(((حي الجامعـــة و المرسلاتـــي))) قصيدة رائعة في الجمس لعبدالله ابن زويبن الحربي....

[مسعطر]

راكب اللي و النجوم اللامعاتـي=في سماهن و الصباح يشع بضيـه
بين حي الجامعـة و المرسلاتـي=واستدار امع الخطوط الدايريـة
ما ألتفت راعيـه يـم اللافتاتـي=حافظ كـل الخطـوط الريسيـة
أول أسمه بالثـلاث المفرداتـي=رقم خمسة بالحروف الأبجديـة
تـو لوحاتـه عليـه مركباتـي=صادرات من مرور الناصريـة
وارد تـوه حديـث مواصفاتـي=يلتهـب بديـه و يلمـع داخليـه
كن طبلونـه جهـاز مراقباتـي=في حدى المستشفيات المركزيـة
شاشـة لنباتهـا مثـل السفاتـي=للدمـاغ مخصصـة و الباطنيـة
تنكشف به بالضروف الطارياتي=دقة القلـب السريعـة و البطيـة
و كشنه الداخل زلـول ناعماتـي=قبتـه و أرضيـتـه و الجانبـيـة
و المراتب من جلود الزاحفاتـي=ما أدري هو جلد داب أو جلد حية
ما قطعت الشك ميـر مموهاتـي=مثل تمويـه البـدال العسكريـة
بديه أدهم و الخطـوط مذهباتـي=مثل عقد الماس في عنق الفتيـة
و الزوايا و الركـون مصفحاتـي=ما يله و الواجهـه مثـل الخليـة
بين شمعات صغـار مربعاتـي=و العلامـة وردة فـي مزهريـة
يوم مريت العيـون الساهراتـي=قوةٍ للأمن فـي حجـم السريـة
قبل ما آقف عندهم و أطلع إثباتي=صفو العسكر و دقوا لـه تحيـة
مشترينـه للديـار النازحـاتـي=و الخطوط المتعبـات السرمديـة
الطوال اللـي تشـق النايفاتـي=باتـلات مثـل بطـن البندقيـة
ما تخاويـه الريـاح الذاريـاتـي=و الوحش و الطايرات المروحيـة
كن له جنحان مثـل الطايراتـي=يرفعنـه فـوق مـدري جاذبيـة
وكن ماله من خلاف مساعداتـي=قـوة الماطـور ترفـع مقدميـة
و إن عطيت ابه الفجوج الخالياتي=فزته تعطيـك عـزم ومعنويـة
ما وقف يطبـخ بلوفـه ذايباتـي=و الشـراب مغلـق مـن تانكيـة
و إن نظر راعيه مع كل الجهاتي=ما يشوف الا الخـلا والمهمهيـة
للسراب وللمعاصيـر اعتماتـي=عبلةٍ جـردا وشمـسٍ صنقريـة
وأيس المسكين من تالي الحياتي=و أرتكى فوق الكفر يكتب وصية
كن جَلده جَلـد خيـل هاجماتـي=أول الغارة فرس شيخ الغزيـة
أن هجم قدم السبـاق الأولاتـي=يشتبك هو والعدا فـوق العبيـة
و إن رجع يثني خلاف التالياتـي=يقهر السبـق و يرجـع للرديـة
و إن كسب حم الذرا و المسرجاتي=ما يخيب ضن من قـال الحذيـة
غازيٍ يبغى النقى قبل الفواتـي=غاديٍ له عنـد عدوانـه شفيـة
أزعجنـه بالصيـاح الناعياتـي=كل ما نادى المنادي فـي سميـه
أتعجـب بالعلـوم الماضيـاتـي=و ألتفت في موتري و أذكر مزيـة
مع جراديح الحـزوم النابياتـي=كن حذفه للحصى حذف أهوشية
لا وطى له مروةٍ راحت شتاتـي=كل قطعة طيرت مثل الشضيـة

و سلامتكم

[راكان المحفوظي]

صح لسان شاعرها وناقلها وبيض الله وجهك على النقل الرائع

[عـسـاه خـيـر]

صح الله السانه . . ولاهنت اخوي مسعطر على هالنقل الرائع .

[مسعطر]

صح بدنك أخي راكان و أشكرك على

المرور

[مهرة النسيان]

صح لسانه ولسانك يامسعطر ..


وتشكر على النقل الجميل..

[مسعطر]

أشكرك أخي عساه خير على المرور.

[مسعطر]

أشكرك اختي مهرة على المرور.

[مبارك الجوفان]

صح لسان الشاعر
وتسلم يا اخوي مسعطر

[مسعطر]

أشكرك أخي مبارك الجوفان

على المرور.