توبة العوني - يا الله يا والي - إلقاء الشيخ عبدالعزيز الأحمد

[ابومحمد الشامري]

قصيدة التوبة للشاعر الكبير : محـــمد بن عبدالله العوني , رحمه الله ,,

يا الله ياوالي على كـل والي=ياخير من يدعى لكشف الجـليله
المالك المعبود محصي الرمالي = الكون والدنيا ومـابه فهي له
ما كان به أول وماكان تـالي=ملكه يدَبّر به على مايـجي له
يمضي ويقضي قادر ٍ مايبالي = والخلق ما تفعل بلا أمره فعيله
ماله شريك جل فوق متعالي=علمه أحــاط بدقها والجـليله
اشهد فلا غيره إلـه ِولالي =ربٍّ سواه أخشاه وأرجي لنيـله
ياواحد ٍ فوق السموات عالي =من سطوته كل الخلايق ذلـيله
يافارج الشدة بضيق الحوالي =إفـرج لعبدك يامنجي دخيلـه
وإنظر بعينك يابا الأفراج حالي =فرد ٍ غريب والمصاغي قليله
وحيد مالي غير ظلك ظلالي =ذليل مالي غير عـزك وسيلـه
ياراحم إرحم شيبتي وانخذالي =ياجابر أجبر عثرتي والفشيلـه
وألطف وناظر يالولي في سؤالي = لاتواخذن فيما مضا من فعيله
لاأخوان لاعمّان لامن خـوالي =ولامن صديق ٍبالورى نشتكيلـه
لو كان مايجلى سواء الله جالي= ما شفت عبد ٍ هرجته لي جميله
تقطعت وذم العرى والمـدالي= من جملة الخلان والمستخيلـه
وقضيت من المخلوق ماحد ٍ بقالي= إلا أنت ياللي ما يخلي عميله
عادوني كل الناس شرق وشمالي=ولا بقا غيرك ذراً التجي لـه
شافون مذلول ٍ وحيد ٍ لحالي= ولا لي من الفزعات مومي شليله
وأنا بعون الله قويه حبـالي=متجود ٍ بحبـال منشي المخيلـه
لو كان كلٍّ له صديق اموالي= اقـراب واخـوان و اللّـي قبيلـه
أنا لي اللّي زابنه مايسـالي=جزل العطا مبري الجسوم العليلـه
اليا دعــوا حبانهم فزّ بالي=رفـعت طرفي له وقمت اشتكي له
والى تنادوا بينهم للّـنوالي =نـاديت باسـمك يامنجي دخيلـه
ومن لاذبك ماصار بالضيق تالي =يصير الاول لو اعظامه هزيلـه
أنا دخيـلك ياعـزيز الجـلالي =حاشا كرم جودك يضيّع عميلـه
بريت من غيرك بحالي ومـالي=وزبنت أنا بحماك عن كل ميلـه
من شـر خلقك لايـذٍ بك ولالي= غـيرك ملاذ ٍ شامخ ٍ ينعني لـه
يارب مالي غـير جدواك والي=وان كـان خليتن فـلالي عقيلـه
يا عالم ٍ بالمخطية والعـدالي= تشوف مالي غير عـدلك وسيلـه
فـلا تواخذني بماضي افعالي=يا سـاتر العورات مضفي الجميلـه
لو كـان ذنبي راجح ٍ بالجبالي=عفوك عظـيم ليس ذنبي عديلـه
أطلبك تقبل توبتي عن خـمالي= وأطـلبك عني كـل كرب ٍ تزيلـه
وأطلبك تغفرلي وتصلح عمـالي=يـا مزبن الخايف إلى باد حيلـه
مـولاي لامنجـا ولا ملتجـالي= إلا انـت يـاللي مايـذير نزيلـه
يافزعة المظـلوم منشي الخيالي= يا فارج الشدات لو هي ثقيـله
أفرج لمن بالحبـس دونه رجالي= وأقفال بابواب ٍ وحصن ٍ طويله
في وسط دباب ٍ غريب ٍ لحالي= أظلم ولادري وش نهاره وليلـه
متروك مالي من يرد المقالي=لاحـد ٍ يبي قولي ولا أحد ٍ يشيله
ولا واحد ٍ غيرك عليه إتكالي= إلا انـت يامـنجي دريك الدبيلـه
مـادام تنظرلي وتسمع مقالـي= ماخـاب عبـد ٍ يدري انك وكيله
ياسـامع ٍ بالليل حس النـمالي= و"يونـس" سمعته بالبحور الطويله
الماء وضرب الموج مثل الجبالي=فوقه أجيبـت دعوتـه وتهليـله
يامصرف الأيام هي والليـالي=في قولته "كن" يجري القلم بتعديلـه
ادعوك بـاسماك العظـام الجزالي = وابحق نورك والفعال الجمـيله
وابحـق مـانزلته اول وتـالي=تجيرني من شر خلقك طويلـه
وتزيل كربـات ٍ علـينا ثقالـي =تغطلست مـالي سوا الله دليلـه
آمن على قلب ٍ يجول اجتوالي=يا مسكن اللوعات سكن جفيلـه
أسـرع علينا يا قـريب النوالي =لا تجعل الشده علـنا طويلـه
يافارج الكربة بضيق الحـوالي = أومـر لعبدك بالفرج وتعجيلـه
وإجـل الأمور المعضله والجِلالي = عني وكل مسلم ٍ يندعي لـه
وصـلاة ربي عـد رمل السهـالي=على نبي ٍ وضح الله دليلـه
صـفوة قريش اللي مشى بالعدالي=نبينا المعصـوم عن كل ميله

[حبيب]

في وسط دباب ٍ غريـب ٍ لحالـي
أظلم ولادري وش نهاره وليلـه



ابو حمد لاهنت على نقل القصيده المشهوو (التوبه)لمحمد العوني

ولاهنت والله يرحم العوني

[ابومحمد الشامري]

مرحبا الف بالاخ العزيز حبيب لا هنت على التعقيب ما قصرت يا السنافي

[العوووود]

لاهنت يابوحمد وصح اللسانك ولسان الشاعر وبيض الله وجهك على النقل الطيب

[ابومحمد الشامري]

مرحبا الف بالاخ العزيز العووود لا هنت على التعقيب ما قصرت يا السنافي

[saad]

في وسط دباب ٍ غريـب ٍ لحالـي
أظلم ولادري وش نهاره وليلـه



ابو حمد لاهنت على نقل القصيده المشهوره(التوبه)لمحمد العوني

تسلم يابوحمد

[الخليجي]

يا سلام ,,,,,,,,,,, قصيدة واداء ممتاز


لاهنت يابوحمد

[ابومحمد الشامري]

مرحبا الف بالاخ العزيز سعد ولا هنت على التعقيب ما قصرت يا السنافي

[ابومحمد الشامري]

مرحبا الف بالاخ العزيز الخليجي لا هنت على التعقيب ما قصرت يا السنافي