شب الحطب يا أبوك في ساحة الدار
ضوي الشمـوع بدارنـا والقناديـل
قرب دلال الكيف والنجـر و اختـار
أجود صنوف التمر و البن و الهيـل
احمس لنا من طيـب البـن مقـدار
بن اليمن ما هـو بـوارد برازيـل
جلجل بصوت النجر للضيف والجار
ومن جاك حيي به وزيـد التهاليـل
وخلي بهار الكيف هيـل ومسمـار
ولا هلوا الضيفان سـوق الفناجيـل
اليـــــــوم حنـا لأخـر الليـل سمـار
و إن زانت الدلــــة تزيـن التعاليـل
و انصب خيام إن كانوا ضيوفك كثار
إن شفته إن الدار يا أبوك ما يشيـل
جهز عشا الضيفان يا نسل الأحرار
مد السفر لو هو يجي طولها ميـل
قدوتك أبو متعب كما الغيث مـدرار
فيه الفرات وفيه دجلة مـع النيـل
يعطي عطايا خير مـا هـي تبـذّار
زين الفعايل عذب من ثمـه القيـل
زود عشاك و لا تحسّـب للأسعـار
خير الوطن سابق ومقبل كما السيل
خذ ما تبي وارقص على دقة الطـار
وغنـي هجينيـة وغنـي مواويـل
والله لأرقـص سامريـة ومزمـار
والعب رديح إلين ما يغرب سهيـل
دمعتك في قلبي كمـا جـذوة النـار
خلت دموعي فوق خـدي هماليـل
ردوك ما قالوا لك أسبـاب وأعـذار
تصرخ تقول الآن أبي منـك تأويـل
يا حيف يا عيباه يا منتهـى العـار
و ين الوطن يا أبوي وين الرجاجيل
ليه الوطن زاد الحرس حول الأسوار
من دوننا وحنـا جنـوده بواسيـل
الموطن اللي ما لنـا فيـه مقـدار
ما ننتمي لـه كـود كنـا مخابيـل
حكامنا حطـوا لهـم دايـم شعـار
أبواب مفتوحة ومـن غيـر تقفيـل
هم علمونا عـزة النفـس بإصـرار
وحنا ورثنا ذاك جيـل بعـد جيـل
يا أبوك يكفـي لا تزيـد التسعّـار
لا لا تزيد النـار بالقلـب تشعيـل
أشوف بحر الشعر في خاطري ثـار
يا هون كاترينا رغم كـل مـا قيـل
تلاطمت في خاطري جملـة أفكـار
كنه تسونامـي و لا هـو بتهويـل
أبيات شعري كنهـا نـار وأحجـار
هلـت وتحملهـا طيـور أبابـيـل
اصبر شوي علّ الزوابع والإعصـار
تهدأ و تهـدا غضبـة كلهـا ويـل
طبعي حليم و لا تسـرّع ولا انهـار
والصبر طبعي لو تزيـد الغرابيـل
اصبر عسى نار الشعر تقلب أمطـار
وتلقى مسـارات التفاكيـر تحويـل
يا قلم هات الورق هات الأحبار
باعطيك علم وكاد ما هـو تهاويـل
اجلس و أنا بأمليك وأعرفك بيطـار
افهم كلامـي حلـل القـول تحليـل
واكتب تراني بابتدي سبـر الأغـوار
و أعطيك موجز مختصر دون تطويل
لا تنتظـر منـي إعـادة وتـكـرار
خذ كلمتي وابني عليهـا التفاصيـل
و ابدا بذكر اللـي عليـم بالأسـرار
اللي علم باللي مضـى و المقابيـل
سبحانه اللي قد كتب كـل الأقـدار
ما نرتجي غيـره عليـه التساهيـل
و ثني بحمده مالـك الملـك جبـار
اللي حمى كعبته من صاحب الفيـل
حب الوطن واجب ولا بـه تخيّـار
و النذل من هو يرتضي فيه تبديـل
و آل السعود أخيار من خير الاخيار
يستاهلــــون منـا محبـة وتبجـيـل
اليوم أبو متعب على دربهـم سـار
و حبــــه لنا متأصـل فيـه تأصيـل
وعيد الوطن فرحة لنا صغار وكبار
ما هو عشا ننسـاه لا هـود الليـل
لا بد ما يبقى مـدى العـام تذكـار
وفي كل عام يصير للحفـل تعديـل
لا ينكسر خاطـرك خابـرك صبـار
يكفيك مثلت الوطـن خيـر تمثيـل
و يكفيك تلفت ليلة العيـد الأنظـار
يوم إنها الدمعة على خـدك تسيـل
بعض العرب يا أبوك هـذار ثرثـار
من زود جهله يحسب العقل بالكيـل
كم من صغير شرف الـدار لـو زار
و يا ما كبار و بالحقيقـة مهابيـل
لو إن أبو متعـب درى بالـذي دار
يأخذك في حضنـه يدللـك تدليـل
و يزيدها فرحتـك مليـون قنطـار
و من بسمته تزداد الأفراح بالحيـل
وتصور المشهد وكـالات الأخبـار
يسكت عدوه يخرس أهل الأقاويـل
وختامها صلي على خيـر الأبـرار
اللي عليـه تنـزّل الذكـر تنزيـل
هيا توضأ دام وقـت الفجـر صـار
وعقب الصلاة نرتل الذكـر ترتيـل
وسلامتكم
13-11-2008, 10:36 PM
شب الحطب
العرض العادي
المواضيع المتشابهه
