ديوان الشاعر بندر بن سرور العتيبي (متنبي عتيبة)

[مسفر مبارك]

السلام عليكم ورحمة الله وبركاته إخواني حبيت أقدم لكم شاعر من فطاحلة الشعراء والملقب بـ(متنبي عتيبة)

#الشاعر بندر بن سرور #

هو بندر بن سرور بن خضير القسامي العتيبي
ولد وترعرع في القراره بمدينه الدوادمي سنه 1360هجري
توفي والده وهو صغير السن وعاش مع عمه بعد زواج والدته من رجل اخر.
عاش الحرمان منذ صغره وربما السبب فيما وصل اليه بندر من موهبة شعريه فذه
درس حتي المرحله المتوسطه وتوظف في الجيش السعودي وارسل للكويت اثناء حرب الصامته وتهديدات عبد الكريم قاسم حتي وصل الى رتبه عريف في الجيش الكويتي




قال بيت له عندما اتاه احد الدائنين يطالبه بماله

الدين واجد و الوظايف تعيسة *** والعسكرية خلت الراس شايب



**من اشهر قصائد بندر ابن سرور علي الاطلاق والتى يرددها الجميع**

( ياسخيف الذرعان)
وحكايتهاعندنا قام بندر بن سرور بطرق باب الامير تركي بن ربيعان في وقت متأخر وكانت احدي الفتياة تخاطبه من خلف الباب وسألته من هو وما يريد قال انا بندر اريد والدك وعند ما سأل الامير تركي الفتاه عن الطارق قالت هذا المرجوج بندر وقد سمعها حين قالت المرجوج واخذت كلمتها تلك موقعٍ من الاسيءفي نفسه

وكان بندر معروف لدي الجميع وقد انشد قصيدته تلك
ياسخيف الذرعان مانيب مرجوج***رجتني الأيام غدر وحيله
يابنت لولا اللي على تاسع الفوج***تركت نجد وعزوة بالقبيلة
لاشك حاديني على نجد هادوج***مسقي الفيافي لين يدرج مسيله
تركي ليا من الليلي غدن عوج***حملة عتيبة كلها ماتشيله
يرسي كما ترسي البواخر على الموج***ومنين ماصك البحر يرتكيله
مادام تركي حي ماودي أدوج***وإن غاب غبت من الرجوم الطويلة

____________

صدق متنبي عتيبه

وله قصيده مشهور ايضا قالها عندما كان في الامارات وهي طويله لكم منها تلك الابيات
متى يجي في نجد بعض التدابير*** حتى يجي للصابرين انفراجي
يالله ثبتني على الارض لا اطير ***لين اشرب الشاهي واكل علاجي
علاج راسي حبتينن بقصدير ***اللي عليهن رسمهن بزدواجي
ويامنير اخذ الفرت واخذ الفواتير ***واحرص عليه ودخله بالكراجي
ان كان يبغى زيت عب المواصير ***وان كان يبغى نار غير بواجي
واليا استعد وضخر البعد تصخير ***تصخير شيهانن لفرخ الزراجي
عده على اللي مايعد المخاسير ***ركاز عمدان الخشب للنعاجي
تم قل لبو ماجد ترى وقتنا غير ***واتبدلت سحب المطر بالعجاجي

والباقي رقابه
_________

من قصايد بندر بن سرور (في الصبر)

أنا الذي ما ابدي على الناس سرّي .. . من خوف سودان الوجيه تحكي به
أصبر على ظيم الدهر و التعرّي .. . من شان من يرضى عليّ الغليبة
و ابعد مجالي عن عيال التزرّي . .. من لا هوى قلبي دواه المغيبة
واخاف لي من مجلسٍ ما يذرّي ... في جانبه بومٍ حساسه صليبه
و سوالفٍ مابين بحث و تحرّي .. . يجرح فؤادي عيّه و ابتلي به
يرضيني المقسوم خيري و شري . .. سبحان من لا تعلم الناس غيبه
أحدٍ على ربعه يحب التحري . .. للشر بلاس و خيره بجيبه
هذاك يالربع انا منه متبرّي .. . لو عضّني ناب الدهر ما انتخي به
من خوف يضحك لي و هو يستغرّي ... يفتل حبال السّوْ ما يندري به
يفرح عليّ بكل شيٍّ يمرّي .. . و ان شاف يمّي خير عنّي نهيبه

===================

و هذه بعض الأبيات قالها بندر في الدخان

شي بقلبي واهجه مستمري ... لولا أزرق الدخان يطفي لهيبه
سلّط على الدخان لو هو مضرّي ... له حزّةٍ عند احتكام المصيبة

يا منير عمّر لي من التتن معمار ... يبري الغليل اللي على الكبد كالي
والا رفعت الصوت و أبديت ما صار ... من شان تدري ويش ولّى بحالي

أشرب من ابو بس و أنسها نس .. نس المهرب مع خطوط الجزيرة

ياما رميت الكيس بين الشراريب ... و اليوم أدوّر ما لقيت اتعميرة

ما يفيد اللف لو يالع و أكنه .. ماش مثل اللي قراطيسه نظيفة

ارم البكت و اجدع الكبريت يالريمي ... تطري و مما طرى لي زادني ونة
الله يغربلك تصحيني و انا نيمي ... مانته بلاعوب عطني والعب الشنة

===================

من قصايد بندر في الدخان

اشرب من ابو بس و أنسها نس ... نس المهرب مع خطوط الجزيرة
ليا من عطى له ثالث قام يضرس ... خفر السواحل في طريقه خطيرة
شدة قصير ولا يمر المهندس ... توّه جديد و عالمٍ به خبيره
يسري من الحدّين و يصابح الرس ... عليه بندر ما يخونه ضميره
جاب البضاعة من مغانيه بالدس ... ماهوب شاةٍ ميتة في حظيرة
يالله يا منشي السحاب المطمّس ... تفرج لمن مثلي عيونه سهيرة



===================

من قصايد بندر بن سرور

الا وا وجودي وجد من صك دونه باب .. . بقفل اعجمي مغلقات مساميره
عَدَو به على اللي كنه النسر بالمرقاب ... على الجمس الأصفر كاملات شراشيره
معه فرت خمسة طن ياخذ مية ركاب .. . من المال عيّن ينقلنّه تغاييره
دخل هو و حِمله للحكومة بغير حساب .. . و راعيه عشر سنين و يعاد تقريره
على اللي كواني كيّة العظم بالمشهاب ... على أقصى عراوِ القلب محمي مناشيره
عشيري ورا الكوده وانا من ورا مشعاب ... بعيد قريب تعيب يا هون تيسيره
ولا يوصله كود " فرت " عليه اسطاب .. . ليا حاسب السوّاق تقدح مواخيره
صنايع بياطير الكفر لابسين الكاب .. . عصاة اليهود اللي مشاريبها البيرة
ألا يا نديبي فوق فرتٍ ورد من شرق ... على راس قيره للعليمي تعاشيقه
من الوارد اللي جمركه عند راعي عرق ... على المطرق مجبور ياخذ قماريقه




===================


من بلاد الشام جينا بالمكينة ... فوق فرتٍ ما تخثع بالطماني
يحتدي مثل الجمل تسمع رطينه .. . مع طمان القاع مثل الثعلباني
والشـُفير من المدارس مطلعينه .. . عن ظلام الليل شب الكهرباني
كل ما جاه تل يلعن والدينه.. . باليمين اللي على كل اليماني
ما تجيه يسار رجله شوف عينه .. . غير يسرى الطار شيٍّ بالاماني
يوم قال له الخوي عاشت يدينه . .. شد رجله للكمك واحد و ثاني
يالله انك تنصره من نصر دينه .. . إن عطى له مع غبا ولا بياني
قلت يالمطنوخ أنا عيني حزينه.. . من شراب اللف أبيه و عنك كاني
قد رمى بالكيس قدمي قال وينه ... دوك ما بالجيب عن شيٍ لهاني
قلت ثالث قال يالله لا تهينه . .. قلت خامس قال يطلب نقل ثاني
قال واحد و الكمك واسمع حنينه ... كيف ما ترضى عليّه بالهواني
قلت واحد و الكمك ضام المكينة ... قال لي من يرحم القاسي لياني
قلت والله يرحمونه صانعينه . .. قد زعلت من اللهيب اللي حداني
قال ما ناثق بمن هم متقنينه ... عن مشاور غير عرفي قد كفاني
قاطع عرقين مادري وين وينه ... قد وصلت الأرض و اسمع صوت ثاني
قلت دوك اللف خابوا شاربينه ... غطّني عن شوف شي ما خفاني

================


راكب اللي مخ رجليه خنزير و هوا . .. أشهب في مقدمه باقين و عكس تاج
متر في مترين مستبرم كله سوا .. . حايفه حطاب ما سمكره راعي الكراج
إن نعشته بالثلاثة مع اللفة عوا .. . عوي ذيب محتدينه مربية النعاج
ثابت ما يختلف كلما لف إنزوا .. . و ارتفع ثم ارتخى مثل طايرة المراج
كن ضرب المرو في الويل قدام و ورا . .. ضرب هملول البرد و ان تقفاه العجاج
منوة اللي مشفقن لهله و لهم نوا . .. من بعد طول المسافة يبي فلّة الحجاج




===================

من قصايد بندر بن سرور( القصيده هذي جبل من المعاني والمفردات والحكم والعبر)

صدق من سماة متنبي عتيبه

يالله يا جال الأمور المهمة . . تجلى وهق قلب برى حال راعيه
البر دجته و البحر رحت يمّه . .. أدرج سبب حظ على الله مساعيه
يوم إن ولد اللاش رزقه على أمه ... رزقي على اللي ميّت القشع يحييه
ماني وانا بندر ببياع دمه . .. يقطعك يا بيّاع دمّه و مهفيه
اللي يبيّع لابسات الأزمه .. . ثور يبي بيض العماهيج تغنيه
يزعل ليا جت ليلة الدول يمّه ... يرضى بسوق المال بأخيه و أبيه
خطو البخيل اللي يكبّر معمه ... يقرا الكتاب و واجب الله مخليه
أما هرج له في رفيقه بنمّه .. . والا عطا و أمه تضيّع هقاويه
يا مل قلب كل ما مات همّه . ... دارت دواليب الدهر لين تحييه
فرّاق شمل الناس عيّا يلمه .. . وقتن يشيب الراس من شاية فيه
أحدن ينام و حط راسه بكمه . .. و أحد تخم النوم عينه و تخطيه
و أحدن يحاول بالردى بنت عمه ... و أحدن يحاول ستر عذرا عوانيه
تخالف الأنظار شرقن و يمّه .. . كلٍ هدف رايه من الناس مرضيه
أنشدك ياللي كل شي تتمه .. تقرا الكتاب كل فرض تصليّه
ويش القليب اللي عميق مجمّه ... ما سرّ غرسه ماه عطشى سوانيه
سم السبب يا عارفن عنه سمه .. . سم السبب يا عارفه قبل اسميه
والله يا لا لا كلمة قيل ذلّيت .. . لاترك مقاصى اللاش نقص و مهونة
لا شك ضرّاب المثل به تقدّيت .... من حرّك المجنون ناطح جنونه




===================

وهاذي بعض المقاطع

يا بنت ياللي عينها عين شيهان .. . حرّ قطامي فعوله عطيبه
والقرن ذيل اللي تشعشع للاكوان .. . بنت الاصيل اللي طويلٍ سبيبه
و الردف يطوي الثوب و العود ريّان ... و الخد بارق مزنةٍ مستجيبة
أسايلك بالله خلاق الانسان . .. الله عليتس انتي من أيّا عتيبة ؟؟؟

------

يا زين فنجال على نومة الناس .. . زرع اليمن و اللي مسوّيه عيده
يبري العماس اللي فضى خوتة الراس ... روابع يقفي و يقبل بريده

----
يا بنت ياللي عمرها صدر و ردوف . .. بيض محاجرها و حلو نباها
ودي بشوفك مير يوم اقصر الشوف .. . عيني بعد هاك الرمد قل ماها

ماني وانا بندر بهيسن ولد هيس ... هيسٍ يدنع عند حرمة قصيره
ليا بغيت اجلس ترى لي مجاليس ... وليا بغيت انهج دروبي عسيرة


ماني وانا بندر بهيتٍ ولد هيت ... هيت مقابل خمّةٍ يكرهونه
من كثر ما جرّبت وأقبلت و أقفيت ... قولة هلا من لا يودّك مهونة


ماني وانا بندر على درب الأنجاس ... اللي قريبٍ تفلها من لحاها
أنا بدرب الصيرمي عدم الأجناس ... زيزوم روق ليا تنصّت عداها


ماني وانا بندر بنصّاي جابان ... شوخ الجموس مناقرين الحليلة
ليا صار لي لازم نصيت ابو فيحان ... شيخ الشيوخ مكمّلين الجميلة


ماني وانا بندر براعٍ ولد راع ... انا الحصان اللي طوالٍ حباله
إبن سلايل خير من شالت القاع ... المصطفى الهادي وديع الرسالة



صوتي وانا بندر طويل ليا بان ... إن ما خشيت الرب ويش اختشي له
ما ينرمي قولن على غير نيشان ... و من لا يثبّت حجته ويش هي له



وهذا احدي ابياته التي قالها في الكويت عندما شاهد فتاه في الصف الثاني اعداداي

يا بجاد لو صادفت وِرعٍ صدفناه ,,, على طلوع صفوف ثاني إعدادي
ابو جديل يوم تدلج زواياه ... سبّاح غبّات مع الموج غادي
يمكن يصبّون الذهب من شفاياه .. والا بخده يزرعون الزبادي

إلى ان توفاه الله عندما كان متجها الى صديق له , خارج مدينة الدوادمي , حيث أحس ببعض الالام و توقف على الطريق ليرتاح , و كانت هي النومة الأخيرة
رحمه الله ..
وكان مواعد اخته من اسبوع يوديها الىالبر في اليوم الذي توفي فيه ولكن مشيئه الله كانت هي الاقرب

ارجو ان اكون قد وفقت في الطرح واعطاء هذا الشاعر جزء ممايستحق رحمه الله تعالى

[الاب الروحي]

مسفر لاهنت

نقل ممتع وراقي

اشكرك

ودعتك الله

[الشيخه]

خطو البخيل اللي يكبّر معمه = يقرا الكتاب و واجب الله مخليه
أما هرج له في رفيقه بنمّه = والا عطا و أمه تضيّع هقاويه
يا مل قلب كل ما مات همّه = دارت دواليب الدهر لين تحييه
فرّاق شمل الناس عيّا يلمه = وقتن يشيب الراس من شاية فيه
أحدن ينام و حط راسه بكمه= و أحد تخم النوم عينه و تخطيه
و أحدن يحاول بالردى بنت عمه= و أحدن يحاول ستر عذرا عوانيه

^
^
^
^
^

ماني وانا بندر بهيتٍ ولد هيت = هيت مقابل خمّةٍ يكرهونه
من كثر ما جرّبت وأقبلت و أقفيت = قولة هلا من لا يودّك مهونة

مسفر


اختيار رائع وغلبتنى فيه

من زمانى كنت ابحث عن كتابات لبندر بن سرور (الله يرحمه )


لاهنت على هذا الطرح


تقبل منى خالص التحيه


الشيخــــــه

[مسفر مبارك]

الأب الروحي أشكر لك مرورك لا عدمتـك .

[مسفر مبارك]

الشيخـه أمانـةً أسعدنتي مرورك وتشريفـك لي .

فدمتي ودام حضـورك .

تحياتي وتقديري لكي .

[مسعطر]

ابو مبارك .. صح لسانك و صح يمينك على الموضوع ..

والله يرحم الشاعر المبدع بندر بن سرور ..

اللي يقول :

متى يجي في نجد حسن التدابير=و يجي للصابرين إنفراجي
حكّام نجد اللي تهدم الطوابير=ينثر لها حب ٍ سوات الدجاجي

تقبل مروري ..

[مسفر مبارك]

أبتقبله ولي الشــرف يامسعطــر ويامرحبا ويا مسهــلا .

راكب اللي مخ رجليه خنزير و هوا . .. أشهب في مقدمه باقين و عكس تاج
متر في مترين مستبرم كله سوا .. . حايفه حطاب ما سمكره راعي الكراج
إن نعشته بالثلاثة مع اللفة عوا .. . عوي ذيب محتدينه مربية النعاج
ثابت ما يختلف كلما لف إنزوا .. . و ارتفع ثم ارتخى مثل طايرة المراج
كن ضرب المرو في الويل قدام و ورا . .. ضرب هملول البرد و ان تقفاه العجاج
منوة اللي مشفقن لهله و لهم نوا . .. من بعد طول المسافة يبي فلّة الحجاج



ول ول ول ول ول ول ول ول ول ول ول ول

والله ان الوصف شيّب راسي

عزالله اني دشيت جو مع قصايده ..

صح الله لسانك ولاهنت جعلك تسلم

بيض الله وجهك على النقل ياغالي

[الغروب]

مسفر مبارك ,,,,, يعطيك العافيه على ماقدمت

[الفرس]

الله يرحمه ويسكنه فسيح جناته ..


اما متنبي .. متنبي ..

لاهنت على ماقدمت ..