قصيدة القبائل
وهي قصيدة جميلة من القصائد التي تستحق النشر وشاعرها هو الشاعر مفرح بن قاعد بن وسمي الظمني المطيري وفي الظمنه ربعه شيخة الصعبة من بني عبدالله وهو شاعر معروف ومشهورن خصوصا في الكويت التي ولد فيها وعاش بها
وسبب القصيدة : أن أحد أخوال الشاعر سأله مرة من المرات قبل أكثر من ثلاثين سنة من هم أصحابك يامفرح فأجابه مفرح بهذه الأبيات وهي على النظم المربوع :
يقول ابن قاعد كلامن ينحكى به ــــ والعبد عندالله مايظلم نصيبه
ماني بطووف كلمتن جتني غريبه ــــ والله يكافينا مناقيد الخوال
ــــــ
ياخال أنا ما ماشي إلا كل طيب ــــ ماني بماشي واحدن شوفه يعيب
والناس تدري بالبعيد من القريب ــــ ومرافق الطيب يورد لي حبال
ــــــ
ماني بماشي إلا رجاجيل الشجاعة ــــ ومجالس الأجواد لي أكبر طماعه
لاني بنصابن ولا راعي خداعه ــــ يشهد علينا الله وتاريخ الليال
ــــــ
وأنا بخير الله في ظل الصباحي ــــ ربعن على أولهم يروون الرماحي
تاريخهم يشهد لهم يوم الكفاحي ــــ كلن يصاحبهم إلى دار القتال
ــــــ
كلن يصاحبهم ويرقد في ذراهم ــــ والشعب عقب المر يشرب من حلاهم
الله لايقطع رجانا من رجاهم ــــ عزالله ان العود عقب له عيال
ــــــ
والنعم باخوانن لهم يم المدينة ــــ ادناهم الهفوف واللي قاطنينه
وأقصاهم اللي باب جده حاكمينه ــــ عزوتهم العوجا إلى لحق المجال
ــــــ
عزوتهم العوجا على كل البنودي ــــ واللي يجي في ظلهم يرقا سنودي
بقيادة الفيصل وربعن له عضودي ــــ واليا رسا ترسي ثقيلات الجبال
ــــــ
والنعم باخوان لهم يم المنامة ــــ منامة البحرين بستان السلامة
الله يعمرها بحماي الجهامة ــــ عيسى اليا طير عن الراس العقال
ــــــ
والنعم باللي مايصكون المباني ــــ لاقيل من هم قلت من نسل ابن ثاني
نطاحة العايل وطليقين اليماني ــــ أهل قطر ياللي عن الثاني تسال
ــــــ
وأهل الخليج العربي منهم ومنا ــــ يوم اللقا يمشي ظعنهم مع ظعنا
وأرض العروبة من عصر نوحن وطنا ــــ حامينها وان جا نزول وارتحال
ــــــ
وأنا مطيري من يسل عني عرفني ــــ لا مادحن نفسي لكن الله وصفني
أجازي الطيب وأناصف من نصفني ــــ والمرجلة قسمة نصيبن واحتمال
ــــــ
ربعي معيرتهم بحمران النواظر ــــ حمر النواظر طيبهم بالراس حاضر
ماني بمادحهم لكن الله خابر ــــ ياما وياما خضبوا بيض السلال
ــــــ
وأصحابي الأجواد من كل القبايل ــــ أولهم العجمان ماضين الفعايل
صحبة شرف ياللي تعرفون الدلايل ــــ عجمان والله في معانيهم رجال
ــــــ
أدناهم اللي يذبح الكبش السميني ــــ ويكثر الترحاب عند الغانميني
عذروبهم ياما فروا بطن بديني ــــ يومن للبارود بالراس اشتعال
ــــــ
وأصحابنا شمر هل العادات شمر ــــ شمر إلى ركبوا على الجيش المضمر
الأجنبي معهم مدلل ويتأمر ــــ لو ما كان يعرف يمينه والشمال
ــــــ
وأصحابنا العتبان فرسان المغيرة ــــ ماقصروا فينا ولا منا قصيرة
ناخذ ونعطيعهم من اليمنا الشطيرة ــــ برقا وروق اللي لهم فعل ومقال
ــــــ
وأصحابنا السبعان والحربي نوده ــــ كلن يجي فعله على مفعول جده
وإلا الرشيدي واحدن منا نعده ــــ ربعن يحبون الوفا في كل حال
ــــــ
وأصحابنا الظفران ورجال آل مرة ــــ والهاجري والخالدي لله دره
والعازمي طيب ولا يلحقك شره ــــ واصحابنا عدوان سمحين القبال
ــــــ
والمنتفق وابن صخر عنا شويه ــــ والدوسري وسهول عندي بالسويه
وبقوم والهرشان عجلين الحميه ــــ لا ثوور الدخان وازداد الجفال
ــــــ
ولا نجحد الفضلي ورجال التميمي ــــ ورجال زعب اللي لهم فعل قديمي
وأولاد علي اللي يضدون الخصيمي ــــ وابن الشلاوي يوم تدريج المحال
ــــــ
والجد من يعرب ولا فيها طلابه ــــ وإلا ولد عناز خيال الحرابه
والنعم ياقحطان ورجال الصحابه ــــ هذا كلامي والعفو يا ابن الحلال
ــــــ
واللي نسيت اسمه رجا منه يعذرني ــــ الطيب عند الناس ماهو بالتمني
مذكور في يعرب ولا يرتاب مني ــــ يا نجمة الجوزا تعرفين الهلال
ــــــ
واللي يطالبني يجيني في محلي ــــ بين الدلال الصفر وإلا رحت أصلي
لاني بمتكبر ولا ني بمتغلي ــــ حيا الله الطيب على صفر الدلال
ــــــ
ماهنت لي طيب ولا أحب الإهانة ــــ واللي يهين الناس مايعرف مكانه
العيب من خان الوكن وارخا سنانه ــــ واللي يدس الراس عن وجه العدال
ــــــ
واللي يغره زين وحهه باركوا له ــــ الزين فعل الطيب مايحتاج أقوله
واللي يطق المنظرة يرضا بزوله ــــ والزين مايشرا بتسلوم الريال
ــــــ
وإن كان ياخالي تحسبوني ولدكم ــــ أنا ولدكم ياخوالي في بلدكم
والله لبيع الروح وأوفي في وعدكم ــــ لو كان ماقاصر على خالي ظلال
ــــــ
عندك خبر وش قال راشد في مقاله ــــ قال الفتى وإن طاب طيبه من خواله
وإن مايعرف يمينه من شماله ــــ مالك وماله جعل ماواه الزوال
ــــــ
والرزق عند الله ماهو من بنا ادم ــــ وابن ادم المخلوق تال الوقت عادم
الله يخلي للعرب روس المقام ــــ ياتابع محمد تذكر ويش قال
ــــــ
والختم صلى الله على راع الفضيلة ــــ عداد ماتمطر رشاريش المخيلة
صلوا على محمد نبين يندعي له ــــ ياالله عفوك يوم تقسيم العمال