بسم الله الرحمن الرحيم
ياعيني لو طال السهر ماظنتي حولش منام = الهم جاني مبتداه ورحمة الله شامله
تلعب بي الدنيا وانا كنت احسب ان الحظ قام = الله يعوض خير في جهد اليدين العامله
مثل العقيم اللي رزقه الله فـ احلامه غلام = من فرحته مافارقت راس الغلام انامله
ماتمت الفرحه وراحت روحه بسن الفطام = الله عطا والله خذا فرحه ولاهي كامله
شرع الدهر يومين زين وشين لله الدوام = عاد الليالي مقبله مدري وشنهي حامله
اقدار سوت بي سواة الشلف عجلات الولام = تبطش ويبطش في الحشى صيب الجروح الدامله
والحظ مايسمع ولاينطق ولا عنده نظام = اظن لو يعرف عنا راعيه فز وقام له
مافات مات وببتدي مادام لي شف ومرام = دام الامل موجود فـ وجيه القلوب الامله
من زرع يحصد وانا بالنور واجهت الظلام = واللي يكرر غلطته بانت عليه الخامله
ياسيف انا سقت الرجل يمك ولافيها كلام = خل النظر حول النظر تلقى علومي صامله
الذيب ماهرول عبث !! والطق في الميت .. حرام = والحر تكفيه الاشاره لابغيت تعامله
انا ما اسج الرجل للي يرتخي وقت الزحام = اسجها للي علومه طيبه وازامله
لامن صحبنا ماصحبنا الا رفيعين المقام = الكير نحرب نافخه والمسك نصحب حامله
ماهانت العشره ياخيك الا على عوال الحرام = اترك سميلات الجداد البس جداد السامله
قلنا ذلول حزام مردوفه وزعلنا حزام = يحسب ذلول حزام له مدري يحسب حزام له
اقدام سيقان النعام تأثر بروس النعام = اثر النعامه راسها لاطال تصبح ثامله ؟؟
روس الحبال معقده مابين جوخ وبالزخام = الموقف الغصاب سلم لي على قرامله
الطيبين مصدرين العلم قصاص العظام = الطيب لو ماجاوله جاهم يغني زامله
وان راحوا هل المعرفه قلنا على الدنيا السلام = اصل الاصايل يحتويها ماتعود هامله
يعنها اللي في اللقاء ضاري على ورد الحيام = يزعزع البيدا ولاجار الظمى في زامله
كان الزمن عيا يطيع فـ خلها راس وسنام = واخيك من عقب التعب عرض ابتسامه جامله
وســــــــلامتكــــــم
للزئبق الاحمـر (( عبدالله بن عمــاره ))