ملحمة الازمان في مفاخر العجمان للغسلان

[فواز الغسلان]

هذه القصيدة المتواضعه قدمتها للشيخ مشعل والشيخ فلاح ال حثلين وجميع قبيلة العجمان

اعترافاً منا لما تقدمه قناة الصحراء من جهود لحفظ تراثنا واحياء تاريخنا المجيد فلهم كل الشكر

والامتنان على ذلك ,,,, الراوي فواز الغسلان

يقول الراوي الغسلان=كلام ينهض الكسلان
وحاف دلاله الرسلان=وساق الكيف والفنجال
عقب ماسار في ليله=على اللي تم تـفـلـيــله
لـعـلـمٍ صـعب تـحـلـيـله=وجور الوزن والمكيال
وعاد لديرته حايل=وعز عقاله المايل
سطام الصايل العايل=وريف اللي زمانه مال
ويوم انه سكن روعه=بدى تخطيط مشروعه
بساس الطيب وفروعه=وفجر بالعرب زلزال
لانه يذكر الواقع=وصدقه بالحشى ناقع
وهرج الخايط الراقع=يجيب العرق والسلال
بنى لاهل الندى صيوان=وحط لمجلسه ليوان
مع انه ماطبع ديوان=وسار العمر بالترحال
مدام الهيس صقراوي=وصائب حاس عشراوي
يغادر حضرة الراوي=او انه ينقض اللي قال
وطاح وطارت اوراقه=وحاس البرد مشراقه
وقصف السفن واغراقه=طريق الكاذب الدجال
يبونك للردى فوطه=لاجل تحظى بمصفوطه
وتلقى بنت فطفوطه =وتسكن في شقق رويال
وغيره يرتحل ذيبك=ويبدى الناس تكذيبك
ومهما زاد تهذيبك=بوقتك ماتجيب ريال
وفكري شغل الماطور=وفاحت في ثراه عطور
وبان القطر والقاطور =ولا حول العرب طربال
نداه وطبعه الهادي=نفع طيثاب مع هادي
وروغة زين الانهادي=طبيعة زينة الخلخال
واراجي خالقي عفوه=عن الغلطات والهفوه
ولو ماني من الصفوه=وحاجتنا سداد الحال
وانا لا هضت في قافي=لجزل القاف نقافي
عليه ختوم الاوقافي=وصعب ينشله نشال
لو انه في بلاد الهور=يجيني طايع مقهور
ويطلع جاهز مصهور=وتمشي في قفاه ارتال
بوسط الجوف خزاني=حوى قيفان واوزاني
تشادي رمي كنزاني=وبعض اقوال ابن محوال
اليا من دقت اجراسي=يهيض ويمتلي راسي
بلا دفتر وكراسي=وراسي يضبط اللي قال
ضميري فاهمٍ قوله=بقدر الناس وعقوله
بغرس الفكر وحقوله=وياتي مايبي مرسال
وقاف قاله البيطار=يساوي بالعرب قنطار
لشيخ يكرم الخطار=ويستاهل ثمان ادبال
تسير بشاشة الهاتف=تشادي للدباء الكاتف
بلا صايد ولا ناتف=وتظهر له على الجوال
ومزجت الزنك والاثلين=لعين الشيخ ابن حثلين
ومثله مايجي مثلين=وهمات العباد اشكال
لأن اللي ركز في يام=بفزعاته يهيم هيام
ويسري والعباد نيام=وله في يام عم وخال
وهو جد من اجداده=بنفس ارقام عداده
مع اللي شدت شداده=وساروا بالندى مشوال
بعكس اللي رمى الكلفه=وقرر بالنسب حلفه
ضغط له وانفقع بلفه=ولا له بالعرب مدخال
لان الاصل يبقى الاصل=على اللي مايقدم وصل
واخبر السهم راس ونصل=ويرمي خصمه اللي مال
ومذكر مع جشم عمدان=تشيل القصر في همدان
قبل دولة بني حمدان=وجيل من وراه اجيال
ودام عجيم قحطاني=فهو للطيب قبطاني
وثوبه فيه قيطاني=وصار بجسمهم تفصال
سلايل ناجعه ومعيض=وطيبه مايجي تبعيض
ولا له بالعرب تعويض=وخلق الله تجيك اشكال
ربوا بالجوف في نجران=مع اللي تسعد الضجران
ومحدن يطري الهجران=وظرفه صاح بالترحال
الاول مطلع العاشر=لدفع الصايل الكاشر
يهين الناس ويقاشر=وصالوا ضمن جمع صال
نخوهم جملة اهل الدين=لرد العسكر العادين
وثاروا للعدى هادين=وعادوا يوم شره زال
وبالثاني عشر هجري=سيول ظعونهم تجري
لنجد ونورها الفجري=زمول تتبع الزمال
على اول دولة ابن سعود =(وقذله) كونها الموعود
ولاجله درهم الجلعود=وصار لجيشهم غربال
وسارت يام زعلانه=وساقت نشرة اعلانه
لعين فلان وفلانه=خذوا عنها ثلاث امثال
ضحى الهده شياطيني=وبالجلسه سلاطيني
ولهم دار ومقاطيني=وقربه للعدى زلزال
ملاذ اللي لفى جالي=ويخاف حلول الاجالي
وخذى بالطيب فنجالي=وخوفه ماطرى بالبال
شيوخ الحكم لا ذوا به=مشت للقوم مجذوبه
قبل هوشات مشذوبه=بجيرة طيبين الفال
مادام الهوش مافاده=مشوا من نجد وانفاده
مثل تركي مع احفاده=بلا شور وبلا مرسال
يجونه دون سين وجيم=مدام القوم نسل عجيم
ملاذه ما يبي تنجيم=هلال من وراه هلال
تعاف الناس وكتاره=وبين الخلق تختاره
مدام الروح محتاره=ولا كل الديار جبال
تريد الامن والسلوى=وراحة راعي الـبلوى
وقــومٍ صـعــبــة الـمـلـوى=كـعـام الـعـايل اللي عـال
اذا قاد العرب راكان=زعيم وقايد الاركان
يفجر وسطهم بركان=وللصفراء تطيح اجال
ولد عام الثلاثيني=وثلثه صار ثلثيني
وسبع له براثيني=ونصف القرن صال وجال
وشاله عسكر الدوله=وسجنه هو بنادوله
وثمان سنين عدوا له=وظنوا مقتله بالحال
قصيده واسع الشهره=ماهو بالريم والمهره
ولا بالرقص والسهره=بجانب طيف مع فريال
ولكنه نهار الكود=وعلم بالعدى موكود
وعجه ثار عقب ركود=وخصمه مثل ابن هذال
وهو اللي صاغ تاريخه=وذكرنا صواريخه
غدى ينثر شماريخه=وغريسه في ذراه ضلال
وقبل الحين والحيني=على دربه فلاحيني
غدوا فيهم ذبيحيني=وربي يكتب الاجال
وشيخ كالبحر لا زام=وهو شيخ الكرام حزام
حصان بالعهد جزام=وعدى بالظعون اميال
وزول الفارس المقدام=وهدات الطويل اعدام
عقيد القوم يوم (قدام)=لجمع زارهم صوال
وكون (منيصفه) قاده=على الستين منقاده
وزال الثار واحقاده=وعبلان اثبته بأقوال
(وبالصلعه) خذى الكره=وسار لنصرة المره
شبيه الذيب في بره=فروس فوق راس الجال
وشيخ القوم فاخر به=مع اللي تشتهي حربه
وقاد القوم بالغربه=ورمحه بالشدايد طال
حروبه عدت الميه=تقل بالدرب مرميه
او انه وسط ردميه=وزمله ماوراه ابطال
وقبل السطح والمسطاح=مناخ (رضيمة) النطاح
وملك عريعر اللي طاح=وصارت دارهم منزال
وهذا مايبي تدريس=حدوثه في زمان جريس
يكرس شيمته تكريس=من آلحبيش دون اشكال
مع الدامر لنفخ الصور=وسيف ومانع ومنصور
وابن مكراد شاد قصور=مقامه طاول ام اوعال
وروس عجيم ترسانه=وصعب ذكر فرسانه
وفكر الخلق ولسانه=من شيوخ العرب تهتال
واقدم لك تحياتي=تجيك بجزل الابياتي
على رأيي ونياتي=وتسري بالعرب موال
قناتك هي قناة الطيب=من الميده الى التشطيب
تسوي للحشى ترطيب=وتحيي طبعنا اللي زال
اعادت طيب ماضينا=قبل تكثر مقاضينا
ويكبر سعر اراضينا=ونبعد عن نداه اميال
بها نقوة مزايانا=قبل تكثر خزايانا
ونشكي من رزايانا=ونمشي والركاب هزال
وتاريخ السلف شاشه=عزومه قبل رشاشه
وحوش الفقر وعشاشه=كساهم بالندى سربال
سلفنا فوق ماقالوا=هل الهرجات واحتالوا
الا ياثقل ماشالوا=وساروا بالحمول اميال
يدير اجدادنا قانون=شبيه البرد في كانون
وسيفه للغلط مسنون=وعرين الاسد فيه اشبال
سلومه تستر الجاره=مثل عبده وسنجاره
قبل درسه وفرجاره=وقبل الهاتف النقال
تسير بطاعة الوالد=وتبذل مالها التالد
وهذا مجدهم خالد=ويبقى والليال طوال
وتحفظ صنعة المعروف=وتقري ضيفها خاروف
وتخفي جفنها المطروف=ولاترضى الدنس للحال
تشوف لنفسها قيمه=ولا ترضى بترقيمه
وتنجح قبل تعقيمه=ولا ترسم على الصلصال
واشوف ربوعنا الساده=علينا داج موساده
وطاعت هرج حساده=وداجت قفو قيل وقال
هروجه بالجدود اعصار=تحاول تطمس اللي صار
وتجذب من وراه انصار=لعل غيومها تنجال
لان اللي فضى كيسه=وذكره تم تنكيسه
تبي تظهر عواكيسه=ولا له بالندى مثقال
لو انه من ظنى العجمان=بميدان الحروب ألمان
نشد وش قال ابن ولمان=وبدل حالته باحوال
يقول اللي مضى ماضي=يسبب زود الاحماضي
ويمنع زين الاغماضي=وكله مهزله وارذال
لأنه قافل بابه=ويرضى الهون لاحبابه
يهاب الطيب وأسبابه=ويكره طيبين الفال
وحرب الناس وطعونه=تعادل سدس ماعونه
ويبقى الطيب بظعونه=وتنزل في ذراه اجوال
يفوت العام مابه حرب=ولايخشى ظلام الدرب
ولو عمره قتال وكرب=فنوا محدن مكن شوال
تجي نصف السنه هده=على الذيدان منقده
تغير وتسرع الرده=ولا يقتل بها رجال
سبايب غيبة السلطان=يضيع الامن بالاوطان
وتظهر غلطة الغلطان=ونار الغبن والغربال
وغيابه عن فيافي نجد=يبي يقطع حبال المجد
ويرجد نار شره رجد=ويلقى الظلم له مدهال
وهذا في جميع الكون=مدامه بالبشر مسكون
اذا حكم البلد مركون=تضيع وتسقط الامال
وشوف سنين الامحالي=تثور بوقتنا الحالي
قبورٍ وسط الادحالي=جنايزها نساء واطفال
وعن نهب للعرب للهجن=شف اللي عندنا بالسجن
يعجنون المواتر عجن=زباله تعجز الزبال
ولا انفي عن زمان فات=وجود الجهل والافات
ونقص العلم والشوفات=وطاعون الجهل سلال
ويام بغالبه سنه=بوقت البرد والكنه
وراع الفضل والمنه=منحهم للهدى مدخال
وخل اللي ذكر كفره=وقال انه طفر طفره
مهو مشلخ ولا نفره=ويذكر بالضلال اشكال
وكان الكفر بدياره=بحايل غاب مسياره
ومحدن شاف ختياره=ولا له بالنفود ازوال
بمسكن طي ما بانه=ولا احدن شاف نيبانه
شبابه مثل شيبانه=ولا له بالديار اطلال
بملة ربنا الغفار=نصلي ما بنا كفار
ولا داهم ثلاث انفار=ولا فينا عروق خبال
لاجل نملا الديار اصنام=ونذبح للقبور اغنام
مثل ماقال ابن غنام=ولو قال العرب ماقال
مدامه باليمامة بان=وش اللي كفر العربان
ودلا يدفن القلبان=ويسري للجبل صوال
وترى اللي قيل بالتاريخ=كلام غالبه تكريخ
حصل له دهن مع تمريخ=بدهن الفيل والجيزال
نظنه من لهيب الصيف=عجز لا يضبط التوصيف
وصارت هرجته تخصيف=وعم معيض وابن رمال
واقول ان الجهل موجود=بنسل المرجله والجود
وغرس مات به عرجود=حرام اللي بقى ينشال
وترى اللي يستحق وسام=كلام الشيخ ابن بسام
ولكن الجميع اجسام=وصعب تقنع الجهال
وانا ما اسير في بدعه =من اللي واجب ردعه
واعيب الكذب والخدعه=واجنب والطريق اوحال
ولكني عطيت انذار=لهرج الطامع المهذار
ولا تبحث وراه اعذار=ولا تنظر لهم بإهمال
ترى اللي يفتل السبحه=ويكثر بالعرب نبحه
عيونه تنتظر ربحه=ويغلي سورة الانفال
يكز الظلف والحافر=ويقرى قاف مع غافر
ويترك مسلمك كافر=وتبلش بالخطيب الضال
ونيران الفتن تنهاب=وتنشر بيننا الارهاب
وشرع الواحد الوهاب=جعل ذنب الخروج جبال
ولكن مانحط قناع=ولا نسري بدون اقناع
لانه يشبه النعناع=ويرمي عن يديك اغلال
نبي نحيا بلا تكفير=ولا فيزه ولا تسفير
لان الرمز والتشفير=يبين بنظرة العقال
تكرر كل سبع عقود=ولا نسمع لها منقود
وفجأه ديننا مفقود=ونصير السيخ بالنيبال
بليا الهوش والتتنيح=وكثر القرط والتزنيح
لان الشوت والتجنيح=يزيد اهل الهبال هبال
وتكفير البشر بذره =وطالت وارتوى جذره
وصارت لعبة قذره=تكرر كل خمس اجيال
بلا مرقص وباراتي=وطتنا ست مراتي
على عدة ممراتي=تسوي مثل ابو مصقال
ومازالت تشيل انغام =وتفوع بفوعة الضرغام
وتقبس بالعباد ألغام=وتطلع بالظلام اذيال
متى يوضع لها طبلون=وفوقه قفل مع كيلون
بدال الضغط والقولون=ونلقى للخطا معدال
ومع تفكيرنا التعبان=نداري بيضة الثعبان
وتكثر بأوسط الشعبان=وصرنا مردبه وادغال
وكلامي يزعل الغافل=ويصبح خافقه جافل
وتاريخ العرب حافل=كما اللي صار بالصومال
وترى اللي ذاد عن ربعه=يعادل بالعرب سبعه
لان الـمــرجـلـه طـــبــعه=ولاحاسب لنقص المال
تحـيـه صـاغــها الـراوي=مدامـه لـلـمـثل قـاوي
بـريـح العـنـبـر الجـاوي=عـلـيـكـم عد سيل سال

[عبيد العرجاني]

يستاهل

الشيخ مشعل بن حثلين

و

الشيخ سلطان بن حثلين

وهذا قليلاً فيهم وصح لسانك ع القصيده الجزله