لجنة العجمان النسائية

[موكب]

يا جماعه اصوات النساء مهمة خاصة من العجمان نبي اهم اعمال ذا اللجنة يعني الصورة ماهيب واضحه؟؟؟؟

[محمد الهتلاني]

انا اقول ان من اهم اعمال اللجنة النسائية :

1- لازم يكون هناك بيت مخصص للجنة النسائية يجتمعون فيه ويشتغلون فيه ويتصلون على الاصوات النسائية ويحددون معهم مواعيد.

2- توزيع المنشورات الخاصة بالمرشحين في زيارتهم للبيوت.

3-توفير سيارات خدمة للجنة النسائية تكون تحت تصرفهم.

4-لازم يكون هناك باصات يوم التصويت خاصة بالنساء ماهوب معقول ان الواحد بياخذ حريمه كلهم معه في التصويت لازم ذا الباصات تشتغل وتفتر على البيوت وتنقل الحريم الى مراكز التصويت وتنسق معهم قبل التصويت بيومين علشان نضمن حضور النساء.

هذي بعض الاقتراحات

[بندر العجمي]

بيض الله وجهك وقد النسوان مساعد للنجاح ولازم نثمن هذي النقطة

[منصور الشامري]

يالــــــــــــــربع نــــــــــبي واحد يوضـــــــــــــــح توضيح كامل بخصوص النسوان مثلا من اللي يحق لها التصويت وشنووووو المطلوب عشان تقدر تصوت ....
ترى في اموووور واجد يالربع تغيب عن بعض الناس لازم التوضيح
اخيرا الله يوفق مرشحينا

[محمد الهتلاني]

التصويت راح يكون على عنوان البطاقة المدنية

[خالد المحفوظي]

لازم يحضرون النسوان ولا راحت علينا الكراسي

[سعود الخويطري]

أؤيد الاخ محمد الهتلاني بما قال



وحسب الوضع الحالي النساء لهم ثقل الاكبر والاهمية القصوى بالتصويت



وتقبلوا سلامي

الخويطري

[فراشة الكويت]

الله يعطيك العافيه جميع

وأخذت أقتراحاتك أخوي الهتلاني وسويت لها كوبي

وتمنى إذا أحد عنده اقتراحات ثانيه يفيدنا

الله لايهينكم جميع

[محمد الناجعي]

عندي اقتراح خاص بلجنة النسائية :

-لازم يخصص لهم تلفونات نقاله على حساب المرشح ماهوب معقول انها بدق على العالم بتلفونها.

-السجلات النسائية تكون مفروزه باسم القبائل علشان يسهل عليهم الفره والاتصال عليهم.

-مفروض اللي يكون في اللجنة النسائية وسيعة صدر لانها يمكن تحصل كلام جارح او شيء يعني الله هالله بالمره اللي تحكي وتفر روس الحريم ولا تكون عصبية:)

- البنات اللي في اللجنة النسائية مو يكشخون ويلطخون انفسهم بالمكياج كانهم رايحين عرس والشيء الثاني اللبس يعكس نظرة الحريم عن المرشح يكون الشيء حلو من ناحية اللبس والمظهر بس لا يكون فري.

- عليكم يا الحريم بالهدايا ترى الحريم يموتون على شيء اسمه هديهhttp://www.alajman.ws/vb/images/smilies/biggrin.gif

وهذي اللي عندي

[*صاحب الفخامة*]

السلام عليكم...
ياجماعة بالنسبة لتصويت الحريم بيكون في مدارس خاصة كلها حريم و ترى حضورهم ضــــــــــــروري..ضـــــــــــــروري..ضــــــــــ ــــــــروري.. ومــــــــــهــــــــــــم
وترى حضورهم لاهو عيب ولاهو حرام وماياخذ منهم خمس دقايق
وأكدوا عليهم يصوتون

[فراشة الكويت]

الله يعطيك العافيه يالناجعي

اقتراحاتك أخذت بالحسبان

وياليت اللي عنده اضافه يفيدنا

[أبو مسعود]

الله يعطيكم العافيه جميع


ولاهنتو

[موكب]

بيض الله وجيهكم على الاقتراحات الرائعة وان شاء الله نفيد ونستفيد من المعلومات واهم شيء توعية النساء في الحضور وعلى فكرة حضور نساء العجمان في انتخابات الجمعية يبشر بخير ويطمن على ان حضورهم في انتخابات مجلس الامة بكون ممتاز.

[محمد الهتلاني]

مشكورين والله يعطيكم العافيه وترى ما سوينا شيء نبي نخدم بني عمنا بالشيء الزين:

وصراحه عندي اقتراح توظيف اللي لهم وظائف تحكمها العلاقات يعني المدرسة العجمية في منطقة الرقة او هدية تقدر اجيب اصوات نسائية لو تشتغل في اللجنة النسائية.

[حيادي]

لا هنتوا يا الربع وحضور النساء مهم جدا جدا جدا

[سمو^المشاعر]

يعطيكم العافية ..

قبل كل هذا الأهم التأكد انها مقيدة !!

شكرا .

[زورو]

السلام عليكم

اتمنى أن تصل هالرساله للجنة النسائيه عن طريق احد اللي يقرون الموضوع وكل الملاحظات لان فيها المصلحه للجميع

من واقع مرير عاشته اللجنه النسائيه لمرشحين القبيله في الأنتخابات التي مضت ولانها اول مره تدخل فيها المرأة وخاصه بنت القبيله هالمعمعه كان لابد الأخذ بعين الاعتبار مايلي :

أول شي وهو مهم ما تتصل اللجنه النسائيه وكأنها ضامنه اللي قدامها وكأنها رفيقتها لان اللي وصلني ان أكثر الناس كانوا مستائين من طريقه الاتصال وماكو اسلوب حتى لطلب الأخوات يعني مثلا لازم اللي تتصل تكون لبقه في الكلام وتعرف شنو تبي ومتى تطلب اللي تبي .

ثانيا وقت الزيارات لازم يكون مسبق بموعد للعوائل اللي ماتعرفونهم وأتمنى ان اللي يروحون متوسطات الأعمار يعني ما يروحون بنات العشرين وأهم شي الكلام الزين مع الناس

أخيرا ... لما اللجنه النسائيه تخلص سواء من المكالمه أو وقت الزياره لا تمشي الا وهي ماخذه رقم أحد من البنات وتتواصل معاها بمسجات على الأقل وياليت من لما يسولفون مع الناس تحاول تعرف مثلا مكان دوامها يمكن تقدر توصل لأحد يعرفها وتتقرب منها , والأهم من ذلك هو تذكير هالناس بأن الصوت أمانه ولاتجيب طاري مرشيحن العجمان الا في لمحات بسيطه يعني باختصار املكو قلوب الناس وانتوا تاخذون اللي تبون


خواتي في اللجنه النسائيه توزيع البروشور والمنشورات وغيرها من الأمور الدعائيه ضروري عن البنات وشي حلو

شي ماذكرته يابنات لاتستهينون في الموضوع وأتمنى تذكرون بنات قبيلتكم ترا بعضهم وده يطنش بس خلو الموضع على طول بينكم وان القبيله واقفه مو بس على رجالها لا اليوم الوضع تغير وكلنا محتاجين وقفتكم وانتوا الحلقه الأقوى

الله يوفقكم ويستر عليكم ويجزاكم خير

تحياتي

[وحووش]

السلام عليكم ورحمة الله وبركاته
اخواني واخواتي الأفاضل لدي اقتراح بسيط لظاهره حصلت يوم الإنتخاب في المجلس السابق
وهي ان الأخوات في اللجان يجتهدون قبل يوم الإنتخاب وعندما يأتي يوم الإنتخاب الذي هو يوم قطف الثمار يتكدسن الأخوات في المدارس .
اخواتي التي حضرت للتصويت لن تثنيها عن ما سوف تنتخبه، لكن هناك الكثير من النساء في بيوتهن يجب ان يكثف الإتصال والتذكير وعرض المساعدة لتوصيلهن في هذا اليوم ومن الصباح الباكرويجب ان تكون المتحدثه لبقه تستطيع ان تستثير الأخوات للتصويت ، بالذات سيدات القبيله فيهن من الحميه ما تفتقر له كثير من النساء يجب التركيز على هذه النقطه وفي اللحظه الأخيره يزيد هذا الشعور ويجب ان تستغله اخواتنا في اللجان .
وفقهن الله لما يحب ويرضى.