[عبدالله آل عامر]

بسم الله الرحمن الرحيم

قصيدة رائعة للشاعر مهذل بن مهدي الصقور مليئة بالحكم والمواعظ:-

ياذيب ياعاوي في عالي هضابه = منك العوى نوحيه في مرقبك فوق
اقنـب ومن حولك جيـاع الذيـابه = بيّتـني درك عسـى جنبـك العـوق
بيّت من هاجوس قلبـه غـدا به = سمٍّ على قلبه من العام مسحوق
تنعـاف دنــيـاً تاليـتها خــرابه = طـرادها من طـارد المـوت ملـحوق
فبها الردي يحصل على مانوى به = ويغبـن بـها نـاسٍ وفيـين وصـدوق
المـال ينفع صاحـبه لاإحتما به = وله مركـزه بين الرجاجيل مرموق
واللي فقــيرٍ يبغـضونه قرابـه = في حاجته ماله من الناس مخلوق
والطيب اللي ما يصفي حسابه = يصبـر على مـرّ العذابيـن ويـذوق
والوادي اللي كل حيٍ رعى به = الحـرّ ماله في مراعـيـّه احقـوق
والعزّ من يهوى طريقه مشى به = والنـّاس كـلاً لـه هوايات وطروق
والصّقـر مخـلابه يرد الغـوى به = والبوم لا يصفق ولاهو بمصفوق
والصدق نورٍفي الدجى ينسرا به = والكذب غدراًمالها شمس وشروق
واللي يحسب حساب هرجٍ حكا به = هرج القفـا ما يلحقه منه منطوق
والشيخ تعرف حكمته من جوابه = والشّـور مايختص به كل مطفـوق
ومن جا على الذاري تحرّق ثيابه = ومن عارض المقفي تجي كبده حروق
وشيـخٍ بـلا ربـعٍ وعـزوه ولابـه = مثل الفـواد اللي بلا دم و عـروق
والنـذل لا يغزي ولا ينغزى به = وبين العرب تلقى علامات وفروق
أحـدٍ إلا غـاب إفتقـدنا غيـابه = وأحدٍ يغيب وما نخصه بمشفوق
ما يستوي غيم شحيح سحابه = وغيمٍ مخاييـله برعّـاد وبـروق
اللي يذوق الضيم مرٍّ شرابه = لابد ما يصفى له الكاس ويذوق
قلته عن أصحاب العقل بالنيابه = كلام قلته يفهمه وافي الذوق
حمامي اللي جرّ صوت اللعابه = اهتزت شجون بن مهذل من الشوق
ذكرتني صورت ضبي العدابه = ما لي سواه من المزايين معشوق
في سوق حب اللي حكمت الرجابه = أغليت سوقه لين عجزوا هل السوق
ياأعزّ وأغلى من هلي والقرابه = ياللي على نفسي مأمن وموثوق
لو قلت سق روحك لموتك جلابه = لاسوقها واسوق معها العرب سوق