السلام عليكم ورحمة الله وبركاتـة
كيف حالكـم عساكم بخيـر .. مانبي نطول عليكــم
طلب من الاخ العزيز / خالد وبس أنزل قصيده في هالقسـم .. وان شاء الله تعجبـة وتعجبكـم
طيري عصافير السحر عن هدبها=عينٍ تخم النور .. من قلة النور
كود الظلام اللي علق في عصبها =وعروقها تبكيه حسرات وغرور
الله .. مااثقل جفنها وإن جذبها =برقٍ لمحت فـ ضيه اكفان وقبور
على الدروب اللي عشقنا تعبها =لين اقفرت من كل حيٍ ومعمور
كنه يلج بوسط سمعي صخبها =أو هو بكا .. ريحٍ على صدر ديجور
طيري عصافير الهوى اللي شربها =غدير .. واسقاها من أوهامه بحور
يكفي عن أحلام الحياة وطربها= لو ساعةٍ ببكي على ساعة قصور
أصيح شمسٍ ما تمن بذهبها =تنثره قلبٍ صادق .. ودافي شعور
والا النهار اللي عيوني حربها =اقبالته لحظه.. وغيباته دهور
أصيح عسبان الحياة ورطبها =أو حبها اللي توَّه اليوم مبذور
والا الضلوع اللي حنيني كتبها =شعرٍ قراه الصبح غامض ومكسور
اصيح من باصيح واغلى عربها=شدوا زمان الشوك باعشاب وزهور
يا حيف وضحى نور عيني جنبها =وخذت غياب الشمس من مرتع الزور
وخذت وعقرت مهرتي في طلبها =وقفت .. ودمعي في محاجره .. مذعور
ما غير أناظرها ويصغر لهبها =لين إنطفت ناديت يا سعود ماجور
خذها الذي من فيض جوده وهبها =يوم لنا رحمة.. وظل .. وذرى سور
ياعلها عنده بعالي رتبها =عند الذي نزه مقامه عن الجور
وطيري عصافير السحر عن هدبها =عينٍ تخم النور .. من قلة النور
الشـاعر الغنـي عن التعريف بدر بن عبدالمحسن [!]