قصيدة مطلق الضميان الجذع و رد شقير الجذع و مجاراة الشيخ غازي بن زريبه للقصيدتين

[عـتـيـبـي بـفـهـد الاحـمد]

السلام عليكم ورحمة الله وبركاته
قصيدة مطلق الضميان اللي سبقني عليها عجمي والفخر عمي والنعم فيك
جبت لكم قصيدة مطلق و رد شقير و مجاراة الشيخ غازي بن مناحي بن زريبه بما اني احد ابناء الجذعان حبيت افيدكم فيها
واليكم قصيدة مطلق الضميان

ياشقير أبا أبشرك وأخبـرك ياشقيـر *** أخذت لـي عنقـا ً صغييـرا ً نهدهـا
مزيونة ٍ ياشقير يخضع لهـا الطيـر*** بنت الرجـال اللـي جويـدا ً عهدهـا
عشقتها حيـث أنهـا شكلهـا غيـر*** سبحـان ربـا ً بالجمـال افتـردهـا
راعي هدب عينـا ً يغـط المحاجيـر *** وجملة وصوف ٍتذبح اللـي شهدهـا
انهودهـا ياشقيـر حمـرا ً مزابيـر*** ويضفي على هاك الردايـف جعدهـا
في حبهـا ماطيـع عـذّال ومشيـر*** من يـوم شامتلـي وغيـري فقدهـا
في عشقتي قامـوا علـي الحجاجيـر*** وسويـت فيهـم سالفـه لابعـدهـا
ماهيب من عزوة وسـاع الحناجيـر*** لكـن خلـق الله كثـيـر ٍ حسـدهـا
ياشقيـر يـوم ان الليالـي مناحيـر*** مـن دونهـا يمنـاي تبـذل جهدهـا
مفتكها ياشقيـر مـن عالـم ٍ غيـر*** واليـوم جـا عشـاق ٍ اطـم وأدهـا
ناس ٍ على الباطل عجـال ٍ مغاويـر***وبلشت لـولا الحـق عنـي طردهـا
والحق لاهل الحـق مافيـه تسعيـر*** مـن يـوم تليـت الجميلـه بيدهـا
وياشقير وإن جات الضوامي على البير*** كلماتك اللـي جاتـك اليـوم عدهـا
والهـا علـى الله يالنافـي تدابـيـر*** وان كان مافادتـك الاصحـاب فدهـا
واللي حلم له حلم قلّه عسـى خيـر*** ومن خلقة الاحـلام محـدا ً حمدهـا
واللي يشب النـار تجـذب خطاطيـر *** وتجذب له أسبـاب ٍ كثيـر ٍ عددهـا
وأمّا صخرت القاف ياشقيـر تصخيـر*** غيـرك يبنّـون البيـوت بعمـدهـا
واليا حكمت الشعر بيـن الشواعيـر*** كـل العلـوم اللـي تبيهـا تجـدهـا
ياشقير صوّرت الك الاوضاع تصويـر*** طرق الموارد واضحه وانـت اردهـا
وياشقيـر ركّـز بالمعانـي بتفكيـر*** وكـل العلـوم الطيبـات اعتمـدهـا
واطلب من اللي كّون الكـون تيسيـر*** وفكّـر بصعبـات المعانـي وزدهـا
ولـو إنهـا تشـرى بنقـد الدنانيـر*** كل ٍ دفـع ميلانهـا اللـي رصدهـا
كم واحد ٍ حاول ولاسـار لـه سيـر*** عيّـت تفيـد العقـده اللـي عقدهـا
وصلاة ربـي عـد وبـل الشخاتيـر*** وأعداد مـاأرزم فالسحايـب رعدهـا
علـى نبـي ٍ فسّـر الحـق تفسيـر*** ارسالتـه مـاجـا نـبـي ٍ بعـدهـا

رد الشاعر شقير بن عقيل الجذع

حيّيـت ياخـط ٍ لفانـي بتسطـيـر*** حي البيوت وحـي منهـو رصدهـا
أبيـات فيهـا للعـوارف تفاسـيـر*** تفسيرها في صدر منهـو رصدهـا
اثقـال وأخفـاف ٍ مقـاف ٍ مناحيـر*** مثل اللهيب اللـي صعيـب ٍ وقدهـا
ياخذبها العاقـل طويـل المشاويـر*** ويضحك بها الجاهل وينسـا عددهـا
مسيّـره والهـا علـى الله تيسيـر*** وأقـول يافـراج الافـراج قـدهـا
مطلق يبشرني وانا ابغـى التباشيـر*** بشـارة ٍ يسعـد ضميـري سعدهـا
يقول أخذ شيخـة جمـال الغناديـر*** وشلون مدري جالها فـي وعدهـا
وبعد تجوزها عسـى فالامـر خيـر*** حملت ولاأدري كيف توضع ولدهـا
مدري تجيبـه شـر ولايجـي خيـر*** نكـده وجعـل الله يكافـي نكـدهـا
وأقول دام الهـا خطيـب وحجاجيـر*** عشقتـك يامطلـق تجّـود بيـدهـا
وخلك سوات ذياب ومهلهـل الزيـر*** ومن خاف من روس الرخوم يعبدها
والرزق عند معيـش الـذر والطيـر*** ولا يقطع الفرجات من لا اعتمدهـا
لا تنخضع والهـا علـى الله تدابيـر*** وان كايدتـك بكيـد الايـام كـدهـا
واضرب على التابوت صلب المسامير*** وداو العيون اللـي قديـم ٍ رمدهـا
كحـل ٍ تغنّابـه جـداد المواصـيـر*** لاصابلـه عيـن ٍ يفضّـخ بـردهـا
والابـحـد المرهـفـات البواتـيـر*** اللي ليـا نـاش الحوانـي هردهـا
عشقتك من وقت السلف والمظاهير*** معاهـدتـك ولاتـبـور بعهـدهـا
والمحجر اللي عشقتـه فالمخاضيـر*** وقت الربيع اللي نبـت فـي بلدهـا
يوم اختلاط الذيـب والشـاه والعيـر*** والارنب اللي تفتـرش كـف يدهـا
احـذر تعوضهـا بـزود الدنانـيـر*** ترى غليظ المـال يكسـر عمدهـا
لاتستمـع فيهـا لعـذ ّال ومشيـر*** الـلاش يفنـى غلّتـه مابـردهـا
لاتامن الدنيـا تـرى الهـا تغاييـر*** دقّاتـهـا فالـحـال لاتعتـمـدهـا
ولاتشرب الما في جلـود الخنازيـر*** ولاتستنـد للـي ضعيـف ٍ سندهـا
مازعزع الظلعان صفق المعاصيـر*** كثـر الـذواري والهـوى يطّردهـا

و هذه مجاراة الشيخ غازي بن مناحي بن زريّبه لقصيدتي الشاعرين الكبيرين مطلق المضيان و شقير بن عقيل :

مبروك يامن عشقته فنهـا غيـر*** وعشّاقهـا رعيانهـا فـي بلدهـا
لو انهم ياشقير قحطـان ومطيـر*** قلنا لمطلق زمـرة الشـر أبدهـا
ويكمل مهرها يازبون المخاسيـر*** وحاسب طيور الزرع بذ ّه عددهـا
ومن قاس حبله قبل يارد على البير*** يشرب من الجمّه اليا من وردهـا
ومن طاوع الرديان عذ ّال وامشير*** تقضي حياتـه والعـلا ماصعدهـا
ومن سايس الدنيا بميـز ٍ وتقديـر*** تصـر ّفاتـه بالاخيـر يحمـدهـا
وعشقتك شامت للرجال المناعيـر*** تغليـك ولا كــان ماتفتـردهـا
وهذي سواة الناس حو ّاف وامغير*** ويفوز باللـذات مـن شـد يدهـا
والشكر للمعبـود للذنـب تكفيـر*** ولاخاب عبـد ٍ نعمتـه ماجحدهـا
وجر الوجار ورحبـوا بالمساييـر*** والرزق عند اللي يفكـك عقدهـا
ومني تحيـه للضميـان وشقيـر*** تعجزبها الاقلام تحصـي عددهـا
درعي ليا عد ّت فعول المشاهيـر*** بعصرية ٍ يسبق مطرهـا بردهـا
وسلامتكم ,,,