(( .. العلم نور .. )) .. !!

[حسن علي الهاجري]

السلام عليكم ..

يشرفني الانضمام بهذا الصرح الشامخ ..

ويكفيه شرفا بانه باسم مجاس العجمان القبيله العريقه ..

وهذه اولى مشاركاتي واتمنى ان ترتقي لذائقتكم ..

::::::::::::::::::::::::

الشّعر لـه رسـم ومعاييـر وفنـون=ما يسْبر اغـواره حـد ٍ غيـر ناسـه
ماهوب لعبـه بيـد خبـل ٍ ومجنـون=ألهـام مـن ربّـي ولاهـو دراسـه
مرّ ٍ يجي صعب وعبالـه ومشطـون=ومـرّ ٍ تزيّـن لـك بـدرّه ومـاسـه
واليوم يومه لا تقـل كيـف واشلـون=شيء ٍ طرالي والشعر فـاض كاسـه
أحس في وسط الحشا جـرح وطعـون=من كثر من يشكي الزمـن وانتكاسـه
وهـذي عوايدنـا لهـا عـدّة قـرون=ننعـي الزمـان ونتهمـه بالخساسـه
والعيب فينـا واكثـر النـاس يـدرون=لو ان بعضنـا غـارق ٍ فـي نعاسـه
نفتربالدّنـيـا بـلـيّـا دركـســون =واحلامنـا مـال ومناصـب رياسـه
ومنها غرق فرعون واصحاب فرعون=ولا فادهم منصـب وجـاه وحراسـه
واجب على الانسان ما يتبـع الهـون=ويروح عمـره بيـن لعـب ووناسـه
العلم نـور ويهـدم الجهـل بالكـون=وكـلّ ٍ علـى قـدّه يفصّـل لبـاسـه
أحد ٍ عليه اللّبـس زاهـي ومصيـون=وأحـد ٍ فـلا يستـره حتّـى مقاسـه
وقد قالها قبلي مـن النـاس مليـون=منهو غرس غرس ٍ بيجنـي غراسـه
وترى التعلّـم خيـر ياللّـي تعذلـون=ومن يبغـي العليـا يقـوي أساسـه
والعلم أجره يا هل العـرف مضمـون=قالـه رسـول ٍ طهّـر الله انفـاسـه
ماهوب قول ٍ مـن وكالـة يقولـون=وماهـوب كذبـة مدّعيـن السّياسـه
لكن كـلام الصّـدق فاللّـي يجـدّون=فعلـم الفضيلـه لا علـوم الدناسـه
بان النّمل والحـوت لأجلـه يصلّـون=وملائكـة ربّـي تسـهـل مـداسـه
ويـا طالـب ٍ للعلـم للعلـم قانـون=يبغـي فطانـه وانتـبـاه وكيـاسـه
واليا رماك ابليس في سهـم مسنـون=وخيّم علـى قلبـك وعطّـل حواسـه
اقرى كتاب الله ليـا صـرت مغبـون=يجلي همـوم القلـب يبعـد عماسـه
وجنّب عن اللّـي للمهالـك يجـروّن=وجنّب عن اللّـي عيشتـه باللّحاسـه
وقـت اللّـوازم كلّهـم مـا يسـدون=ورصيدهـم بالطّيـب بيّـن افـلاسـه
مفتون قابل له مـن النـاس مفتـون=لا عندهـم همّـه ولا بـه حمـاسـه
وبعض العرب لو كان له رمش وعيون=اعمى البصيره مـا يدّلـه احساسـه
سفيه راي ٍ كـل يـوم ٍ علـى لـون=صافـي زلال الجـم لا جـاه حاسـه
ولا خير في اللّي يتبع الـذل والهـون=واللّي ينـزّل فـي المهمّـات راسـه
وختم الكلام العلـم بالدّيـن مقـرون=وبالعلم ميّزنا الذهـب مـن نحاسـه

:::::::::::::::::::::::::::::::


وسلامة قلوبكم


اخوكم .. حسن بن علي الهاجري
::::::::::::::::::::::::