ضاق صدري عقب علم لفاني مـن جنيـف=واستهاض الحزن في القلب واصخيت الدموع
جعـل دار سويسـرا مايخضرهـا القنيـف=وجعل لايسقيـك بالخيـر يايـوم الربـوع
الفضا مظلم ونـور القمـر مـازاد شيـف=اختفى نـوره ولا عـاد ينـوي بالرجـوع
اهبطت طيـارة الجامبـو فـوق الرصيـف=جات بالجثمان وانا اعتـزي بيـن الجمـوع
قلت عدوها الحنج والخبـر وقعـه عنيـف=قالوا المكتوب غصبا يجي من غيـر طـوع
اظلمت نجران والحزن فـي جـده مخيـف=واظلمت كل المدن وانطفـت كـل الشمـوع
ياثبات العز قصـرك علـى العليـا منيـف=ياشموخ المجد ليغبـت يبقـا لـك فـروع
ماتجف انهـار مـدك لمنهجنـا الشريـف=بالولا تثمر غصون الرضا مـن كـل نـوع
انت يابن مسلم الطاهـر السمـح النظيـف=انت يابن مسلم الصالـح الشهـم القنـوع
انت يابن مسلـم الزاهـد الجـزل العفيـف=انت يابن مسلم اللي حـوى زيـن الطبـوع
مستشار وله مكانـه ولا لهمـن وصيـف=يستحـد الكايـده ليـن يجبرهـا تـطـوع
كالذهب من معدنه خالصـن مافيـه زيـف=تعجبك لمعـت بريقـه ويبهـرك السطـوع
يرحمـك ربـي كريـم العفـو رب لطيـف=جعل في الجنه مقامك ولـك فيهـا ربـوع
ابكي ويبكـي لفرقـاه مـن قلبـه رهيـف=كم قلوب لاعها الحزن من بيـن الضلـوع
ذا قدر مكتوب فوق البشـر حكمـه يحيـف=لا اعتراض بحكم ربي وله منـا الخضـوع
جعل له في جنة الخلـد مربـاع ومصيـف=وجعل يسعد وسط قبـره وينعـم بالهجـوع
اشهد انه نقصه على من عرف قدره كليـف=واشهد ان فرقـاه ضيقـه وفقدانـه يلـوع
غيبتك يابـو محمـد لهـا وقـع عصيـف=غيبتـك يابـو محمـد لهـا وقـع يـروع
جعل ربـي يرحمـك عـد بـراق الخريـف=وعد ما المسلم لربـه سجـوده والركـوع
لويفيد الدمع لا بكيك ليـن اصبـح كفيـف=لويفيد النوح لا نـوح لـك نـوح الجـزوع