سوااالف وخيــــر .. !!!

[محمد الشامري]

السلام عليكم ورحمة الله وبركاته

مسيكم بالخير يالربع

الموضوع هذا عباره عن مساحه خاليه للسوالف ..
اللي عنده سالفه اي سالفه كانت (( مضحكه .. عاديه .. غريبه .. مخيفه ))

يذكرها لنا ..

ويصير ذا الموضوع مثل المجلس اللي تدور فيه السوالف الزينه ..
ونبي تفاعل من الاعضاء مع اي عضو يذكر سالفه لنا وياليت الجميع يشارك معنا .. وناخذ منكم السوالف الزينه ..


وانا بكون أول البادئين ..


هاذي طالة اعماركم جميع سالفه صارت لي قبل سنتين تقريبا او اقل بشوي كان اول يوم العيد في الليل .. آآخر الليل
كنت انا واخواني اثنين عبدالله اكبر مني وحزام اصغر مني .. (( يعني انا اخيهم الابيض المتوسط )) ..
المهم كنا رايحين للوادي .. وكانت الساعه تقريبا وحده او ثنتين في الليل ويوم تعدينا ملف ام ربيعه (( هجره في الوادي )) تعديناها بـ خمسه كيلو تقريبا..لقينا سيارتين واقفين على جانب الخط وسياره ثالثه مسويه حادث .. الحادث بسيط السياره داخله في البر شوي .. يعني نزل من الخط ودخل البر ورقى له نصلتن صغير (( نصله = طعس صغير جدا )) ..

المهم وقفنا حنا .. ونزلنا لقينا السيارتين .. سياره فيها اثنين شباب والسياره الثانيه فيها رجال كبير شوي مطوع .. اما السياره اللي مسويه الحادث فيها رجال ومرأه.. الرجال منسدح على فرشه والمرأه قاعده عند راسه ..
جينا وسألنا الشباب والمطوع .. وش السالفه ؟؟ قالوا ماندري نسأل الرجال مايرد علينا ماندري هو طيب والا لا .. والمرأه قاعده بس انها ماتتلكم ولا ترد علينا حتى ..
في اللحظه هاذي قالوا الشباب الثنين حنا عجلين وبنمشي .. وراحوا
دقينا حنا على الشرطه قالوا بنجي ذلحين .. المهم قعدنا نسأل المرأه زوجش طيب ؟؟ انتي طيبه ؟؟ فيكم شي ؟؟ وشلون صار الحادث ؟؟ والله يالربع انها ماردت علينا ولا بحرف واحد والرجال نفس الشيء .. الرجال ماغير ماسك في يده تريك (( بجلي .. ليت صغير )) ويوجهه في وجيهنا بس ولايتكلم ولايرد ..
حنا قلنا اكيد انهم منصدمين من الحادث والا شيء..
المهم .. الشرطه ابطوا علينا جدا .. وكلمهم عبدالله يقولون حنا ماندري وين محلكم .. قال عبدالله انا جايكم ذلحين .. وركب السياره وراح ..
بقى من ؟؟؟ انا وحزام والمطوع .. واقفين عندهم بس بعيد كم متر كذا
شوي ماخذينا الا يوم صاحت المرأه .. صيحه وحده قصيره بس بصوت عالي . التفتنا عليها وجيناها نجري وش صاير وش قومش ؟؟ .. ماردت علينا ..
والمرأه شكلها يخوف قسم بالله مهوب باين منها ولا شيء لا ايدينها ولاعيونها ولا شيء ولاشيء ..
المهم .. المطوع قال انا عجل ووراي دوام مدري وين بعيد وبروح عشان يمديني الحق ..
وراح وخلانا ؟؟ !!!

قسم بالله بلا انا وحزام واقفين في الخط كذا مع ذا الحادث الغريب ..
المهم.. شوي قام الرجال اللي كان منسدح ولايرد علينا ولايتحرك .. قام قعد وحفر في القاع وحط شيء ودفنه وعود وانسدح مثل ماكان ..
شوي جا عبدالله والشرطه .. ومعهم الاسعاف
يكلمووونهم يحركوونهم يحاولووون فيهم ... لابدن ولاحركه وولاكلمه والله ان الاسعاف يشيلون الرجال كنه ميت .. وهو قبل شوي قام وقعد ودفن شيء !!!
المهم يوم راحت الاسعاف وفيها الرجال والمرأه قعدنا حنا مع الشرطه وعلمناهم باللي صار .. وقعدنا ندور في مكانهم ولا لقينا شيء ..
ويوم برقنا في سيارتهم لقينا كل بيبان السياره مفتوحه !! وحاطين لهم فرشه في القاع !! وعندهم عصير ومكسرات ومدري ويش !!

واحد مسوي حادث بيقعد ينزل فرشته ويقعد يشرب عصير ويأكل مكسرات ؟؟!!!


المهم ان حنا والشرطه ماقدرنا نوصل لتحليل مناسب .. والحادث ذا لين اليوم عجزت الاقيله تحليل او عذر للي صار ... انتوا عندكم ؟؟؟