مرحبآ ،
كانت حبيسة الادراج ،
اتمنى ترتقي لـ / ذائتقكم
ما ذبحني غير شوفة طلّتك بين المرايا =وما جرحني غير زلّات الزّمان وطعنتينه
طعنةٍ من قلّة التوفيق صارت بالحنايا =وطعنةٍ سبّة خفوقٍ باتت احلامه سجينه
الهوى اللي كل ما لدّت عيوني للبرايا =حط له في نون عيني قصّة الرحله حزينه !
ايه احبّك يا عيون اللي تحبّك والحكايا =خلّها تشبه بعضها ، نبعها زود الغبينه
الواشي اللي قد خسر قصّة هواه من الوشايا =مو ضروري كلّنا نخسر قصصنا لاجل عينه
في غيابك ليت تقدر بس تناظر في سمايا= تبكي كل نجومها والبسمه بيدينك رهينه
الغياب اللي خذاك بعيد سبّب لي عنايا =في المدينه وكنّي لحالي ما كنّي في المدينه !
كل ما قلت : [ القمر بيجيب علمه والتحايا ] =مد لي مع نوره ذكرى ضمّها في راحتينه
ليتني لا من سهرت الليل يتحقق منايا = وليت كل مديون لا غنّيت يستوفي لدينه !
من خذا روح وخفوق وفوقها بسمة شفايا = ليه يومٍ غاب ما رد الثلاثه للامينه ؟!
يدري انه لو يغيب سنين ما احتاج لوصايا = حشمتي لغيابه تشبه حشمته لوالدينه
مو مهم يغيب صوته ، دامه احساسه مدايا= ودامني اسمع صدى صوته يلبّي لكل [ وينه؟ ]
لو اقول اني قريت الوقت يبقى به خفايا = لو كشفنا ما كشفنا تبقى اسراره دفينه
الغدر عمّر ولا هو خايف تمرّه المنايا = دام به من باع قدره لاجل يمد إله بسنينه !
والقلوب اللي تعيش بصدق ونظاف النوايا ؟ = لونها الابيض كفن عند النّذل ونفوس شينه
يا عيون الكون صدّي هذي احلامي عرايا =ماتت امن البرد غير البرد ما ترحم يدينه !
الى متى والحزن ينسج في حياتي له خلايا ؟ = والى متى تجمع خدودي دموع عيني جمع زينه ؟!
يا قصيدي ارسل لمحبوبي شوقي له سرايا= وعلّمه بان الهوى ما مات من بيني وبينه
وعلّمه بان الفراق اهداني بغيابه هدايا = [ دمع ، وشوق ، وحظ لامن طاح ما يلقى عوينه ]
وعلّمه باني انتهيت ولا بقا فيني بقايا = والليالي لا بكيت ؟ بدمع عيني مستهينه !
وعلّمه من صارت الغيبه اختفا برق الثنايا = كنّها مسجونه خلف شفاهي بسجونٍ حصينه !
وعلّمه بان طيفه صار يحل في كل الزوايا = كنّه يحط حد لعيوني ، وانا عيوني ثمينه
ما تلد الا لشوفه دام شوفه هو هنايا = وما تضم يا كود زوله وضاع مفتاح الخزينه
وان خذا الاشواق والاحلام لوصالي مطايا ؟ = مرحبااا من [ قلب صادق ] ، وارتميت بساعدينه
لكم