[ شذى الجوري ]

[خالد وبس]

يا نسمة العصر هبّي .. وارتكي ساعه = خليني انسى وانا سارح .. مسا البارح
القلب .. ما يعرف الا السمع والطاعه = حتى لو الحب يدمي .. سهمه الجارح

[خالد وبس]

كتلة حلا !؟

كلك على بعضك .. من اولْك لا آخرْك = من هامتك .. لا اصغر أصابع رجولك
كتلة حلا .. تروى العيون .. بمفاخرْك = الله على زولك .. ليا شفت زولك
احس بانفاسك .. تنافس مباخرْك = واحس بان الناس .. ماهم .. بحولك
انا ادري ان الله قبل عام .. صاخرك = اصلاً ترى عيونك .. توضّح ميولك!

[خالد وبس]

للي هي له !؟

جبرني غلاك .. اصد .. واصمت .. ولا اناقش = اخاف النقاش ان زاد .. يجرح مشاعرنا !؟

.

جعلني اموت وآواجه مصيري = لو تعمّدت ازعلك من شان غيرك
انت بلحالك .. تربّع في ضميري = مثل ما انت تضم حبي .. في ضميرك

.

الدمعه اللي على شاني .. تحوّلها = ياليتك تضمّها في محجر عيونك
نتايج الحزن .. حاجه ما اتحملها = حاول ترفّق شوي .. بحال مجنونك
والكلمه اللي تجول بخاطرك .. قلها = احذر تخلي الحواجز .. تنثني دونك
والناس لو قامت اتدبلج .. مسلسلها= والله .. ما اضايقك ..وازعلك .. واخونك!

[خالد وبس]

سوالف الثلث الاخير !؟

الله يا حلمٍ حلمته .. من العام = ابعد من ابعد شي .. والله جابه
ماهوب في عيني .. من اضغاث الاحلام = اللي على عيون الاوادم تشابه
لا والله الا لي سنه .. واربع ايام = وانا ما اهيم الا بحضرة جنابه
مبطي .. وعيني كلها شوق وهيام = حتى وانا بين السهد والصبابه
راح .. وتركني مع .. ذعاذيع الانسام = وذي حالتي .. خلال فترة غيابه!

[خالد وبس]

حبة خالك مشكله !؟

اكتفيت بحبي الليّ احتواك .. وشالك = والا .. لا هالحين ما بعْد اكتفيت .. بحبّي
اعشقك واهواك قبل انّي .. اجي في بالك = وكل كلمه منك .. لو انها (هلا) .. تلعبّي
ايه انا لك يا حبيبي .. سوّ ما يحلا لك = داو جرحٍ ما جرحته .. يالفريق الطبّي
لا تضايق .. لو دريت اني احسد ظلالك = وانت تعرفني .. وتدري ان غيرتي .. من ربّي
غرت من خالك بعد ما شفت .. حبة خالك = هذا خدك !! والبلا والله من المتخبّي!

[خالد وبس]

مالك شبيه !؟

انا وياك .. اعيش اغلا غرامٍ .. مر بالتاريخ = يا ما شالله على اللي ضمّك بقلبه .. ويا بخته
فديتك .. وانت كنّك نازلٍ من كوكب المريخ = تسلّطت .. وخذيت اللي تحبّه .. لين نوّخته
ومن يرهن حياته كلها .. في ضفّ بنت الشيخ = يحس بلذّة هيامه .. لا دوّخها .. ودوّخته!

[خالد وبس]

للي هي له !؟

عسى الضيقه اللي حطّمت قلبك .. وهزّتك = تبدّل بضحكه .. وانبساطه .. ووسعة بال
تفاخر بقيمة مجدك الشامخ .. وعزّتك = ولا تميل .. لو شفت الزمن في عيونك .. مال
وتحصّن من عيون المشفّح .. ليا خزّتك = اقر آية الكرسي .. واخذ لك شويّ اغسال
عليك الخطر مبطي .. وعادك على فزّتك = قبل تكبر وتحلوّ .. وتصير عال العال
وشف الشوكه اللي جات في دربك .. وغزّتك = ما قالت على الله .. شوف رجلك بدون نعال!

[خالد وبس]

دايم وانا ادوّرك !؟

في ذمتي .. لو آتحمّل غيابك = ما شفتني وانا من الشوق .. ادوّرك
انا يتيمٍ .. وواقفٍ عند بابك = وانته على الايتام .. قلبك يعوّرك
تعال .. وامسح دمعتي في ثيابك = والا انفهق .. واترك عيوني .. تصوّرك!

[خالد وبس]

وتلومني .. وتقول خف شوي .. من شوقك علي = وانا ما اشوفك غير لا قدني بموت من الوله
خليتني .. احسّك اقرب شخص في دنياي ..إلي = طبوعنا متشابهه .. واشواقنا متواصله!

[خالد وبس]

مشكله بسيطه !؟

كنت اعشقك وانت ما تدري = واحلم .. بأنّي حبيبٍ لّك
واجي واضمّك .. على صدري = حتى وهو حلم .. ما املّك
حفظت لي عزّي .. وقدري = وانا بعد حافظك .. كلّك
تدري وش المشكله ؟ .. مدري = وكاد مانيب .. حيّ لّك!