محاورة بين بوش وحاكم الصين

[صقر الشمال]

هذه المحاورة جرت في لندن على الكورنيش بين راعي واشنطن وراعي بكين على شرف راعي لندن بلير منظم الحفلة الذي كان يبغاهم يتسامحون اثر خلاف بينهما لكنه زاد الطين بلة
مما جعله يجلس على طرف(محايد) ويستمتع بقرمشة البطاطس بعدما ولعها حريقة..!!

وياليتكم شفتوا الضفوف....صف الامريكي بوش يتدربون على افلام ال action أما صف الصيني ابن زيمن فكانوا يستمتعون بلعبة الكونقفو اثناء شيل البيوت ...

والمعنى مدفون بين بوش وابن زيمن

لكن لايهمونكم .... جاهم راعي البل (صقر الشمال-محاكيكم) وسكتهم بقصيدة يحتفظ بها لنفسه
وسوف يعلنها لكم اذا استدعى الامر لذلك مع العلم أن بوش كعادته هو المخطي على ابن زيمن
والا الصيني مدبيها مايدري هي فيه والا فالخيشة يحسب أن المعنى على(الدنمارك)

جــــــورج بــــــوش
سلام رديه علـى حاكـم الصيـن
بالخير ياراعـي النظـام الشيوعـي

ياجيانق بن زيمن نبى معك قافيـن
والبرق عانه في المخايـل يزوعـي

جــايــنــق زيـــمـــن

يامرحبا ياقايـد الغـرب واهليـن
ترحيبتن ترضي غفيـر الجموعـي

البرق عانه يبرق يسـار ويميـن
يوم الرعد حدر السحايـب يروعـي

جــــــورج بــــــوش

ماجيتنـا ليلـة لفونـا المهنيـن
يومن واشنطـن تشـب الشموعـي

ليلة حكمت الكون في عام الالفيـن
جوني هل الطالات غصبن وطوعـي

جــيــانــق زيـــمـــن

ارسلت لك يابن النشامى خطابيـن
جت لك مناديبـي تبـارك فزوعـي

وانا حكمت الشرق من عام سبعين
ما اعلنت للحكام قبلـك خضوعـي

جــــــورج بــــــوش

انته تحسب الكون باقـي بقطبيـن
الراسماليـه وطـت كـل شوعـي

يانايم اصحى مرت اعوام وسنيـن
ماعاد فيها يابـن زيمـن رجوعـي

جــيــانــق زيـــمـــن

يابوش حنـا بالسياسـه ملميـن
ومن دون هيبتنـا بنينـا الدروعـي

ليتك تحل المشكله فـي فلسطيـن
عز الله ان ابـوك ماهـو طقوعـي

جــــــورج بــــــوش

ياجيانق انا طوفت وحده وثنتيـن
والثالثـه بتكـون بيـن الضلوعـي

الطايره وش علمها فالهـا شيـن
اللي لها بحمـاك حـول السبوعـي

جــيــانــق زيـــمـــن

الطايـره ماردهـا غيـر بكـيـن
جانـا يقالبهـا خبيـث الطبوعـي

وين احترام الانظمـه والقوانيـن
مثلك عن سلـوم الـدول مايتوعـي

جــــــورج بــــــوش

ماهيـب يمـك رايحـه للفلبـيـن
فوق المحيط الها نـزول وطلوعـي

مار اعترضتوا دربها يالشياطيـن
عز الله اني من سواتـك جزوعـي

جــيــانــق زيـــمـــن

يابوش يابن بوش تلعب على مين
ماهوب انا اللي بالكـلام مخدوعـي

يابوش وطتها في الارض الشياهين
كانت تجسس وهزعتهـا هزوعـي

جــــــورج بــــــوش

هات الادله كـان عنـدك براهيـن
يومك تقول ارخت علاك السموعـي

مخطين ياهل الصين منتم بمقديـن
وشيهانكم عـود غرابـن خروعـي

جــيــانــق زيـــمـــن

ركابها يابوش خمسـه وعشريـن
عسكر من الجيش النظامي نزوعـي

حاصرتهم يابوش بالجيم والسيـن
حتى خذيت العلـم منهـم قطوعـي

جورج بوش(( وهـو يضحـك)) ..

عينت طيارك غدا راسـه طحيـن
وامه علـى قبـره تهـل الدموعـي

الطايره ترجع لنـا بعـد يوميـن
اخـذ الكـلام ولاتطـول تعـوعـي

جــيــانــق زيـــمـــن

خل العلوم قصار واسمع لنا زيـن
عسكرك جولك يالسنافـي رجوعـي

والطايره لاعاد تنشـد لهـا ويـن
راحت ديه في واحدن مـن ربوعـي

[حبيب]

هههههههههههههههههههههههههههههههههههههههههههههههه

صقر الشمل صح السااااااااااااااااااانك ولاهنت على نقل المحاوره بين ذا الربع

وصراحه ان الصيني ماهوب هين شاعر

الله لايهينك وترى قصيدتك نبيها لازم تنزلها الللي انت قلت:D

[صقر الشمال]

حبيب

الشاعر المخضرم...............اشكرك على مرورك المشرف


والقصيدة انشد عنها ابن زيمن

[فهد بن محسن]

صقر الشمال


لاهنت على النقل

تحياتي لك

[صقر الشمال]

ابو فيصل.........شاكر ومقدر

[منصور]

صقر الشمل لاهنت على النقل
تحياتي