مساكم الله بالخير والعافيه والعلم الطيب.....
واتشرف بوجووودي بين ربعي واخواني ومعارفي والله يجمعنا وياكم على العز والطاعه......
صلو على النبي,,,,,,,,,,,,
ياربعنا ياهل العقول الحكيمه=ياللي من الايام تاخذ اعبرها
يامن لهم عز ٍ ومجدٍ وقيمه= يالابة ٍ بالطيب كلن ذكرها
ياعزوةٍ فوق الشواهق مقيمه= يامزنةٍ في القاع بيّن ثمرها
ياوقفه بسود الليال العتيمه= ياذخر منهو للصعايب ذخرها
يارحمة المسكين وعون اليتيمه= يامدة اللي حاجته ماقدرها
ياغامرين الضيف قدر وحشيمه= يامحتمين الجار لا أونس خطرها
ياعزوتي ياهل العلوم الكريمه= للطيب والمعروف ربي سخرها
يافزعة اللي غلّق الوقت تيمه= ماتقصر ايديكم ولا احدٍ قصرها
خطلان الايدي والمواقف عظيمه= شجعان تحذف في الشدايد أغترها
يالاستقامه والخطى المستقيمه= يامعدلة عوج الليال وشهرها
ياعٌصابة راسي من زماني وضيمه= ياعز نفسي ياسندها وفخرها
منهو نخاكم ماله الاّ نعيمه= له السعد واعداه تجني قهرها
ياويل من ينوي لربعي خصيمه= انا اشهد ان نفسه بيدينه قبرها
غير الهزيمه ماله الاّ الهزيمه= بيض السيوف بترتوي من حمرها
افعالنا على المعادي وخيمه= وعلى الصديق ابرد من الثلج وارهى
ذا طبعنا عاد الليالي قديمه= ناسٍ نقدّرها وناس نحقرها
ياهيه ياجاهل وش تكون ديمه = هذي تراها قطرةٍ من مطرها
خيالة السمرا يامال الهشيمه= كم جمع قومن جمع ربعي كسرها
جاني سؤالك قلت اعلمك جيمه= وترى الاجابه نبذةٍ مختصرها
عندي رساله للوجيه الغشيمه= اللي ماتدري وين ربي حشرها
رسالتي جمله مفيده حكيمه= المبتدى واضح وواضح خبرها
(((من لايميّز في المواقف ..بهيمه))=يخسر وفا ربعه ونفسه خسرها
حتيش لو كان النوايا سليمه= يقطف ثمار العز منهو بذرها
وانا وقفت ولي مواقف وشيمه= واهل الوفا يحمي نباها ظهرها
احدٍ كسب بين الغنايم غنيمه= واحد سهوم اللوم راسه حكرها
ويااللي تعزوى تبغي (شداد ريمه)= ريمه ماتقدر ياولد في مهرها
اليا رِكبنا معالقات الشكيمه= مني نصيحه لاتجي في نحرها
وان هازتك نفسك ونفسك سقيمه=كم من عزاوي فعلنا قد دثرها
هذا انت ياللي تحسبنك صتيمه= ولاّ القبايل وافيه ونخبرها
صيت القبايل عز ربي يديمه= واللي نصرنا بالمعزّه نصرها
اقولها ونفسي لربعي حميمه= وانت اعتبرها زي ماتعتبرها
لا فيني باس ولا عليّه ظليمه= راسي تهيّض والمشاعر نثرها
وصميم قلبي قام ينثر صميمه= كلمات في صدري وحرفي جهرها
بيّنت لك وشلون للعز قيمه= وضربت لك اروع معاني صورها
فان طعتني ابعد عن (شداد ريمه)=ماانت بكفو حتى تلامس وبرها
وسلامتك وتعيشووون
اخوكم ومحبكم محمد العرجاني