اشعار الشاعر محمد بن فطيس المري

[روعه]

صبحكم الله بالخير

اول مشاركاتي وافتخر بهذه المشاركة وهي بعض من اشعار بن فطيس المري



قصيدة المرحلة الأولى
(( شطر حفظته ))


ماني بمن ياتي ولا يدري به ..
.. شطر حفظته ما اعرف كتابه

شطر يناسبني لمثل الليلة ..
.. واشوفني في ذا المكان أولى به

أبا اتكل بالله ونعم بالله ..
.. اللي مايوصد دون خلقه بابه

باقول واللجنة تقيم قولي ..
.. ومن كثرة الشعار ماني آبه

الحمد لله واثق من روحي ..
.. وإن كنت ذيب فالرجال ذيابه

ما أقول أنا أشعر واحد في العالم..
.. لكن قصيدي كفو وأنا أدرى به

الشعر جمعنا لو تفرقنا ..
.. حدودنا وظروفنا الغلابة

الله يبيض وجه راعي الفكرة ..
.. عز الله انها تنحسب لحسابه

والله يبيض وجه من يرعاها..
.. محمد الله يحفظه لأحبابه

محمد ولد زايد عريب المجني ..
.. ولي عهد الديرة الخلابة

الشعر تاريخ لنا من مبطي..
.. وإعلامنا يوم السنين نهابه

الشعر بيت والوزن عمدانه ..
.. معناه طنب وقافيته حجابه

الشعر واد فيه صيد واجد ..
.. وكل على الوادي يهج ركابه

والأفكار صيد وكل شاعر قانص ..
.. وكل يدسم شاربه مخلابه

أحد خياله حر .. وأحد وكري ..
.. وأحد خياله كوبج بقطابه

وأنا خيالي كل ماهديته ..
.. حول على الوادي وصاد عقابه

شاركت أمثل ديرتي وربوعي ..
.. وكل يمثل ديرته وأقرابه

والله الى الله راد والله قاله ..
.. إني لا اسلمها الفخر وكتابة

داري قطر .. وأنا هنا أمثلها ..
.. المجد مطلوبي وأنا طلابه

عهد علي إني لا اشرف داري ..
.. ترك صبي مايعز ترابه

شوفو دمي من حبها عنابي ..
.. وحماستي من ضوها شبابه

شاعر خليجي والعروبة بيتي ..
.. والبيت ما ياقف بدون أطنابه

وإن عودت بين القبايل فزعه ..
.. أنا اشهد إني في اللوازم لابه

لي في القبايل ربع .. واقدرهم ..
.. ماني بمنيجهل مقام اصحابه

وان عودت لأصلي .. فأنا اصلي مري ..
.. من صلب يام أهد القنا وخضابه

قوم لنا فوق المعالي بيرق ..
.. والسيف قوة سلته بنصابه

الشعر طوقني وانا طوقته ..
.. قمت أتمشى به وافك ابوابه

يا بنت ياللي تفرقين بعودج ..
.. ما ألومهم لو كثروا الخطابه

لامر بج دربج على خلق الله ..
.. قالوا كذا بالأصبع السبابه

زينج يزينه فعل ابيج وجدج ..
.. وإنتي بدورج للنقى كسابه

قومي تباهي بي .. وفلي راسج ..
.. عليج من ستر الشرف جلبابه

وإن ما سترتج بالفعول وباسمي ..
.. فعقبني النجال يا صبابه


وسلامتكم ،،،



باشو ردة فعلكم

اذا لقيت اقبال كبير باكتب لكم اكثر

[راشد العتل]

من روائع المحيط الهادي
قصيده جزله من شاعر جزل

ولاهنتي على طرحها ياروعه

[بـرجـس الظفيري]

شطر يناسبني لمثل الليلة ..
.. واشوفني في ذا المكان أولى به

أشـهد أنك أنت الأولى بـه والله ...

يابعد راسي كفييـت ووفـيــت

يـامحمد وتسـتااهل الملـيون


يابـيـرق الـشعر ..

والحمد الله تعبنـا مراح بـلأاش من التصـويـت وـشفناك .ماسـك الـبـيرق أرتـحنا ..والله ..كفوو يا بن فـطيـس ..

كـلمه إلى صـاحبـة الموضـوع ,,,

أنا أشـكر جـزيـل الـشـكر على نقـلك هللقصيده الي اكثر من رائـعه .

وتسـلم يمـينك على هنـقل. .

واانـا من ألناس اقوول ..
اذا عنـدك أي شـي عن محمد بـن فـطيـس ..
نوريـنا بـه ..

تقبلي مروري ..

بـرج ــس

[روعه]

اخي الكريم راشد العتل

شاكره مرورك ومشاركتك

[روعه]

اخي الفاضل برجس الظفيري

لا هنت اخوي على المرور

وفالك طيب ان شاء الله

انتظروا المزيد....

[بـرجـس الظفيري]

الله ـيسلمج ..

ننــتـظره ..

وبكـل شـوق


كونيـ بخيــر

\\
تقبلي مرووري

[روعه]

قصيدة المرحلة الثانية
(( في شاعر المليون ))



في شاعر المليون للشعر مضمار
والسابقة في الشوط تظهر بيدها

امضمرين أبكار الأفكار شعار
وكلن يحضر بكرته في وعدها

واللي تردت لا يدور لها أعذار
معذورة ما دام قد ذا جهدها

واللي تعوص وتضرب الحاجز يسار
تشل ف الدنة وترجع بلدها

وأنا ذلولي بنت صوغان الأشعار
من حبها عندي تفحم وحدها

إن جاره الله من تصاريف الأقدار
جاتك وجاك الجيش كله بعدها

الله عليها من مقاريد الأنظار
وصلت تحست ما غشاها زبدها

وتلقوفها بالعلم رمز وإشعار
وصفق لها منهو بعينه شهدها

ومن روبها أول ماتنصخ تمطار
ياللي تزعفرها من الطاس زدها

شبهت بالهجن الأصيلات الأشعار
وقصيدتي تراث اهلنا مددها

اعتز به واقبله إجلال وإكبار
واحة شرف يا سعد منهو وردها

اغلبنا في موجب الضيف والجار
يحلب لبنها قبل يذبح ولدها

وتراثنا من دونه نبيع الأعمار
وبأفعالنا روس المعالي صعدها

واليوم ضايق الجو من كثر الاقمار
تبث حقد لي حقده رفدها

غزا الشعر قبل امس غازين الافكار
قومن على الساحة دفعها حقدها

تلفقوا ثم جاؤوا من كل الاقطار
هذا يصبحها والآخر هجدها

هذا يحرف في الأسف سر وإجهار
وهذاك يذبح موهبة في مهدها

وقفوا علم للشعر في وقت الاسحار
غاروا على الساحة وعروا جسدها

وصاحت بعد ماشافت سترها طار
ووقف ولد زايد محمد ساعدها

قال ابشري بالستر وبردة الثار
واضفي عليها سترها مانشدها

واستل سيف في المواجيب بتار
واطلب وردن في العلا من فقدها

على خطي زايد خطاويه ما بار
والحاجة اللي في خياله وجدها

اغنى العرب من شوف ااديمي ستر
ومن شوف امر من السخافات وادهى

شفت الشعر بستان وابوابه اوهار
وقطفت ما يسقى المشاعر شهدها

قطفته من ديرة تنبت احرار
من دار بو مشعل ذراي وسندها


وسلامتكم وصح اللسان من قال

[السلاطين]

شكرااااااااااا لك لكن هناك أخطاء إملائيه لابد من تعديلها ولم تذكر بعض الحروف وأيضا الشنشنه في الابيات الاخيره

[روعه]

اخي الكريم او اختي الكريمة السلاطين

انا اخذت هذه القصايد من الانترنت

ونقلتها كما هي ،، فاسمحولي إذا كان هناك خطأ فليس مني من المصدر اللي نقلت منه

وشاكره مروركم

واشكرك على التنبيه

فإذا اي ح عنده القصيده يكتبها لنا الله لا يهينه ان شاء الله

الخطا وارد في كل مكان اخي الكريم

[سعيّد ابوجعشه]

من روائع المحيط الهادي
قصيده جزله من شاعر جزل

ولاهنتي على طرحها ياروعه