محاوره بين شايب وعجوز

[راكان اليامي]

الشيبه:

قلبي شباب ولازم اني اعرّس .. مابا العجوز اللي اتوسّد على الباب
الخير واجد وانا ماني مفلّس .. عندي فلوسٍ تدعم البنك في الحساب

العجوز:

ما باقي غير خشمك وهالضرس .. تبغي تعرس وانت غادي شالغراب
قابل صلاتك الله يشفيك م المس .. والاّ ترى باطب وجهك بالتراب

الشيبه:

إنتي عجوز وأكلك الروب والخس .. اما انا ماكل سوى تكه و كباب
ما فيني سكر غير ضغطي نازل بس .. دام الهوى فيني ترى كل شي طاب

العجوز:

لا بارك الله فيك يا الشيبه يا النحس .. ما تجيبك الرمسه ولا يجيبك اعتاب
قصرلي صوتك مابا اسمع ولا حس .. عطني طلاقي وانقلع واقبض الباب

الشيبه:

دومك نحيسه وذا لسانك يبا قص .. ربي ترى حلل لي اربع بالكتاب
هذا خميس الاعمى يا كم عرس؟ .. مرتاح في الدنيا بل اهم واعصاب

العجوز:

بطران وراسك كالصخر يابس وعص .. مالوم طبعك يوم ربعك هالكلاب
غادي شرا الاريل.. ودومك اتحيّس .. استح على وجهك.. أصلع ولعاب

الشيبه:

فكيني من وجهك ترى مالي أي نفس .. زهقان من شوفك وابغي لي أحباب
هذا طلاقك طالقه اربع وخمس .. شلّي طلاقك من ضميري بلا احساب

العجوز:

مشكور يالشيبه ومن دون أي دس! .. عندي حبيب ما ابتعد لحظه وغاب
يشريك ويبيعك تراه ابثمن بخس .. ما تسوى ظفره .. حلوٍ اسمر وجذاب

الشيبه:

يالله قبل لا موت منك واغتص .. طلعتي لي قرنٍ وراسي بعد شاب
يا شينه البرقع ترى قدرك اختس .. عيوز ولك في الدنيا خلان واحباب

العجوز:

مثلك تراني وهذا لك في العمر درس .. لاني أميز بين شيبه وشباب
والا نسيت اني على الموضه ألبس .. ما علموك اني بلا شيله وحجاب

الشاعر: سيف الظاهري