إستفسار عن قصيدة

[حمد العويصي]

السلام عليكم ورحمة الله وبركاته

تحية طيبة لجميع الأخوان

وفقط عندي إستفسار بسيط أطرحه

على جميع الإخوان في المنتدى

هناك قصيدة مشهورة إنتشرت
وهي
((هبت هبوب شمال وبردها شيني
ماتدفي النار لو حنا شعلناها ))
يقال إنها لشاعر عجمي قديم إسمه بن عسكر العجمي
ونسبت لأكثر من شاعر

ارجوا التوضيح لمن لديه الخبر الأكيد
ومشكورين
وتقبلوا تحياتي

[مسعطر]

حياك الله يا حمد ,,

القصيدة عليها خلاف عند كثير من الأدباء ,,

و اللي حنا نعرفه يالعجمان انها لفهد ابن الحضرية ابن عسكر آل ضاعن العجمي ,,

و لهجة القصيدة بيّنه انها لعجمي ,,
مع إحترامي لجميع من نسبها لغير ابن عسكر ,,

عديت في مرقب(ن) والليل ممسينـي=بديار غرب(ن) لعلّ السيـل ماجاهـا
اضحك مع اللي ضحك والهم طاويني=طيّة شنون القربّ لاقطـروا ماهـا
وراك ماتذرفيـن الدمـع ياعيـنـي=على هنوف(ن) جديد اللبس يزهاهـا
هبّت هبوب(ن) شمال وبردها شينـي=ماتدفـي النـار لـو حنـا شعمناهـا
مايدفي الا حشـا مريوشـة العينـي=واليا عطشنـا شربنـا مـن ثناياهـا
ابو عيون(ن) اليـا سلهـم تناجينـي=ياقرد عيـن المشقّـا كيـف يقواهـا
ياشبه وضحى(ن) فتاة(ن) دلّها زيني=داجت على عقلة(ن)والورد ماجاهـا
ياجعل من شار بالفرقى عمى العينـي=مخباط صمعا جليل الفخـذ يشظاهـا
جعله حسير(ن) كسير وراكبه دينـي=واتلى حلاله ذلول(ن) راح يطلاهـا

و سلامتك ,,

[حمد العويصي]

حياك الله يامسعطر وألف شكر على التوضيح

وهو طال عمرك كما سمعت وقرأت قديماً وبالتحديد

ذكرت في مجلة المختلف قبل سنوات عدة بأنها لإبن عسكر العجمي

وللمرة الثانية اشكرك على التوضيح

بس تعليق على كلامك طال عمرك في قولتك

حنا يالعجمان فمليون نعم فيكم ياعيال العم

بس للتوضيح أنا منكم وفيكم ومن محافيظ الرس

ولكن لم أسكنها للتوضيح فقط

وتقبل خالص تحياتي وماقصرت الله يبقيك

[مسعطر]

ونعم يا العويصي وانا عارف انك عجمي ,,
لكن اقصد انها عندنا يالعجمان نعرف صاحبها و اللي غيرنا ما علينا منه

و مرحبا بك في مجالس ربعك ,,

[حمد العويصي]

ونعم يا العويصي وانا عارف انك عجمي ,,
لكن اقصد انها عندنا يالعجمان نعرف صاحبها و اللي غيرنا ما علينا منه

و مرحبا بك في مجالس ربعك ,,

بيض الله وجهك يامسعطر وربي لي الشرف يوم أكون

في هالمنتدى وأنا والله توقعت إنها ماتفوت عليك وأنت خبير

في الأنساب ماشاء الله عليك أشكرك على توضيحك وعلى هالقصيدة

الرائعة

مع تمنياتي لك بالتوفيق ولجميع الأخوة وعلى درب المحبة نلتقي .

[someone]

كل الشكر لك اخوي مسعطر على التوضيح

[منصور بالله]

اضحك مع اللي ضحك والهم طاويني ....... طيّة شنون العرب لاقطـروا ماهـا

توضيح للأخ مسعطر ... البيت الصحيح : طية شنون القرب لا قطروا ماها !

والقربه معروفه ..

وكذلك ما تدفي النار لو حنا شعمناها هو الأقرب للصحه كما سمعنا

وكذلك يا جعل من شار بالفرقى عمى العيني .. هي التي تستوي مع لهجة العجمان

لذلك أعتقد أن هذه القصيده لشهرتها أصبح من يتناقلها .. ينقلها بلهجته ومفرداته ولذلك تجد الإختلاف في الألفاظ في القصيده

وشكرا لكم

[هادي بن فهاد]

الله لايهينك يامسعطر على التوضيح

تحياتي

[ابن حويل ال حمد بن زيد]

هاذا البيت لبن عسكر العجمي وهذا البيت معروف
تـــــحــــــــــيــــــــــاتـــــــــي

[مسعطر]

مرحبا و مسهلا بالجميع ,,

و كلامك كله صحيح يا منصور بالله ,,
القربّ جمع القربة ,, و جعل ماهيب عل مثل ما قلت ,,



انا كنت حافظ القصيدة حفظ ,,

و لكن نسيتها من قل الترديد ,,
و النص الموجود أعلاه نسخته نسخ من كتابة أحد الأخوان ,,
و عدلتها بعد ملاحظتك ,,