قصيدة مدح في الشيخ / مبارك بن بلال ال فطيح الوعله يام وهو مديح وشجاع وكريم ووقفاته لن تنسى مدى الزمن
وهذه القصيدة من الشاعر / مسفر بن سليمان بن مسفر بن بلال ...
وحبيت نقلها هنا :
بسمك الله مدرج الفلك ياوال القدر=رحمة ٍ منك وعفوٍ وتوفيق ونجاه
ياولي العرش منك واليك المستقر=ياجزيل المد ماغيرك لخلقك يلاه
ياعليم ٍ بالسراير وعالم مابدر=ياجليل الملك ياواحدٍ معبد سواه
يارفيع الشان ياملتجي من لاقدر=يامجيب لمن رجاه وقريب لمن دعاه
أعصم لساني عن المخطيه طول الدهر=ودلني للجزل في مبتداه ومنتهاه
الشعر هاجسه مثل السحاب إليا انهمر=هل ودانه وجاء بارقه يوضي سناه
حالف ٍ ما اقول شعر ٍ نهاياته هدر=واعتني بالسبك والحبك واشيد بناه
ياقصيدي بي تباهى وحق ألك الفخر=شاعرك يبدع ويحكم بيوت ٍ منتقاه
ويتخير من جزال المثايل ماندر=والمثايل خيل والشعر له ذوق وطراه
يابيوت الشعر رهن الاشاره والامر=صوب من يزهى المدايح بفعل وعز جاه
ودي أمدح والمدايح لها علم وخبر=والكلام الصدق مثل القمر كلن يراه
ودي أمدح جدي اللي مقامه معتبر=مع الاوايل موقفه مع الاوايل مبتداه
مبارك بن بلال بيٌن وعلمه مشتهر=فيه سد ومد والناس ماتلحق مداه
وافي ٍ محسوب بيته من المجد أنعمر=الظفر به والكرم والجزايل من يداه
أشهد انه درع جنب ٍ حزام ٍ للظهر=كاسب الامداح والنعم ليطري نباه
المواقيف محسوبه ويشهد من حضر=له فعول ٍ تطلق الوجه في حرب الشراه
شامخ ٍ به كن وظلال ويدوس الخطر=الشجاع اللي ينجُي ويحجي من نصاه
انشدوا بير العليين فالصبح الغبر=وانشدوا عن موقفه روس ربعه واخوياه
فعل جدي يطلق الوجه ويشوق النظر=تل بندق شيخ الاجناب والموقف حماه
والختام أزكى صلاتي على سيد البشر=عد مايبرق ويمطر سحاب ٍ من سماه
م ن ق و ل