(ســـوالـف ..مــتـجـدده)

[مواطن عادي]

(سوالفي مع صديقي الشايب)

سألت واحد من الشيبان الجماعه
وقلت له تروح معي للبحر

قال لي :معصي روح الحالك الا ان كانك بتروح للبر تراني خويك

استغربت من رده وذبحني الفضول وسالت ليش وش اللي في البحر
يخليك تقول هذا الكلام ؟؟

(بيني وبينكم قالت اكيد فيه سر ولازم اعرف السبب )

قال لي موضوع احتفظ في نفسيه مقدر اقوله لك

(انا الصراحه تشوقت اني اعرف السبب اللي مايخليه يروح البحر)

وجلست لحظه افكر وقلت له :انت خايف من البحر!!!ابي استثيره على شان اعرف السبب )

قال :لا,,,ماني خايف من البحر اخاف من شي ثاني

(الصراحه زاد فضولي من رده وقررت لازم اعرف الموضوع)

قالت له:علمني يمكن استفيد من خبرتك وخبره سنين عمرك لانك ماشاء الله عليك حكيم وعارف

(صرت امدحه على شان يعلمني )

قال لي :بعلمك بس لاتقعد تهايط علي راسي وتمدحني تحسب انك بتضحك علي بشوي كلام مستهلك

(الصراحه صار وجهي اصفر من كلامه احس انه عرف اللي في خاطري خخخخخ)

المهم قلت له:سم تفضل كلي اذان(ن)صاغيه

قال لي:خايف لا اموت في البحر!!!

الصراحه زاد فضولي

(قلت في نفسي السالفه خطيره لازم اعرف السبب)

وقلت يعني اذا جاك الموت في البحر ولا في البر وش يفرق ؟؟؟

قال مع ابتسامه ساخره انا بقول لك شي وانت احكم

قلت تفضل قال: الموت مامنه مفر وكلن بيموت

(قلت في نفسي الحين الشايب بيقعد يتفلسف على راسي بس يالله بشوف اخرتها معه)


وكمل كلامه اذا رحت في البر وكلاك الذيب قالوا الناس الله يرحمة تصارع مع الذيب

يومن كامل وكلته الذيابه قالوا الناس الله يرحمة واتانسوا عياله واخوانه وربعه القريبين ,,

واذا الواحد راح البحر وطاح في البحر اكلته اسماك القرش واذا حطو لك عزا وانشدوا

الناس وش سبب موته قالوا كلاه السمك الصراحه يفشل عياله واخوانه وربعه

الحين انت وش رايك الحين وين ودك اروح للبر ولا للبحر؟؟قلت وش رايك اروح عند البل مبطين ماشربنا حليب الخلافات

ومن بعد السالفه هذي وانا ماادش البحر اقعد على الشاطي بس واحذف الخيط وانا

رابط حبل في السياره ورابطه في رجلي على شان ماتسحبني الاسماك في البحر

وتاكلني (الله يهدي الشايب خذا عقلي بكلامه )كل مااشوف البحر اتذكر كلامه يوم
يقول

(امحق مابه الرجال اللي تاكله سمكه)

الصراحه احس الشايب هذا انه

مشاني على كيفه كل يوم وهو رايح معي للبر







(انتظروا سوالفي ومغامراتي مع الشايب ...في الحلقات القادمه

[سراب]

في البداية.. مرحبا بك أخي الكريم في "أقلام المجالس"
##
مُعتقد الشايب فعلا غريب والله!
أعتقد إنه معطي شي أكبر من حجمه .. ويفكر بشي ممكن الناس مايفكرون فيه!
أهو أهم شي .. مادام الإنسان مورث عياله الدين والأخلاق الحميدة ..
مو مهم اشلون أو وين يموت
..هو مجرد رأي..
##
موضوع رائع
##
بإنتظار المغامرات الأخرى
ويعطيك العافية أخوي

[ملاذي]

اخي مجبور...!!

قد أضفت على الموضوع ...أسلوب المرح ...والحكمه ...بنفس الوقت....!!!

وقد ابدعت في سرد القصه الممتعه...!!


فقط...من القلب...!!

دمت لله أقرب..!!
أخوك...جلوي..!!

[مواطن عادي]

المشاركة الأصلية كتبت بواسطة سراب

في البداية..
حياك الله أخي الكريم بين أخوانك وأخواتك في مجالس العجمان
ومرحبا بك في أقلام المجالس
##
مُعتقد الشايب فعلا غريب والله!
أعتقد إنه معطي شي أكبر من حجمه .. ويفكر بشي ممكن الناس مايفكرون فيه!
أهو أهم شي .. مادام الإنسان مورث عياله الدين والأخلاق الحميدة ..
مو مهم اشلون أو وين يموت
..هو مجرد رأي..
##
موضوع رائع
##
بإنتظار المغامرات الأخرى
ويعطيك العافية أخوي

الله يحييج اختي وتسلمين على التعليق الطيب وافتخر في مرورج بما انج صاحبه قلم مميز واستفيد من تعليقاتج وتوجيهاتج
وكلامج كله صحيح
بس اعذروني على طرحي للموضوع لاني مبتدي
وان شاء الله اقدر اواصل الكتابه

[مواطن عادي]

المشاركة الأصلية كتبت بواسطة جلوي بن محمد بن جلوي

اخي مجبور...!!

قد أضفت على الموضوع ...أسلوب المرح ...والحكمه ...بنفس الوقت....!!!

وقد ابدعت في سرد القصه الممتعه...!!


فقط...من القلب...!!

دمت لله أقرب..!!
أخوك...جلوي..!!

مرحبا ومسهلا بك يابومحمد وتسلم على التعليق الطيب والمرور الاروع اللي يشرفني واتنومس به
لاهنت طال عمرك

[الغروب]

الاخ / مجبور

بقصتك الجميلة مع بيت الحكمة ( الشايب ) اضاءت مجالس الاقلام وكسبت قلمآ قادم

تميز بسلاسة الاسلوب وسهولة الطرح وموضوعية المضمون...

اتمنى لك التوفيق

[نطاحت الجيش]

السلام عليكم ورحمة الله وبركاته
اخي العزيز مجبور لاهنت علي الموضوع الطيبه

وسلمني علي الشايب الحكيم

[فرااااج]

لاهنت على القصه يامجبوور

وقل للشايب الواحد اذا ماكلاه السمك(على قولته) بياكله الدود اذا مات
والعبره في العمل الصالح وفي الخاتمه الحسنه



اخوك:فرااااااااااااااااااج

[&آهــــات الحــــزن&]

كـل الشكر لك اخوي مجبور على طرح هالموضوع الغريب بطرحه والغريب براي شايبه 00

كلن وله رايه مع تحفظى على راي الشايب الغريب شوي 00

ونورت اقلام المجالس باضاءتك الجميله وخطه قلمك الفريده 00

في انتظار المزيد من مغامراتك مع الشايب 00

[مواطن عادي]

المشاركة الأصلية كتبت بواسطة الغروب

الاخ / مجبور

بقصتك الجميلة مع بيت الحكمة ( الشايب ) اضاءت مجالس الاقلام وكسبت قلمآ قادم

تميز بسلاسة الاسلوب وسهولة الطرح وموضوعية المضمون...

اتمنى لك التوفيق

هلا ومرحبا بالاخت الغروب واشكرج على على التعليق الطيب لاهنتي