رحله بريه لبنات القويعيه لصيد الضبان -- بالصور

[راكان اليامي]

بلسان بنت القويعيه تقول بنت القويعيه

أول شي نعتذر على الصور الرديئة الجوده ،،، فالرحله كانت مفاجئه وماتوقعناها
ولم تتوفر لنا كاميرا أوضح من هذي (كاميرا جوال )


في صباح يوم الخميس الموافق 10- 5 – 2007 م

اتفق العرب على أن لا يتفقوا
وقررنا نكشت في المزرعة
و رحنا للمزرعه لعبنا وفسقنا واسفهلينا ... وطافشنا في المسبح
وماهنى شي في خويطراتنا ما سويناه

وقيلنا وعينا من الله خير....
وقمنا لصلاة العصر وإلى العرب متفرقين... وإلى كل وحده نفسها تدودل مع خشمها .... والخواطر مهيب ياجودها


وإلى مافيه الا حنا يالبني ... وكل وحدة ماسكتن لها زاويه

وتطمر هايدي السنافيه وتبدأ البحث عن بيتر هع هع
وتسلق الطعس ناويها نيه يومنها وصلت علاه وتظهر رويسها وتويدز وتشوف هي يمها يم ولالا وكلن قام يبحرها تسن به خبر وجابت عالي الصوت همن قالت يابني إلى متى هذا الضياع ؟؟ إلى متى وحنا والضبان واحد مدقومين بجحر ؟؟
والله وتولع جنب راسها لمبه !!!!
وقالت على طاري الضبان خن نخربها ونضبب مهوب دهران أجود منا >> > وأنتم خابرين إذا غاب القط ألعب يافار
وتمت الموافقه من الجميع قبولا لتحدي عجلان وبقية الاعضاء



وشغلنا السيارة واشتغلت نديبه وهاك ياردح وتصفيق وتصفير >>> لا والله صرنا بنضبب

وخذنا ساعه ماصدناش >>>>والله يا هي ذهينه هالضبان كل وحده ملبقة عند جحرها ومن يوم ناصلها وهي داخله -
دبت في انفسنا الهزيمه واليأس وقلنا هذي والله اللي مالها دواء ياوالله اللي تفشلنا عند دهران

عم الهدؤ في السيارة ....اللي حاطه يدها على خدها واللي مسكت مجلة القويعية تتصفحها واللي مفهيه ... فجأة سمعنا صرخة بنت القويعية ودزة الموتر ورا هاك الضب اللي وش كبره بسم الله علينا والله ياهو يروووع أصفر وراسه اسود شكينا أنه جني و أنواع التفحيط والتخميس والصراخ ما نشوف الا الغبرة ومن روعة هايدي قالت خلااااااص تكفووون مانبي ضب ودوني للبيت >>>>> هذي اللي مسوية لنا فيها طرزان وهي ما عندها سالفه

الحاصل أنه ضاع ما عاد شفناه خخخخ أقولكم أنه جني بس ماحد صدقني !!!!

بعد مرور ساعه خذنا فيها خبرة وصرنا متمرسات هع هع

قلنا يابنات مستعدين نبي يدين شغالة تحفر( وقوم تعاونوا ما ذلوا )
قالوا بصوت واحد قداااااااام


وقزينا جحر ضب ولبقنا عنده ونزلوا الصبايا كل وحده مشمره عن ساعديها
مادرينا الا وهاك العقرب اللي مفرعه من باب بيت الضب والتفتت وحده من الربع وصرخت الهجه يابنات >>>> جاك الموت ياتارك الصلاة هع



وكل وحده عضت عباتها وفركنا ماتشوف الا غبرتنا ونذكر انا جايين على سيارة ..... وبمعاناة لين رجعنا وركبنا

أفادتنا وحده من البنات تقول أن الداب والعقرب سبحان الله تحرس الضب >>>>يعني ضب مصلحجي يسكنهم مهوب لـ الله ولا هوب عشان وجيهم ،،، حاطهم على فيزة فراش - حراسه بس -

وهم يزدون فيه أحيانا ... إذا ما تسنع لهم كلوه خخخخخخخخخ

الحاصل طردنا لنا ورى ضب ثاني ودخل جحره ... قلنا مافيه الا نغره

وننزل وناخذ الجيكة ونصبها من أول قطرة إلى آآآخر قطرة والضب النذل ما طلع >>>>>> ناوي ينتحر أبو الشباب وما متوثم فيه الا حنا يالبنات حسبي الله عليه!!!!



اللي قاهرني أن الجيكه كبيرة ومليااااانه وصبيناها كلهااا ولا طلع >>>>> هي اللي معبيتها ومتحسفه عليها خخخخخ

جتنا انتقادات من أحد علماء التصييد يقول يا العليميين ما تصبونها كلها شوي بس .... والضب من يسمع صوت الماء ويشم ريحته يطلع !!! >>>>> خخخخخخ


بعدها دق الجوال يسأل عن أصحابه >>>> قامت كل وحده تطالع الثانية وفقشتها وحده من الربع قالت نتمشى في المزرعة ونجني الثمار الطازجة

همن نشوف لنا ضب صغير يسمونه وحر أو وحير !!!!
ونروح وندعسه خخخخخخخخ وأخيراااا صدنا أول ضب
نزلنا نشوف شكله إلى المصارين طالعه من أقصى بطنه هع هع >>>>>> ما فيه يمه ارحميني ههههههههههههه إذا جينا جينا بقوة


بعدها بشوي وحنا مستانسين يقال أنا مسوين إنجاز ونلقى وحير آخر ونصوبه ونطلق عليه ونصيده مع قلبه ويطلع دم أحمر >>>> يا عيني شكله يحب هع هع



وإلاه حي ويتلقط أنفاسه الأخيرة قلنا لازم نقتله ونجيب الجهده وناخذ السكينه وتجي الشقرديه الصارمه الـ ......... (أنواع المدح فيها) ،،،
وتاخذ السكينه وتلبس القلافز وتبدأ تذبحه ياااااااي من قدها ذبحت ضب.... وأول ما قصت راسه صفقنا لها كأنها قاطعتن لها كيكة


بس تراها ما شدته بلحيل،،، فيه منهو مجوده عليها
انتهينا من قتلها واستعرضنا فيها مثل ما تشوفون (فرحانين ومستانسين بشجاعتنا






ركبنا..... قلنا خلاص يكفي 2 فيهن بركه

وحنا في الطريق الا وحده من البنات تصيييح عرفتوها >>>>أظن أنها غنيه عن التعريف ....قامت تشاهق تقول ذبحته ذبحته والله ما أصدق شلووون ؟؟؟؟
ههههههههههه يا حبي لها رقيقه وخوافه أول مره تتجرأ على شي وهذي النهاية !!!!

رجعنا للمزرعة وتقهوينا وعينا من الله خير>>>> عوضنا حق الطلعه اللي فاتت


وبعدين زركشنا الضبان وصورناها

خلوني أوصف لكم أشكالهم وهم يزركشون ......

وحده من الربع لا بسه كمامه ومالمست الضب كتبت على الضبان بالعربي ومسكت لها هايدي بطينه

هايدي متلطمه بنت القويعيه كتبت بالانجليزي ولبست ضبها وزركشته ،، وسمته (روميو )
هايدي زركشت ضبها وسمته (جولييت )

لوليتا أجحدوووها ماسوت شي .... تقول ماعلي نظارات وما أشوف !!!! >>>>> وش دخل هذا في هذا مدري بس على بالها مسويه اني عندي اختبار و ومشغولة وما تشوف !!!!











بعدين بحلنا بها
وذبيناها عند الزبالة وجاها من ياخذها وقشرها ويقطعها ويطبخها وعليه بالعافيه
والتقشير والطبخ ما يحتاج صور ..... راجعوا موضوع دهران


مايستفاد من الموضوع//
اولا : لا تحقرون البنات تراهن سنافيات
ثانيا : تراهن رقيقات يخافون وإذا ذبحوا يصيحون ههههههههه يقولون حرام احس اني مجرمه
ثالثا : صيادة الضبان يبيلها صبر وحزم ووقت كبير
رابعا : نتمنى تقبلون الهدايا وتبلعون العافيه
خامسا : كانت الرحلة ولا أروووع وخاصة التفحيط ههههههه
سادسا : ترا ما فيه وحده منا حلمت في الضبان هع هع
سابعا : نشكر العجوز اللي عطتنا بعض المصطلحات ونسقت معنا في الموضوع
ثامنا : شكر خاص لمن نظف لنا الضبان



مقتطفات من الرحلة :
وحده من الربع تشرف عليهم وكل ماحركوا الضب اللي انفقعت كرشتوه وفاحت الريحه قالت ( يا تسبدييييييييه )
وهايدي تهاوع وفاتحه الباب وكل دقيقه تطلع تشم هوا ومتحمله ومظحيه من أجلكم ولأجلكم فقط
بنت القويعيه مزكومه كالعاده وماتشم هع هع والله يجزاها خير كل شوي تلطف لنا الجو بعطر من زهور الريف
كل من دخل ومر علينا تلطم وقال الله يقرفكم انتم وبربستكم

أثناء الرحلة :
فله مايجيك الا انك مطلعه يدك مع الشباك وعلى الباب الايمين
وأنوااااااع التطعيس أحس اللي يمسك الطارة يتونس يستعرض مهاراته >>>> عاد معه بنات يالله من فضلك كأنه في ملاهي ههههههههه إذا لفت وهي مسرعه صرخوا كأنا راكبين قطار الموت هع هع


فايده يابنات القويعيه*
إذا بغينا نصيد ضب نسكت ونهدي السرعه ويقولون أمسحي الأرض ( يعني ناظريها كلها يمكن تقزين شيء ما شيات من الضبان ؟؟؟)

وانتظروا طلعتنا السنة الجايه >>>> ضريت عصما صيد الغرانيدز

سيناريو : العجوز + هايدي + وحده من الربع + بنت القويعيه
فكرة : هايدي
تصوير : وحده من الربع + هايدي
مكياج : هايدي + بنت القويعيه
مونتاج : وحده من الربع

بنااات القويعيه قدهااااااااا وقدووووووووود

[مهرة النسيان]

ابرك بنات مااجرأهن !!

اذبحوني ولا اسوي سواتهن ..

شكرا لك ياراكان..

[راكان اليامي]

العفو يامهره النسيان

[ابومحمد الشامري]

تعلموا يا بنات المنتدى من ذا الرحلة راكان اليامي مفروض تحط ذا الموضوع في مجلس الاسرة والمجتمع علشان الاخوات يمرون عليه في الصباح وفي الليل ههههههههه

بس خوش اكسسوارات وزينه على الضبان:joke:

[عبدالله العريمان]

خوووووووووووش ضبان

هههههههههههههههه

مشكور علي الموضوع الجميل

تقبل تحياتي اخوك\عبدالله العريمان

[راكان اليامي]

هلاا وغلا يابو حمد وابن عريمان وتسلمون على الرد

[الفرس]

مقوى البنات واقوى كبودهم ذولا عيال مهمب بنات


انا وجعتني كبدي


يعطيك العافيه

[الملكة]

لاهنت يا راكان...
الصراحة الرحلة رهيبه >>> هذي المغامرات والا بلاش..
واستفدنا اصول الصيد والتعامل مع الضبان....

[عـسـاه خـيـر]

لاهنت يا راكان على الاصور الطيبه ... دمت بخير

[الخديدي]

هههههههههههههههههههه
لاهنت اخوي راكان