حط راسك بس !!!

[ابن وعيل]

حطّ راسك يا أطرق العود أنا ماني رسول= عادتي لا شفت غصـنٍ يميـل آمايلـه
في جمالك وش عسى كلّ ما نكتب يقول؟= وانت من شافك خطيرٍ يضيـع القايلـة
فتنتك ما حاشها فوق وجه الأرض زول= هايلـة وبكـلّ معنـىً نقولـه هايلـة!
لعنبو قلـبٍ يحبّـك ولا صـار مْهبـول= يـا منسّينـي انتمائـي لذيـك العايلـة
حسنكم مـا يفتـن ألاّ مكبّـرة العقـول = والاّْ راع النقص ما احدٍ عليكـم سايلـه
ما تشوف شلون شمسك ولا مرّةْ تزول = والشموس اللي سواها لو ابْطت زايلـة
لو تطبّ بديـرةٍ يابسـةْ قشـراً محـول = لا تعجّب لـو تشـوف اوديَتْهـا سايلـة
من يشوفك تظلم الساق بقْصار الحجـول = كيف له ما شاف برق الربيع وخايلـه؟!
من ثلاثك يالغضي ودّي اركب لي رحول = لين اشوف الحايلي ممسيٍ فـي حايلـه
غير سبعٍ فوق سبعٍ ولولٍ عـضّ لـول= خابرٍ لي شيٍّ اعظـم ولانـي قايلـه!!!
خصرك اللي يوم هز السما عرضٍ وطول = مثـل طفـلٍ لا تزيعـل علـيّ آحايلـه
من لبن! من خيزران! الوكاد إنّه يهـول = بْرغم ما فيـه سـوّاه غيـره شايلـه!!
أهيفٍ من طيبته مـا عـرف ذولا وذول = والاّْ كيف يشيـل ردف بثقلـه غايلـه!!
لو تطبّ الملعبة مـن تهامـة للفضـول = حرّمت تلعب على القاع شقـر آصايلـه
كلّ غصنٍ يا اطرق العود لو حتّى يطـول = أنت منه اطـول وعادتـك راع الطايلـة