εïз اعشق سميك في البزارين ،،، وادعيه εïз

[يوران]

ماهو بكفو الوقت حبك يمحيّه=ياللي تخاف صروف الايام تمحاه
ارتاح ..مادام المواصل يقوّيه=انت انت..وانا انا..وقلبي هو اياه
حتى ولو بتغيب ذكراك تكفيه=ياواحدٍ تكفي عن الناس ذكراه
حبك على رملة خفوقي مواطيه=ورياح عذلني عنك ما تمسح خطاه
واللي يعذل القلب عن درب غاليه=الله بما يبلا المواليف يبلاه
اخفيه يابالفيت والحال يبديه=ادناة واحد ينظر الحال يقراه
مخفيه فيه ومعتني ٍ به وحاميه=من كل عين ٍ ودها تنزل حماه
قلب ٍ يحبك والهوى الذرب ماليه=كانك مكذبني ؟؟ بعينك تحلاه
شرط ٍ تشوفك فيه منت بحواليه=ويمكن تشوف ديار واماكن ارعاه
وبتشوف به تمثال والوقت هاريه=وبتشوف زرع ٍ ميت وواقفٍ ماه
وبتشوف جرح ٍ فيه سكين راعيه=راح ونسى السكين والجرح ينخاه
وبتشوف حصن ٍ عج الاقدار سافيه=وبتشوف باقي بيت راعيه خلاه
لا تنزعج هذا خفوقي وباقيه=ولا تضايق من تصدع زواياه
قد زلزله فرقا وهزت عراويه=والله ستر والحظ عانه وعافاه
وكانه صلح لك واعجبك زيد تبنيه؟=ابنه وجهز للمقابيل مبناه
ابغيك بس من المفارق تداريه=وازهل من يداري شعورك ويدراه
وحلل وحرم فيه يابرك بلاويه=وحلّه وراع رضاي ورضاك ورضاه
جعلك بعد بعض الوجيه ... امحق وجيه=ناس ٍ مراتعها الرفيق بتقفاه
انواع واخطر نوع ماني بناسيه=نوع ٍ على تفريق الاثنين مسعاه
تلقاه دوم وكل يوم ٍ تلاقيه=والى بغيته صدق ما عاد تلقاه
ولا انت ردك كل ما ادعيك.. لبيه=انشهد ان منتوا بفيعيني اشباه
منت بمع العالم ولا تقول لي.. ليه=انت ادرى مني وش جوابي وفحواه
كذيه... ومن الله يازين واليه=واغلا طروش القلب ودواه من داه
الحلم ياتيني بزولك واراعيه=وفي كل حلم اقوم قبل اتحفاه
اعشق سميك في البزارين وادعيه=واقبل خطاه الى اخطا واتلقاه
واسمك يروعني الى مر طاريه=واحب ملقوف ٍ يسولف وطراه
وامر بيتك من بعيد ٍ ولا اجيه=وانا لونه في يدي ما اتعداه
حتى (تواير) (موتري) تلتفت فيه=تبغي تلف ويستحي العقل والجاه
وصلك يخيط الصدر والبعد يفريه=ويابري حالي كان صديت برياه
ويلي على ادري حبنا ويش تاليه=وويلي على ادري وش ورى الغيب ويلاه
عشان اشوف اذا محبتك ..ترفيه=والله لا اقفي عنك....... استغفر الله

للشاعر

محمد بن حمد