نبذه قصيره عن الشاعر العلم غازي بن عون العتيبي عاش هو وابوه من قبله
مع قبيلة سبيع هل الخرمه ووجدوا حسن الجوار ونحمد الله ان من قاصرنا مايملنا وندلهه حتى عن ربعه. وبعد ماكبروا اولادهم قالوا لازم نرجع لربعنا وقبيلتنا واملاكنا مثل ماهي نروح ونرجع عليها مع سبيع.
واشهر ماتفتخر به اي قبيله هي قصايد الأجناب من القبائل الاخرى فيها.
والا, شعار القبيله ليسوا مقياس حقيقي لطيب القبيله من رداها بين القبائل.
فشاعر القبيله بيوصل قبيلته للسماء وبيمدحها في كل ريع.
وكماهو معروف فقبيلة سبيع كبيره جداً ولهم ديرتااان
1- الاولى وهي ملك اباً عن جد ومحتمينها
من سالف الأزمان وهي الخرمه ورنيه وهما واديان الخرمه على وادي ورنيه على وادي
بين الواديين تقريباً 150 كيلو.ومشهورتان بوفرة المياه وبكثرة المزارع والنخيل وطمع فيهما قبائل كثييرن ولكن بفضل الله حامينها اهلها
وكانت هي الأساس لقبيلة سبيع عموم قبائل سبيع كانوا يتواجدون في الوديان.
2- رماح والحفر -حفر العتش- وهي ديرة ابن عريعر سابقاً بعد ان استولوا عليها سبيع بعد حرباً دامت 5 اشهر _استطاعت سبيع ان تجر جيوشها من الوديان بقيادة مشايخها وانتصروا واخذوا الديره التي يتواجدون فيها الان فانقسموا نصفين نصف مكث وهم الموجودون الأن ونصف رجع لديرته.
وكذلك بعضهم استوطن الحاير- الذي يقع غرب جنوب الرياض وهي ديرة الأعزه ولهم فيها زروع وبساتين
وهذه قصيدة الشاعر غازي بن عون.
يذكر قصة المحدار ويذكر ديار سبيع بالتفصيل, وكذلك بعض من اعيان سبيع.
ياهل الونيت اللي عزمتو مسيان = للشرق من قطر ايسر الغرب ناصين
تجملوبي ياطليقين الايمان = وريضو على شاني ولو كان عجلين
واليا كتبت ابيات شكر وعرفان = سيرو عساكم للسعاده ملقين
طريقكم يبرى لبيبات مروان = وليا وصلتو ظلم جاكم طريقين
درب يروح يسار من دون عردان = ودرب يروح يمين ياطا الشيابين
بين العواصم عبدوه اهل الاحسان = لاهل اللزوم وللحجيج الملبين
في الدرب الايمن بالمسافات نقصان = روحو يمين اقرب لكم ياميامين
ولامن برج العاصمه قدمكم بان = تعدو الحي الموالي للاقصين
تلفون شيخ في ربى الفخر سكان = اهل الفخر في الفاخريه مبنين
عنده قرى الضيفان من قرح الضان = يبهج كبود اللي من البعد لافين
ولا دار ما يجلى ضرم كل ضرمان = مدو جوابي للوفي يالوفيين
ولا اوصلتو المكتوب لابن شعيفان = ياهل الوفا وافين منتب بهافين
شيخ سلايل شيخ من روس شيخان = بنك الجمايل من شيوخ الجمالين
بعض الاسامي للمخاليق تبيان = قبيلة على الجمايل مسمين
ولا سميو من بدت الناس جملان = غير لسلفهم بالجمايل براهين
ولولا الخلف فعل السلف راح هموان = مير الخلف مع درب الاسلاف ماشين
ومسلط ورث عاداتهم ورث جدان = واحيا فعول اللي بالاجداث فانين
الخط يكتب له على الظرف عنوان = والفاهمين العارفين البيبين
يدرون بالعنوان في وجه الانسان = والجود له في وجه مسلط عناوين
اسمع فعول الشيخ مسلط بالاذان = ولا اقتنعت الا بعد شفت بالعين
اليا عناله واحد فيه اله شان = يقابله قبل القرى بالنبا الزين
ومن جا محله راض لو كان عجلان = وفضايله يلقونها المستحقين
لاجاه معسور من الدين غرقان = عانه وخفف عنه دين الديايين
من لابة يوم المغازي والاكوان = لديارهم بمذلق الحد حامين
مسكانهم جميع في ماض الازمان = بين النفود وضلعها والشعيبين
من غرب حد ديارهم خرص وضعان = ويحدها من شرق دار القحاطين
وجنوبها من يم شهران خدان = وشمالها ثلاث شدات من تين
حادين عنها الناس من عصر بدران = ومرسين ولطلابة الدين مضحين
ويوقرون الجار كرمان شجعان = ودهات ثقات ثقال حفيفين
لصاحب احلى من لبن حم الامتان = وعلى الاعادي كايدين غثيثين
ويوم اجدبت وديانهم والدهر شان = قسم رحل منهم وقسم مقيمين
اللي قعد منهم حصون للاوطان = ودون العشاير والجبابير مرسين
وقسم تحدر بالسبايا والاضعان = يمشون في مشهات رثم العرانين
محوالهم مابين خنزير وذقان = وحطو سدير يسار والعارض يمين
وفاضو على دار عذيه وجيان = وغزو عمود البيت بين الشريرين
مابين مطران وخوالد وعجمان = استوطنوها غصب ماهمب راضين
ولولا فعل خضر النمش وادهم الزان = ان كان فيها مااستقرو زمانين
اخذولهم دار ما اهلها برديان = لكن جا الشجعان ربع شجيعين
اخذو من العارض الى جو ساقان = والحاير الهم فيه غرس وبساتين
صاروبها اليومه قبايل وسلفان = وهم يوم جوها من ديرهم قليلين
وسبيع قسمين اهل حره ووديان = والقسم الاخر بسفل الدار ناحين
مبطين حنا والعلوين جيران = وبالطيب سلونا عن الربع الادنين
حنا وهم ورعان واليوم شيبان = عند الكرام مكرمين عزيزين
واحسب هل الوديان مامثلهم كان = واهل الحفر ورماح عنا بعيدين
ومن شوفتي فعل بعضهم بالاعيان = اشهد بشوف العين ماهوب تخمين
به قصة مفروض ينشر لها اعلان = وتحط للقارين من بين قوسين
قصة عبيد اللي ذبح حيل سمان = والضيف داره وين ومضيفه وين
وان كان قيل العلم ماهوب وكدان = شهوده الحضار خمسه وعشرين
ولو قالو احكم بينهم صرت بحلان = بين الحداريه وبين العلوين
وازريت افضل منهم احد على الثان = بفعل الامور الطيبات متساوين
ياكثر مافيكم من الجود سبعان = على الكرم كن الكرام متواصين
واختامها عداد ماهل ودان = صلو على خاتم جميع النبيين
وختاماً اللهم صلي على نبينا محمد وعلى آله وصحبه اجمعين.
اخوكمـ
ســــاطي
27-05-2008, 12:33 AM
العرض العادي
المواضيع المتشابهه
