ياكشخه ماتمت ...!

[ملكعه بس غير]

السلااام علييكم ورحمة الله وبركاته
اسعد الله صباحتكووم ومساائااتكوووم وكل حياااتكووووم
والله انا ماكان لي نيه اكتب موضوع اليوم بس اني قايمه من فجر الله وشبعانه نوم وتو جيت للمنتدى وشاركت كم مشاركه الين حسيت ان ماعاد فيه موضوع اشارك فيه
وانا كان عندي سالفه بس كنت مأجلتها لبعد العيد لاني طول شهر رمضان راح اشوف ويتكرر علي هذا الموضوع فكنت ناويه اقوله بالعيد علشان يكون الموضوع اشمل << مشتقه من شامل للمعلوميه
بس لقيت اني فاضيه ولاعندي شي شاغلني الله لايشغلني الا بطاعته قلت مافيه الا اني اسرد سالفتي :angel:

السالفه ياطويلين العوومر السلاامه هي مختصه بالنساء واتمنى تكون ردود فعل البنات بموضوعي هذا مو مثل دايم مايرد علي الا راعية الذود وشيخه الغيد الله يذكرهن بالخير وابيكم تشاركوننا بأي سالفه تتعلق بموضوعي اليوم
"" ادري طولت بالمقدمه بس لزوم التشويق للموضوع :D "
سالفتي هي ظاهره لاحظناها على بنات حوا في الاونه الاخيره وقد انتشرت وتفشت بينهن يابلفيت ان حنا كووول ونعرف وشلون نكشخ << تضارب لهجات :zip:
الظاهره هي المووضه اللي صارو بناتنا وحريمنا الله يرد لهن عقوولهن يتبعونها بدون تفكييير ولا عقل
يعني حنا يمكن يالبنات نشوف شي اكثر منكم يالشباب خصوصا بالعزايم والافراح والمناسبات وحتى في الاماكن العامه
تجي الوحده لابسه مزلط وخصر واطي ومدري وشو والسبب موضه :sad:
تجي الوحده لابسه عبايه مخصره ومفتوحه من الصوبين ومابقى لون الا وناقشته فيها << ومنافسه قويه ترى بالعبي كل وحده تبي تطلع عالثانيه وليه كل هذا موووضه :sad:
هذا بالاماكن العامه
نروح للتجمعات النسائيه الخاصه
تجي ام عيال وش كبر عيالها وبنت حموله وبين حريم وعجايز ولابسه لي تنوره قصيره ولا برمودا << وربي اني استحي لاشفت هالاشكال والسبب مووضه
اما المووضه اللي خلتني افكر اني اكتب هالموضوع وخلتني اعرف انهم يوم قالو النسوان عقوولهم صغاار صدقووو شيٍ يهول
وصلت فيهم بالتقليد واتباع المووضه على كلامهم
طلعت طريقه نمص للحواجب وتدرون وش اسمها ؟؟؟؟








حواجب شيطانيه :sad:
وصلت فيهم يتشبهوون بالشيطان
مو كافي انهم يقلدون الكفره الفجار قامو يتشبهون بالشيطان
وتجي مبسووطه ومستاانسه انها مسويتها << والله من الغباء المستفحل اللي فيش
لاحول ولاقوة الا بالله :cry:
انا يوم كتبت هالموضوع ماني ضد الموضه او ضد ان البنت تكشخ "" اذكر قريت موضوع لواحد من الاعضاء الله يجزاه خير يقول ان كلمة كشخه مهيب زينه بس شسوي مالها بديل :D""
لا بالعكس الوحده تلبس وتكشخ لكن بعقل وحنا مشكلتنا التقليييد الاعمى بدوون تفكير اشوف شي حلو على فلانه البس مثلها حتى لو مايناسبها لييه ياربي انتي كذا تشوهييين نفسش زياااده مافكرش مشوه
يعني الوحده تلبس بس تحترم نفسها وتحترم اللي حواليها وتلبس شي لعمرها اما تجي وش كبرها ولابسه قصير و برمودا وش خلت ذي للبنات الصغار
واذا كان بنفسها انها تلبس كذا تلبس في بيتها عند رجالها عالاقل محد بينقد عليها
إيييييييه وتذكرت بعد فيه عدسات الجني << من اسمها تنعاف :D
هذي تجي حمر وتصير عدسه العين مومدوره لا تجي صدووع << وربي وصفها بس يخلع وشلون عاللبس
وللاسف الظاهره هذي منتشره بيننا يالبدو بالحيل وهذا اللي يحز بالخاطر
علشان كذا بقول كلمتين ولااحد يزعل منها
يالرياجيل ان شفتو حريمكم يسوون كذا اطردوهم << تحسون جابت العيد صح :D
ويالحريم الله يفتح بصيرتكم وينور قلبوكم وعقلوكم وتميزون بين الزين والشين :cry:

وتراني ماقلت هالكلام كره في بنات جنسي لاوالله ابي لهن الزين
وعتبي بالموضوع كله على النسوان اللي مخلفات وعليهن عيال وهذي سواياهن ولا البنات توهن طايشات بس بعد ماهن معذورات
واسمحو لي عالزلات لاني كتبت الموضوع ونزلته من غير مراجعه :D
وترى تعبت يالله اخترت لون لااحد يعذربه
[fot1]ومبارك عليكم الشهر [/fot1]
واللهم اني صايمه الله لايعاقبني ان كاني اذنبت بحق احد
< ضميرها يعاتبها وشلون قلبت عالنسوان وشيشت الرياجيل عليهم
بس انشاءالله محد ياخذ على كلامي الا اللي بحاجته يعني لااحديروح لحريمه ويقلب عليهم ويحرم كل شي لا خلكم سنايديه :D
وفكرو وش اللي يحتاج تغيير

كلام ماله خص بالموضوع :D
في بعضهم يعلقون على كلمة رياجيل يقولون ليه ماتقولين رجاجيل
انا اتبع منهج الوسطيه بالحياه :D
يعني ماخذه من البدو والحضر يعني لاهي بيرجاجيل << ثقيله علي
ولاهي بريايل << ياشينها :sad:
رياجيل حلوه وخفيفه
وبانتظار ردودكم

[الوافـي]

يالرياجيل ان شفتو حريمكم يسوون كذا اطردوهم
ويالحريم الله يفتح بصيرتكم وينور قلبوكم وعقلوكم وتميزون بين الزين والشين

هذا زبدة الكلام بعدين المرأه انقياديه لازم تكون تحت تصرف رجال والاشياء هذي الي صايره سبب عدم الرقابة على المرأه وتكون هي مسوؤله عن تصرفاتها والرجال يجي ياكل وينام بس و المرأه بحد ذاتها ضعيفه اذا ما فيه احد انتبه لها و صار يحاسبها طبعاً بالشي المعقول بتسوي كذا و اكثر وهذي الاشياء مخالفة لتعاليم ديننا الاسلامي و في حريم ماشالله عليهم نشوفهم في الاماكن العامه لابسين عبايات ساترة
ولاتزعلون يا بنات بس هذا الصحيح
والله يحفظ بنات المسلمين و اولادهم

مشكــوووووووره اختي ملكعه على هذا الموضوع الذي يستحق الاهتمام
وجزاش الله خير

[فيصل أل هتلان]

بصراحة موضوع يتكلم بخصوصيات النسوان . يعني المفروض مالي اني مارد علية .
بس تعرفون حب الاستطلاع .

الاخت / ملكعه

بصراحة موضوع رائع وجميل وكلامش في محالة ولكن للاسف مثل ماقلتي حتى العجايز قدهم يمشون ورى المووضه
وشووف عيني انتي كل مانزل شي جديدة والله انش وراى

وبالنسبة لكلمة رياجيل او رجاجيل .. هي تنطق بالصحيح الرياجيل واصلن كلمة رجاجيل ماسمعتها
الا من اهل الكوويت .


وتقبلي تحيااتي . يالمـــــــارج

[ملكعه بس غير]

قطنان يامال العافيه وكلامك في محله وتشكر عالتعليق
نورتنا فديت روحك

[ضيدان بن مترك]

	[ ياكشخه ماتمت ] ألأخت..ملكعه وبس..أولأ .ألشهرمبارك عليش وألله يعين ألجميع علي صيامه وقيامه. ومشكوره علي ألموضوع ألرائع ومايحمل في طياته من ألنقد ألأ أنه ألحقيقه يعني ألنصح وألعظه وألغيره علي بناتنا وألخوف عليهم من عذاب ألله ثم شرورألبشر ألله يكفي ألجميع شرورأنفسهم وشرورخلقه أمين.ألله لأيحرمك ألأجروألثواب.....

[ملكعه بس غير]

عزوه هلا بك
وبالنسبه للموضوع صحيح انه يخص النسوان بس بالعكس ليه مالك تشارك فيه
مو يقولون المرأه والرجل يكملون بعض يعني لازم تبدي تعليقك وتشارك وتقول رايك
ومدام ان تعليق ممكن مايفيد بس ماراح يضر
وترى يوم تقول كل مانزل شي رحت وراه صادق بس يكون مناسبني اما اني البس شي مهوب لي لاوالله ماصدقت انا مع الموضه بس بعقل مو بخبااااااال
وحياك الله

ايييه نسيت اللحين انا تقول عني مااارج
عالعموم علشان رمضان ماني قايله لك شي
بس ماعليك زود يالفاهر :D

وترانني زعلانه اجل تسعطش نفر يجون فيذا ولايردون علي
بس ماعليه قطنان وعزوه يكفون ويوفون ويامال العافيه يالربع بيض الله خششكم فديتكم
اسعدتوني

[ملكعه بس غير]

هلااا غالب
والله اني استنكرت يوم ماشفت لك تعليق ماهي بعوايدك
بس ماخيبت ظني فديتك
وتسلم على مرورك
وجعل الشهر علينا وعليك يتبارك
ويسمع منك ويهدينا ويهديهم

[فيصل أل هتلان]

الاخت / ملكعه

شفتي اني صادق مالي داعي ارد على الموضوع بس من باب الفضوول رديت .
على كل حال زانت علوومي .

تقبلي تحياتي .

[انفاس الورد]

يزاج الله خير
اختيه ملكعه

فديتج انا

كلامج وايد موزون
ونا معاج
الوحده تلبس بس تحترم نفسها وتحترم اللي حواليها وتلبس شي لعمرها
ومب كل موضة نركض وراها
وما اقول غير :

الله يفتح بصيرتنا وينور قلبوناوعقلولنا ونميز بين الزين والشين

[ملكعه بس غير]

عزوه مافهمتك
وش اشوف يعني ؟؟؟
وليه تقول ردك للفضول
ياخي لاتتنح اقرى ردي الاولي