توالي العقابـــــــــيس \\ غربان همّي فوق قبرك وحيده

[ماجد حمد الزيد الخالدي]

ما أحقر الحياة عندما تختل القوانين والنواميس

ما اصعب استلال الانفاس من الهواء الملوث بانفاس الجبابرة الطغاة

ما اقبح الحياة عندما يسخر الشيطان من النسّاك والعباد

كم هي مؤلمة الحياة عندما يتسلط اللكع ابن اللكع

هذا النص إهداء مني الى جدي وجدك في قبورهم أخي الفاضل

أشهد الله على حب كل قبر امتلى بعظام الرجال

لن اطيل عليكم فالحياة تبداء بصرخه وتنتهي بصمت

اترككم لحين بلوغ ساعة صمتي في هذا النص

تجمعن حولي صفوف(ن) كراديس=بنات فكري خضعن للقصيده
طرقتها تجري كما سابح العيس=متحدراتن من نوازن بعيده
دعيتهن والكل منهن خراميس=ووردتهن فوق الخشوم العنيده
جبري وقافي فوق روس المفاليس=رمحن ركازه فالكبود اللهيده
طقّولي دمام الحروب المشاريس=نويتها غاره لعين البديده
لاجيت حرب(ن)يضربون النواقيس=وان جيت حبّن واهني من نريده
صوّت علي رجلن سلاسة عتاريس=من نسل خالد جاوب الصوت ميده
ابشر بعزك ويل كل الاباليس=الخالدي ربّط بليسن بقيده
ان كان للشيطان كرّه وتخميس=حنا جيوش الفتح حنّا نشيده
حنا سلالة من يدك المتاريس=قايد جيوش الفتح خالد عميده1
لاغار بالعيّار فابليس دلعيس=ذليل خاوي يفر مثل الشريده
كان الفخر منسب فحنّا المقابيس=فريد مكّه جدنا وهو عقيده2
خير البشر من قيّس الحق تقييس=بن عمّنا وش بعدها ويش ازيده
وكان الفخر تاريخ معجم قواميس=شف الكتب ماهي سوالف جريده
صلنا وجلنا من عمانن لجرجيس=حكّمن على شرعن وسنّة عتيده
بن زامل الجبري عذاب المناحيس=تسعين عامن مالقى من يكيده
الحق مايخفى ولا يجيه تدميس=الله فرق مابين جملة عبيده
عيال خالد كاسبين النواميس=يوم انها بالسيف يشهد جليده
ياما روينا ظاميات العبابيس=البرتغالي غيرنا من يبيده
بيض الحبارى دونها بالاناسيس=ياكم قطعنا كف من مد ايده
ون كانها رفّت فروخ القرانيس=تخمر الا من كاملن رام صيده
الكل يفخر في ربوعه ونا اقيس=فخر(ن)بلا توثيق ماني بجيده
حنّا حكمناها جميع التضاريس=موج البحر شاهد وبالبر حيده
ياكم قفرن قبلنا يوم ماديس=تلقى به رسوم الخوالد شهيده
ياما ضربنا من جبالن مخاريس=لين اخضعت تحت الخوالد رعيده
حنّأ سلالات الرجال الاشاويس=غرّة قريش الخالديه مجيده
والخير في كل البدايد تقاييس=كل(ن) خذى من الطيب وافي رصيده
ولّا الفخر عند الذي يعرف ايقيس=تقوى الفتى ربّه وخوفه وعيده
وإذا الفتى مرباه غشّ(ن)وتدليس=ماينفعه عرقه ولاهو يزيده
ومن كبرت عظامه بسوق النخاسيس=ماذاق طعم العز والذل عيده
اعمى البصر ماينفعنّه فوانيس=عينه سوى متعافيه او رميده
والّي همومه فوق راسه عراميس=ماهو سواة الّي يغني نشيده
اليوم صارت للرخوم الهتاريس=لاقبر(ن) الا صاح ينعى حفيده
ونا تزايدبي فزوع الكوابيس=اصحى وانام بذكر ذاك الفقيده
ياقبر مقرن جاك مني هناديس=غربان همّي فوق قبرك وحيده3
فوق القبر فلّن همومي من الكيس=القبر مشكى بالسنين البليده
مقرن وسال الدمع فوق القراطيس=لاتلومني ياعمّ نفسي زهيده
قمت اتذكر ماضين للفواريس=والربع من فوق الصحاصح ضديده
مقرن يصوت والخوالد مخاميس=والبرتغالي واقعن في هبيده
مقرن وسم القلب زود الهواجيس=ماهي هواجيس الهوى بالخريده
ماني بعاشق للعيون النواعيس=عشقي تواريخن تطاول فريده
القلب حامت به توالي العقابيس=سدّن شرايينه وسدن وريده
والكبد تحمسها لياليّ تحميس=تقلبت فوق السنين الوقيده
عروق قلبي يبسن فيه تيبيس=عيدان راكن فرعن في صعيده
الورق ناح وجاوبت نوحه ام قيس=حيف الحبارى ذكريات(ن)مديده
وقتن تبوعتنا غدوبه غطاريس=سقط البشر متغطرسين(ن)بسيده
الوقت لاكبر عيال الهداريس=ماعاد ياصل للاشاوس بريده
واليوم اشوف الوقت كلّه دهاليس=كبّر صغير وكم ذبح من وليده
العز عيونه ذابلاتن معاميس=اعطوله الدلّه لعلها تفيده
حافن عليه وحوش غدر(ن)مضاريس=يراقبنه لين ينفذ رصيده
اضرب على خمسه بضرب السواديس=واهزّ راسي ووسط جوفي صديده
واشرب من الدخان شربي عماريس=اطفي واولع كل بيت(ن)جديده
ماهمني كثر الوجيه الدواسيس=الي ذبحني قل وجيهن حميده
ولاهمني روس الكفر زمرة ابليس=الراس شامخ والخطاوي سديده
اسستلي فوق النوايف تئاسيس=ماهدهن صلفات ريح(ن)شديده
ولا العيون الي بروس الجواسيس=عجزت وهي ترقب تدوّر نقيده
والداب لو جلده مملس تماليس=سمّه بنابه والله يرد كيده
متحينن قرصة خطاوي الدواويس=الي ورى كل الغوانم جهيده
نمشي وحنّا من بعاد المراميس=ومجد(ن)تليد(ن)مالقى من يعيده
مريتلي مرقب لطيف النسانيس=متبعدن عن كل هم ونكيده
مالي بقعدات الطرب والمجاليس=ماعاينت همّي النفوس السعيده
ياوين انا وياوينهن التوانيس=همّي معلق في ضلوعي قديده
ماني مطولها ولوهي اماريس=والله لو طالت تذّوب حديده
الا ان قلبي فوق حمر الطعاميس=يسحب له بقوس الربابه قصيده

1-المقصود هنا خالد بن الوليد رضي الله عنه الملقب بريحانة قريش
2-هنا المقصود الوليد بن المغيرة الملقب بفريد مكة
3-المقصود هنا الملك مقرن بن اجود بن زامل الجبري رحمه الله تعالى المقتول عام 995هـ
في معركة جزيرة لنجه ضد البرتغاليين بعد احتلالهم لشرق الجزيرة العربية والخليج العربي لشهر كامل
اعملوا السيوف بالمسلمين وقتلوا الاطفال والنساء الحرائر وحرقوا المساجد حتى مكن الله للمسلمين واستطاعوا كسر شوكة النصارى

[مسعطر]

حيرتني يا ماجد كم بيت أبي أحدده و ألقى أزين منّه..

صح لسانك مليوووون قصيدة جزلة و رائعة..

والله الله بالجديد..ز تقبل مروري و تحياتي..

[الفرس]

اخوي ماجد ابيات في قمة الروعه والاتقان ..


والخير فـي كـل البدايـد تقاييـس
................................كل(ن) خذى من الطيب وافي رصيده
ولّا الفخر عند الذي يعـرف ايقيـس
....................................تقوى الفتـى ربّـه وخوفـه وعيـده



لاهنت على ما أوردت .. قصيده قمه قمه ..

[عبدالعزيز الشامري]

صح السانك يالخالدي

كلامك في محله ويشهد الله انك صادق

تحياتي

[محمد الضاعني]

قصيدة جزلة من راس جزل صح لسانك يا الغالي
ونعم مليون في بني خالد

[عـسـاه خـيـر]

الاخ والشاعر
ماجد حمد الزيد الخالدي

مرحبابك يا السنافي ومرحبا بالجديد

ولاهنت على هالقصيده الرائعه
صح السانك وبيض الله وجهك
مبدع ماشاءلله عليك اخي.

ننتظر منك المزيد والمزيد

تحيتي.

[مسفر مبارك]

الله الله عليــك صح لسانك وفي انتظــار جديدك

[~ورد~]

صح لسانك

[عــهــد]

حنّأ سـلالات الرجـال الاشاويـس
غـرّة قريـش الخالديـه مجـيـده
والخير فـي كـل البدايـد تقاييـس
كل(ن) خذى من الطيب وافي رصيده


صح لسانك ياالجبري

[ماجد حمد الزيد الخالدي]

المشاركة الأصلية كتبت بواسطة مسعطر

حيرتني يا ماجد كم بيت أبي أحدده و ألقى أزين منّه..

صح لسانك مليوووون قصيدة جزلة و رائعة..

والله الله بالجديد..ز تقبل مروري و تحياتي..

ياهلا وغلا بالغالي العزيز اخي الفاضل مسعطر

صح الله بدنك ملايين يالطيب وابشر بما يسرك

تقبل ودي وتقديري اخي الفاضل مسعطر وتقبل

مني صدق المحبة والاخوة

اخوك ماجد الزيد