وش اسم جدكم يا آل عرجا .؟

[مسعطر]

السلام عليكم ورحمة الله وبركاته ,,

في السبعينات من القرن الماضي اي قبل 35 عام تقريباً ,,

كان مجموعة من ابناء البادية ( و أكثرهم عجمان ) في معسكر كويتي على ما أظن ,,
و من ظمنهم الشاعر عبدالله بن فهد بن شفلوت آل رادعه آل عرجا العجمي كان شاباً صغيراً وقتها ,,
و كان أحد الموجودين ( لا داعي لذكر اسمه ) حاسد ٍ ابن شفلوت على مكانته عند العجمان
(و هم ثلاثة تقريباً واحد من آل مصرا و واحد من آل شامر و واحد من آل سليمان ) و يمكن انهم اكثر ,,

و من ظمن كلامه للعجمان ,, قال : والله يا ذا العرجاني ما يِردكم قبلي بـ جدّ ..؟؟ (اي لا يتلقي معكم في جد ٍ قبل جدي و قرابتنا لكم وحده ) و من هذا القبيل ,, إلى إن قال : ( و العرجاني ذا ما يعرف اسم جدّه .. ما غير متمسك ٍ بـ ذا العجوز العرجا ) .. بعدها قال بن شفلوت بعد ما رجع من إجازته و سأل شيبانه عن اسم جده (محمد[الجد الأعلى لآل عرجا] بن سليمان بن وعيل بن (هشام=يتلقون مع العجمان فيه)) و عزم خوياه على غدا في دوامهم و الرجال اللي سبّه موجود ,, و قال : يافلان ابشرك انّي لقيت جدي ..
و ألقى القصيدة و كان من ضمن الموجودين بعض بني هاجر و قحطان و اراد ان يمدحهم و هم كفو لذلك :

بديت بـ /أسم الواحد الفرد الصمد=اللّي عليم ْبـ /سـِرّها و ْجهارها
الواحد اللّي ما نسال إلا هو=رحمان خلقه عالم ٍ بـ /أسرارها
منجي سفينة (نوح) من هول الكدر=و من غرقة ٍ غطـّـت جميع ابحارها
و ْخِلاف ذا برسم جديد مثايل=مثايل ٍ من خاطري مختارها
مثايل ٍ فيها سلام و تحيّة=و ْمن الذهب منطوقها و أسطارها
تهدى ْلـ /منهو يكسب المدح و الثنا=تهدى ْلـ /ربع ٍ لازم ٍ وقارها
تهدى ْلـ /ربعي كاسبين الطايلة=و اختص كل كبارها و صغارها
ربعي (ضنى عرجا) (سلالة محمّد)=و عدوّها يشكي الونى من مغارها
هل سربة ٍ تسقي العدو كاس الصدا=لا شبّت الشوبا و ثار إغبارها
حنّا (ضنى عرجا) و (إبينا محمّد)=و التايه اللّي ما يعرف اخبارها
و أفعالنا من بين (يام ٍ) تِعرف=و بين البوادي و في جميع أقطارها
قد قالها (راكان) في مقاله=ْبـ /يوم (الصّلَيب) و من حضر محضارها
( مخيلة ٍ سوّ البلا في بروقها=كم صبيّ ٍ طاح في معبارها )
شهد لنا تِرثة هشام ٍ بـ /الفخر=يوم المعادي طاح في مثارها
جات الشلايل و ألتفاها شيخنا=(فهّاد ابن حرفش) زعيم حرارها
زيزوم ربع ٍ بـ /اللّقا عيّاله=الّلابة اللّي ما تخون ْبـ /جارها
قال : الحمايا جات يا صُلب جدّي = و إخوانّا لازم ْنقوم بـ /ثارها
رِكبوا ضنى جدّي على كل ضامر=و خذوا ْقضى (مدغش) بـ /وضح نهارها
بـ /عصّريّة ٍ يا ويّ من عصريـّة= و (الصُّلب) شبّت بـ /الجماهي نارها
يشهد لنا الأجواد في ساحة اللّقا=رمينا عقيد القوم في معبارها
ْبـ /يوم (العريق) اللّي تسموا بـ /وقعته=هدمنا بيوت القوم و هتكنا إستارها
و خذينا المزيّن و الاجوايد تعتزي =و نعم ٍ بهم لا شك حنّا دمارها
بناتنا يمارنّ بـ /فعل اجدادهن=يوم أعتلوا قحص الرمك و اكوارها
و الشاهد التاريخ ما هو زلّة=يشهد ْلـ /ربعي و النعم تذكارها
قول ٍ بلا فعل ٍ كذب راعيّه=يا سارق التاريخ يا غدّارها
يا سارق التاريخ هذي فعولنا=مثل القمر يكشف شعاع انوارها
حنّا حرار ٍ ما تقصّرنا بأحد =عادك مع الأجناب تحت اقصارها
نرعى حدود (الشام) و حدود (اليمن)=و ذيدانّا ترعى جديد قفارها
قلته و انا ماني قصير ٍ قاصر=ولاني من اللّي شعرها تجّارها
جدّي (قنيبر) عزوتي و افتخر به=و تشهد لي أشراف العرب و أخيارها
و أنا أحمد الله يومني من لابة=ْتِعزّ القصير و مكرمة خُطّارها
الجار يلقى عندها كل حشمة=و يثني عليها كل منهو زارها
آلاد (ابن عرجا) و تِرثة ( ْهشامي)=نار ٍ تواقد بـ /الخضيرا شرارها
و آلاد (ابن مرزوق) ربعي و عزوتي=بـ /المجد و العليا .. ْطوال ٍ شبارها
(عجمان) لا رِدّ البرا ثم جا النذر=زالت سلاطين العرب من دارها
و آلاد (ابن مفلح) مدابيس السِربّ=يوم الوهايل مرخصة عمارها
و آلاد (مذكر) ربعنا و ْعضودنا=كم هيّة ٍ داسوا كِمِين أخطارها
و ْجدودنا من صُلب (يام ٍ) تنتسب=من صُلب (يام ٍ) ساسها و ْجدارها
يام ٍ بني عمّي على الخير و الشر=نفخر بها من طيبها و إفتخارها
(شبيـّبيّة) العزوة و (مريّة) النسب=ياميّة ٍ نفخر ْبـ /طيب أذكارها
هم درعنا .. و حنّا لهم عضد ٍ قويّ=ولا تصفق اليمنى ْبـ /غير يسارها
هم دعنا الواقي و حنّا له ذُخر=تجارة ٍ ما خسّرت تَجّارها
و (يام ٍ) و (قحطان) إخوان و رفاقة=تكفيك عن غيّابها حُضّارها
و أيضا (بني هاجر) هل المدح و الثنا =أهل رباع ٍ مكرمة زوّارها
بمدح بني عمّي و هم كفو ٍ لها=هذي فعايلها و هذي آثارها
و من غير قاصر بـ /القبايل كُلّها=و الأجواد ما اهفي حقّها و مقدارها
و الله يعزّ .. ْملوكنا و ْشيوخنا=دروع الوطن و حصونها و أسوارها
و (أهل الخليج) إخوان و الشعب واحد=و حكامنا منّا و حنّا أنصارها
و ختمانها مني صلاة على النبي=المصطفى سيّد جميع أبرارها

و دمتم بحفظ الله ,,
الرجاء : كتابه المصدر عند النقل ,,

[alajmi52]

كفو والله عيال هشام
مسعطر صح لسانك ولسان الشاعر

[الـهـادي]

لا لا لا ,,,

وش ذا الجديد يامسعطر ,,,

ولله كفو يابن شفلوت . سعد ولله العجمان الى بنى عااااااارج هم ربعهم ,,

[يامي وربي الله]

ماعليك زود ولاهنت

[سعود الخويطري]

حنّا حرار ٍ ما تقصّرنا بأحد =عادك مع الأجناب تحت اقصارها
نرعى حدود (الشام) و حدود (اليمن)=و ذيدانّا ترعى جديد قفارها
قلته و انا ماني قصير ٍ قاصر=ولاني من اللّي شعرها تجّارها
جدّي (قنيبر) عزوتي و افتخر به=و تشهد لي أشراف العرب و أخيارها
و أنا أحمد الله يومني من لابة=ْتِعزّ القصير و مكرمة خُطّارها
الجار يلقى عندها كل حشمة=و يثني عليها كل منهو زارها
آلاد (ابن عرجا) و ترثة (هشامي)=نار ٍ تواقد بـ /الخضيرا شرارها



ياسـلام ياسـلام صح الله لسانك ولسان شاعرها / عبدالله بن فهد ابن شفلوت آلعرجاني


وكفو وكفو في ربوعنا آل عرجا ويستاهلون المدح والثناء خيالة السمراء



وعز الله انها معلقه شعريه وبيض الله وجهك يـ مسعطر ودائما حضورك وافي



وتقبل سلامي وأشـواقي

[حراب العجمي]

المشاركة الأصلية كتبت بواسطة مسعطر

(عجمان) لا رِدّ البرا ثم جا النذر=زالت سلاطين العرب من دارها

[مسعطر]

المشاركة الأصلية كتبت بواسطة alajmi52

كفو والله عيال هشام
مسعطر صح لسانك ولسان الشاعر

اي والله كفوووو ,,
يستاهلون ,, و صح بدنك يا العجمي و مشكور على
مرورك ,, يا مرررحبااا و مسهلاااا ,,,

[خوالي عمامي]

قصيده جزله ووافيه صح الله لسان الشاعر

والشكر موصول لمسعطر ما يجيب إلا الجزلات ونقول أحسنت

توضيح لبعض ما ورد في القصيده :

مدغش هو ابن درجان آل سليمان .. خواله ال العرجـا وقد قتل في مراوح الخيل بين خواله و مطير في الصليب

والمزين المذكور في قوله :

وخذينا المزين والأجاويد تعتزي ..........ونعمٍ بهم لا شك حنّا دمارها

هو مزين سبيع ... وعليه فتاة من ال عمر سبيع خذوه ال قنيبر ال العرجـا في معركة العريق حيث قادوه سبيع وكثر الذبح عنده لين أنكسروا سبيع وهم ونعم حيث كادت تحصل هزيمه لولا أن ال قنيبر ردوهم واكسروهم وخذوا المزين . وهي في الأساس بين الدواسر وسبيع واشترك ال شامر وال ضاعن فيها بالإضافه لأل قنيبر

تقبل تحيتي

[ساري الليل]

،،،
الله لايهينك يامسعطررر ونت جبت القصيده كامله ماشاءالله عليك


وعزالله ان الممدوحين يستاهلون المدح ،، وآل عرجاء والعجمان بني عم وخوان ،،


والله لايجمعهم الا بطاعته،،،،

[مسعطر]

المشاركة الأصلية كتبت بواسطة الهادي 2007

لا لا لا ,,,

وش ذا الجديد يامسعطر ,,,

ولله كفو يابن شفلوت . سعد ولله العجمان الى بنى عااااااارج هم ربعهم ,,

افاااا عليك ,,

اضبطك على قولتك

ولاهنت على مرورك طال عمرك ,,
يا مرررحبا و مسهلااااا ,,