نزلنا وأقمنا وألتقينا مع العجمان (هادي أبوزعبه العتيبي )

[أبوعتب]

بسم الله الرحمن الرحيم

السلام عليكم ورحمة الله وبركاته

مساء الخير ..

مشاركه لقصيده للشاعر المرحوم بأذن الله تعالي

الشاعر \ هادي ناشي أبوزعبه الفليت العتيبي ..

القصيده فيها الكثير من الحكم والعبر الجميله كما تتطرق فيها لمدح قبيله العجمان حين التقي فيهم

توكلـت بالله ربنـا خالـق الانـسـان = وكلآ علـى الله فـي مسيـرة وتوكالـه
يقول العتيبي يـوم عـدى علـى مابـان= يعد المثايـل ويـم عـدى علـى جالـه
نوينا وعزمنـا علـى رايـة الظفـران= ولانأخذ من الآريا من الـلاش واشكالـه
عسى الله يسهل رحلة الربـع ياسلطـان= عسـى الله يسهلهـا بالاقفـاء والأقبالـه
انا سائل رب البيـت بالعفـو والغفـران= يخفـف عـن المسلـم بحلـه وترحالـه
مشينا طلوع الشمس نتبع هوى الذيـدان= تحـت دبـرة الله منتويـن بالاشمـالـة
فهقنا الـدام وصـار مسهاجنـا فـزران= نبا الصلب الاقصى حين مازان منزالـه
وراهن ثلاث جيوب والجمس والنيسـان= جـداد المكايـن والـدبـلات شغـالـة
نسوق المتالي ونتقهقـر مـع الحيـران= على ساقـة الـذود المطـرق ومجدالـه
ويما حلـى لا ولاعـو قدمنـا الضيـان= وخطـو السنافـي قدمنـا وبهـر دلالـه
إلى من جلسنا في المعشى بـلا صيـوان= علـى دلـه صفـرى وفنجـان وبيالـه
ترى الابل صعيبه ماتبي واحـد كسـلان= ولاتبغي اللـي لامشـى يسبـر ضلالـه
تبـي عبقـري يفهـم العلـم بالنيشـان= حريب الردى والطيب دايم علـى بالـه
صميدع صليب الراي مع ضحكه الحجان= كريـم بكفـه والبطولـة مـن افعـالـه
حنا زيب عرب ماداني مـداج الضـان= تعدى عن الشاوي واليـا طـق مخيالـه
ألى من قزت نقزي ونبعد عن المرحـان= نشـد الرحـال ونتبـع البـوش حوالـه
يازينهـن لدوجـن فـي القفـور بـدان= وراعي الغنم في مرتعه يرضـع اطفالـه
تميل من العرفج على الرمث والظمـران= تلف الزهور ولآخضر العشـب ميالـه
تمرجحبنا حرش العراقيب فـي الجيـان= تقطف دقـاق العشـب وتميـل لجلالـه
عليها وسـوم جدودنـا والعـدو مهـان= اليـا شافهـا الطمـاع يـزداد بجفالـه
لبنهن قرى للضيف ولامن ضوى جيعان= لاصار المعـزب طيبـآ ينشـرح بالـه
وحنا وراهـن مانغثـي علـى الفرقـان= ولانقـبـل العيـلـه ولانــا بعيـالـه
وطينا القليـب ماتبعنـا طريـق هـدان= على الـراي ربعـن للمخاسيـر حمالـه
نعرف الدروب ونفهم الـزود والنقصـان= نـدل الطريـق ولانبـي فيـه دلالــه
سهجنا اللقيح واتجهنـا علـى الشعـلان= ضربنا الربيع وكل واحـد علـى فالـه
لقينا الخزامى واشهب الربـل والحـوذان= وصفـار والبسبـاس تشبعبـه جمـالـه
تشوف الفياض مخضرة كإنهـا بستـان= وعشب السهـل يـزداد ويزيـد بجبالـه
نزلنـا واقمنـا والتقينـا مـع العجمـان= ملاقا مخـوة والشـرف نمسـك حبالـه
وجونـا وسالونـا وقلنالـهـم عتـبـان= وكل ٍ علـى ماقيـل معـروف بأفعالـه
دعونا على الواجب وعلى البن والخرفان= مع العود الازرق والردي يذلـف لحالـه
زحازيـح يـام اليـا ثـور الـدخـان= سلاطيـن بالمجلـس وللخيـل خيـالـه
رجال تعـز الجـار وتكـرم الضيفـان= هـل الجـود بالمجـود للطيـب بذالـه
وطنهم عساه السيل مع جملـة الآوطـان= يعـم الجزيـرة والهمالـيـل هطـالـة
انا مـن عتيبـه والقبايـل لهـا عنـوان= زحول الرجـال اللـي للأثقـال شيالـه
نفك الدخيل ونكرم الضيـف والجيـران= وسعـد الخـوي حنـا نعـزه وناوالـه
قولن باليـا فعـل ضايـع بـلا برهـان= تـري ذاك مغـرور وبنفسـه يـورالـه
وكل العرب وافين مافي العرب نقصـان= وكـل ٍ علـى ماقيـل يافـي بمعـدالـه
ترى الطيب سندي ويتعصب على الرديان= ويعيش الردي ويموت والطيـب ماطالـه
أنا أحب راعي الصدق ماأعامل الكذبـان= ولاحـب ناسـآ بالسوالـيـف دجـالـة
رجال النمايم والحكايـا كمـا النسـوان= وبالـك يغـرك سنحـت النـذل بعقالـه
ضعاف النفوس هيوس مداحهم خسـران= يبان الردي فيهم واليـا صعبـت القالـه
يغيرونك الانذال فـي ضحكـه الأسنـان= عملهـم نفـاق وللعراقـيـب شقـالـه
اوصيك يالطيـب تبعـد عـن الخـوان= تـرى رفقـه الخـوان خيبـه ومحبالـة
يردك عن العليا يحدك علـى الحقـران= عسى الله يحـد اللـي دعاويـه بطالـة
توكد عن الرجال لاصرت بـه بحـلان= علشان تعرف ويش جـده ومـن خالـه
تقولـون ولـلا ماتقولـون يالخـبـلان= احب الشلـي والـلاش انامالـي ومالـه
ترى اللاش ولد اللاش في خانة الحيوان= ولا أحـد يعـد الاش بأقفـاه واقبـالـه
انا لبنيت البيـت حطيـت لـه سيسـان= علشـان ماتصبـح مبانـيـه منهـالـه
نرى القاف يالعراف يوضع على الميزان= علشان راعي العرف لقـال مـن قالـه
ولاكل من يرمي الهدف يضرب النيشـان= ولاكـل توبـآ قـد راعيـه تفصـالـه
عيال الجزيـره كلنـا عـرب وأخـوان= تحـت حكـم اخوان نـوره يعيشـون بظلالـه
مقدم اهل العوجاء أهل الفضل والأحسان= رجـال العدالـة لرخـم السيـف نقالـه
اصلـي واسلـم عـد ماهـل مـن ودان= على سيدنـا اللـي كلنـا نتبـع أعمالـه

[ابوعبدالرحمـن]

نزلنـا واقمنـا والتقينـا مـع العجمـان = ملاقا مخـوة والشـرف نمسـك حبالـه
وجونـا وسالونـا وقلنالـهـم عتـبـان = وكل ٍ علـى ماقيـل معـروف بأفعالـه
دعونا على الواجب وعلى البن والخرفان = مع العود الازرق والردي يذلـف لحالـه
زحازيـح يـام اليـا ثـور الـدخـان = سلاطيـن بالمجلـس وللخيـل خيـالـه
رجال تعـز الجـار وتكـرم الضيفـان = هـل الجـود بالمجـود للطيـب بذالـه
وطنهم عساه السيل مع جملـة الآوطـان = يعـم الجزيـرة والهمالـيـل هطـالـة

انا مـن عتيبـه والقبايـل لهـا عنـوان = زحول الرجـال اللـي للأثقـال شيالـه
نفك الدخيل ونكرم الضيـف والجيـران = وسعـد الخـوي حنـا نعـزه وناوالـه
قولن باليـا فعـل ضايـع بـلا برهـان = تـري ذاك مغـرور وبنفسـه يـورالـه
وكل العرب وافين مافي العرب نقصـان = وكـل ٍ علـى ماقيـل يافـي بمعـدالـه

ونعم ونعم ونعم

بالشاعر / هادي بن ناشي أبوزعبه الفليت العتيبي رحمه الله

:

ابوعتب

مرحبآ بك ويشرفنا تواجد شرواك من الطيبين في مجالس العجمان

ونعم وسبعة أنعام فيك وفي ربعك

وبيض الله وجهك على ذالقصيده الوافيه

:

[الغروب]

ابوعتب

حياك الله

ونشكرك على نقل هذه القصيدة المميزة والجزلة ورحم الله الشاعر

هادي ناشي أبوزعبه الفليت العتيبي ..

تقديري

[هادي بن فهاد]

ونعم

بالشاعر / هادي بن ناشي الله يبيحه

لاهنت اخوي ابوعتب على النقل

[someone]

صح السان شاعرها ويستاهلون العجمان وعتيبه كل افعولهم طيبه

[محمد العجمي11]

ونعم

بالشاعر هادي بن ناشي
صح السانك ابوعتب

[بندر العجمي]

صح الله لسانك ولسان شاعرها





ولاهنت قصيده وافيه من وافي






وبيض الله وجهك على هذه القصيده الرائعه