تم نقل الشاعر سالم الشراري من محافظة الجوف الى نجران وهو يعمل بالتدريس وقد كان يعتقد أن نجران فيها كل العذاريب كما روج لها بعض من الناس وعندما جاء الى نجران وتداخل مع أهلها وجد كل أنواع الكرم والشهامة والرجوله بعكس ما كان يعتقد .
وعندما تم نقله من نجران "كما أعتقد" كتب هذة القصيدة الرائعة في نجران وأهلها وأهداها إليهم .
بسم الله الرحمن الرحيم
إلى أهل الجنوب " أهل نجران الكرام " أهدي لهم هذه القصيدة
بسم الله أبدأ فارض خمـس الأركـان=اللي ختـم باليـل ضـوح النهـاري
ذليل من لا كـان عصمتـه الإيمـان=ولا خاب من هو بالأمـور استخـاري
ومن بعد ذكر الله آبـا اقـول بلسـان=وأبـدي بشـيء فبـه واثـق وداري
جابتني القسمـة علـى ديـار نجـران=وكلن عن المقسـوم مـا هـو بـداري
ولجيتـي مـا كـان بالبـال حسبـان=وما كان قبل آجـي عنـدي طـواري
لأني بعيد ديار .. مـا هـو بنقصـان=بأرض الجنوب وأنـا بعيـد مـزاري
نسمع بهم بالطيب وبالوصف شجعـان=وفي مدحهم كلـن قصـر بالمحـاري
من الشمال مـن الهبايـب والأمـزان=ومن وادي السرحـان يبـدا مسـاري
من جوف مارد والصعيدي وسرحـان=ومن زعبل لكاف وسمـر الحـراري
ومـن الحديثـة و القريـات عنـوان=ومن سهلة بسيطا وفيـض الخبـاري
من الميسـري و النبـك دور وقلبـان=ومـن طبرجـل والنبـاج وشغـاري
وحرار ليلى ومن عرايس على صفـان=ومحميـة الخنفـة لتيـمـا يـسـاري
وادعت أنا أحباب وصحبـه وخـلان=والقلب مـن فرقـا المحبيـن ثـاري
سافرت عن ناس لهـم بالغـلا شـان=ربعي اليا مـال الزمـن و استـداري
أولاد مكلـب مـن سـلالات قحطـان=عون الصديق وخصـم للـي يمـاري
اللـي يمـدون اللبـن كـل الأحيـان=واللي لهم فـي كـل عـزم اقتـداري
عنهم و في قلبـي مـن الهـم نيـران=نويـت بالممشـا ولا بـه خـيـاري
لدرة جنـوب المملكـة أرض نجـران=يـوم لفـا التعييـن دون اختـيـاري
لخدودها و لسدهـا ماضـي وأزمـان=ولجبالهـا وسهولـهـا و الـبـراري
الله كساها مـن الحـلا كـل الألـوان=و عطورهـا عـود وبـن وبهـاري
وحسن الطبيعة فـي تـلال ووديـان=والمي والخضـرة وزيـن العمـاري
لفيـت نـاس بالمكـارم لهـم شـان=اهـل مواجيـب بحسـن الـجـواري
ناس لهـم بالمرجلـه مجـد و عنـان=ولهـم بهـب الريـح ذكـر وطـاري
هم للكرم والجـود موطـن و عنـوان=وهـم للشدايـد والفـزع والكـراري
منطوقهم أرحـب وحييـت يـا فـلان=تلقى التحيـه مـن كبـار وصغـاري
ما جور منا و السلامـه و الإحسـان=كيف أنت ، طيب ، ويش حالك عماري
أرحب وقلط لك علـى حيـل سمـان=وتلقـى العلـوم الغانمـة بانتشـاري
محزم وجنبيـه زهـت فـوق الاردان=وعصبه على الراس تلـف وتـداري
رجال يام أن جيـت شيبـه و شبـان=نعـم بهـم وان حـل فيهـم طـواري
ربع لهم بالحـزم و الموزمـه شـان=سواطيـا يشـرون مـوت الحمـادي
وأنا أشهد أن الطيـب كلـه بنجـران=شهـادة مـا هـي لبايـع وشــاري
هذي شهادة حـق مـن قلـب ولسـان=ويالله عسى قـول الحقيقـة شعـاري
و الحمـد لله كلنـا بأمـن و أمــان=بالمملكـة عـم الرخـا والـوقـاري
اله الثنـا و الشكـر منـا و عرفـان=ساد الأمن والأمان مـدن وصحـاري
ترعى الغنم بجانـب الذيـب سرحـان=واستفلـت الغـزلان هـي والحبـاري
بأرض السعودية جماعـات واخـوان=من وين ما وجهـت الـك افتخـاري
وبالخاتمة صلوا علـى نسـل عدنـان=عد المطر واعـداد رمـل الصحـاري
وأنا اعذروني إن كان بالقول نقصـان=وتقبلـوا أشـواق شاعـر شــراري
مع تحيات /
الأستاذ / سالم بن مقبول اللسون الشراري
1423هــ
+ الجوف ـــ طبرجل
واقول لك يالشراري ماعليك زود
11-03-2005, 10:44 AM
العرض العادي
المواضيع المتشابهه
