قصيدة العزيزي دعما لقضية ابن الذيب
هذه قصيده لدعم قضية ابن الذيب اتمنى ان تنال استحسانكم
اخوكم فهد بن خالد العزيزي
الا يا اهل الدوحه والا يا اهل الريان=امانه امانه كان ها الصوت توحونه
سلامي امانه ياصل مهلهل القيفان=لبن راشد ان كنتم غشم ماتعرفونه
إلا وين يام و وين قبيلة العجمان=لهم فعل كل الناس قبلي يعدونه
يقولون لا من صار فيهم ولد جبان=قبل لا يجي رجال ربعه يذكونه
اسودن من الدوحه الى قاصية نجران=ولدهم لا يمكن يامحمد يكبونه
نبي واحدن بكره مثل شيخهم راكان=يقف موقفن كل الخلايق يعدونه
ولا انسى محلفكم يالمشاكيل مع قحطان=وقحطان عز وحلفهم ما يخلونه
هل الحربه الي ضربها يكسر العدوان=محازم ضفر وحزامهم مايرخونه
وانا والله اني ما امتهن مهنة الفتان=وانا اقدر خطابي وانا اعرف مضمونه
احاكي رجالن تدرك الرمي بالنيشان=رجالن جملهم في رسنهم يقدونه
وانا من قهر غنيت يالذيب بالالحان=اجاوبك ياذيبن تشوقني لحونه
خذوها خذوها ياجماعه على الذرعان=ترى ابليس ملعون وتوابعه ملعونه
ترى الذيب يبقى ذيب لو هو ورى القضبان=ولا اضن صوت عواه يمكن يحجبونه
واذا فيه ذيبن داخل السجن يالسجان=ترى غيره ذيابن ولا هي بمسجونه
والايا محمد ضايعه شوكة الميزان=بعد خف ميزان العداله وقانونه
هل الطيب تسجن دون ذنب وبلا برهان=وهل المسكر بتصريح رسمي يبيعونه
ماتلجم افواه الحق ياحضرة السلطان=ترى الحق صافين الضماير يقولونه
وابا اقول كلمة حق ماقالها جبان=يموت الجبان ولا يعبر بمكنونه
فضيحه عليكم وين حرية الانسان=على اتفه سبب فالسجن بالظلم ترمونه
لك الحمد يالله عشت في ديرة بليهان =ابو متعب وحرية الراي مضمونه
ولاعشت في ديره بها اليعربي ينهان=نموت وكرامتنا حصينه ومصيونه
التعديل الأخير تم بواسطة : عبدالله آل عامر بتاريخ 20-01-2012 الساعة 05:34 PM.
|