

[محمد المري]

الله يصح لسانش يابنت روق
والعجمان يستاهلووووووووووووووووووووووووووووووووووووون

[المهدي بن تركي]

بنت الحمايل
والنعم في عتيبه اللي انتي منهم
وماقلتي في قبيلة العجمان يستاهلون اكثر
قبيلة لها من المجد والاصالة ما يغطي الدنيا
شكرلك بحجم الكون

[فلاح بن ملبز]

صح بدنش يا بنت روق

وعتيبه ما عليها زود

[ابومحمد الشامري]

ما عليش زود يا بنت الحمايل والله لا يهينش

صح لسانش يا السنافيه

[الكاسر محامي بن الذيب]

صح لسااانش

ويستاهلون العجمان

لاهنتي

[محمد بن ناصر الغفيلي]

صح الله لسـانك اختي
والله يعز مقدارتس ومقدار من انتي منهم وألف نعم بعتيبه
والعتبان بمثابة خوالي دامهم خوال ابن عمي ومن زود مايحبهم ساكن معهم بديرتهم القراره



والآف الشكر لك اختي ويالله عساها توفي

دمتي بخير

[سعد بن بصيص ال فنيس]

ابهرتني القصيده

صح السانش

الان اقدر اقول ان في بنت شاعره


يستاهلون العجمان


ولاقصور في عتيبه


قبيله يعلم الله ثم ابنائها


ماحمله من حب لهم

[ابونايف الوعيلي]

صـــح لســانش

يعطيش الف عافيــة على الجزالــه

بنتظار جديــد قصايـــدش

لاهنتــي

ونعم يابنت الهيلا يابــنــت روق بنت الحمايــل

تقبلي مروري

ابونايف الوعيلي

[الغروب]

الاخت / بنت حمايل

كل الشكر على هذه الابيات المفعمه بالحب والمرصعة بتوثيق البطولات والفخر ...والاجمل انك اهديتيها

فلك منا كل الشكر والامتنان والجميع ينزلك القلب قبل الدار

وصح لسانك وتقبلي فائق التقديروالاحترام