[جـراح]

عيني اللي ذا الليالي مستخله =لو بكت عيني على حق بكاها
لو عذلت العين في دمع تهله =راحت العين الحزينة في عناها
حي من هذي المراتع مدهل له =حي دار سار خلي في ثراها
كل ما سجيت مروا بي محله =وشفت عد صاحبي قد شرب ماها
وإن بغيت يزيد قلبي شحنة له =سرت باقدامي على أرض قد وطاها
شاب راسي عاد قلبي مرفق له =في رجا الايام يصفي لي هواها
طول ما جنبت بيته جشمة له =ابغي العالم يجنبني حكاها
كم صبرنا بالهوان وبالمذله =نحتمل عوجا العرب نبغي رضاها
كثر ما تسهر عيوني واشتحن له =هو هوى روحي وهو غاية مناها
روحوه لديرة ما هي هوى له =جعل ذيك الدار ما تمطر سماها
ديرة الحقران ما هي ديرة له =مدهله في ديرة عذب هواها
مل قلب كل هاجوس يتله =تل دلو اللي ثلاثين رشاها
عقبها وش عاد حالي عايش له =مرخص الروح كله من غلاها
من فداها لو يروح العمر كله =قاضي خمسين عام في رجاها