غصبٍ عن اهل الحقد واهل الظليمه
باذب راس طويق واشب ناري
ياللي صعودي في نظركم جريمه
سهلٍ صعودي بس صعب انحداري
اهل النفوس المبغضات السقيمه
ماتدري ان الذم يرفع وقاري
اذا لحقني من بعضكم نميمه
بقول داري لو ماني بداري
كثر الحكي غيمه وبتمر غيمه
والا عساه يطول وقت انتظاري
واعلم العذال معنى الهزيمه
لان اهزمان اعداي عز انتصاري
تدرون متى اشوف للعز قيمه
لا شفت بعيون الحقير احتقاري
ادري الصحاري ترتجي غيث ديمه
وانتوا اعرفوا الديمه و منهو الصحاري
ما يهز باسي كود دمع اليتيمه
ولاهو يقوي عزمي الا قراري
وما للخصيم الا ملاقى خصيمه
خصم وخصيم وواحد يروح باري
دام الخساير ماتحسب جسيمه
واغلى من بنود السجل التجاري
خسارة العذال عندي غنيمه
يوم استشار الراي راي استشاري
اصغر بني عمي عيوبه عظيمه
اصون عيبه مثل صوني لجاري
سلم لنا منذ العصور القديمه
وللطيب في وجيه النشامى مواري
ماهمني كيد النفوس اللئيمه
لاني بلا بايع ولاني بشاري
الراس طيب والنوايا سليمه
وما مدته يمناي يجهل يساري
والله يمد ومدة الله كريمه
ومن مدته بامد حسب اقتداري
واهل الحشيمه تستحق الحشيمه
والا انت ما جالك على البال طاري
لا فيك معروفٍ ولا فيك شيمه
ولا انت بعلى بعض المواجيب ظاري
ان طعتني خل النهر لا تقيمه
يصعب عبوره لا غدى السيل جاري
وسوس لك الشيطان نفسٍ وهيمه
تامرك بأشين ما نوى الانتحاري
غريمي الشيطان وانا غريمه
ما اجي على رايه وعذري اجباري
امشي على درب النقا واستقيمه
هذا المسار ولا لي الا مساري
عزيت نفسي عن سفوه الذميمه
واخذت حقي برغبتي واختياري
والعز خيمه والحكي طنب خيمه
ابسط مثل جابه فضول ابتكاري
واخذت من صبري جهود وعزيمه
ولا اهل دمعي في لزومي عباري
وردت شفي والنوايا مقيمه
وعشيت طيري من قلوب الحباري
والناس تفهم وافهمي يا فهيمه
عن زلتي ما ابديت وجه اعتذاري
وان كان دمعي طاح لاجل اليتيمه
باموت ماشافوا دموع انكساري
بس الجريمه صدق واكبر جريمه
اني ادور من يرد اعتباري
غصبٍ على اهل الحقد واهل الظليمه
ذبيت راس طويق واشعلت ناري