قصيـــدة في اللــواء / حسن بن علي بن دشن العرجاني ... للشاعر / سعد العليمي القحطاني

[عرجاني وافتخر]

السلام عليكم ورحمة الله وبركاته



:



قصيده في اللواء / حسن بن علي بن دشن العــرجاني
قائد مجموعة اللواء الخـــاص بمنطــــقة نجــد



للشاعر / سعد بن عبدالله العليمي العايذي القحطاني

سر ياقلم واكتب جديدات الامثال=يوم استوى طرق البيوت الجزيله
اكتب على صدر الورق ماحوى البال=من فيض مخزون الهجوس الاصيله
لا دك هاجوسٍ مضامينه جزال=يروي ضما العطشان صافي هميله
غيثٍ يساقي كل راحل ونزال=من هاجسٍ جزل المعاني حصيله
مانيب أغني به على كل موال=أنا عن اللي مايناسب كفيله
إما صخرته في مواجيب الابطال=والا مدحت أهل الفعول الجليله
اللي لهم عند المواقيف مدخال=اليا اشتكى راع الجهد قل حيله
شروى الذي يحمد على طيب الافعال=يذكر ويعرف بالفعول المهيله
له وقفةٍ يدري بها كل رجال=وله فزعةٍ تشفي الكبود العليله
ذراه يذري عن هبوب اشهب اللال=ومتونه تشيل الحمول الثقيله
في لازم الاقراب يرخص له الحال=وفي لازم الاجناب كفه طويله
صيته تعلا فوق فالنايف العال=وفعوله اثبات الكلام ودليله
ماهوب يخفى عن بخيصين الاحوال=الجدي بالاعيان كلن يخيله
هذا حسن ياللي تبي صدق الاقوال=هذا حسن زبن الحمول الثقيله
من لا انجبت مثله فلا تنجب عيال=هذا الذي لاقيل يسوى قبيله
صحيح من قال البشر عدة اشكال=رغم التشابه بالدماء والفصيله
احدن خلقه الله على قد الاحوال=يادوب يلقى في حياته حصيله
واحدن خلقه الله مع الناس تمثال=ماغير صورة حال من غير حيله
واحدن خلقه الله جمل كل الاحمال=واحدن ويغني عن مناعير جيله
وابوعلي نادر على كثر الاجيال=قليل يلقى فالخلايق مثيله
فعله غدا بين العرب مضرب امثال=للي يبي روس الجبال الطويله
وافي ويوفي بالوجب كل مكيال=ومهما نقول من المدايح قليله
لاصار عرجاني ووقفاته جزال=وشلون مايكسب سنام الفضيله
ياطيب فعل معرّب الجد والخال=انشهد انه عز من ينتمي له
على خطى ممشى كريمين الاسبال=يمشي وما تنقل متونه يشيله
واليا بنى في قمة المجد منزال=ماهي على شروى حسن مستحيله
أبوه قبله قد بنى مجد الافعال=يوم الليالي بين عدله وميله
بيبان بيته ماتقفّل بالاقفال=مفتوح باب البيت للي يجيله
ديوان بيته للرجاجيل مدهال=دايم وهذا حال يومه وليله
يبذل ويرخص غالي الحال والمال=كله على شان العلوم الجميله
وذكره بقى بين النشاما ولا زال=على مدى عمر السنين الطويله
ولا مات من خلّف على الطيب رجال=وابو علي ساس الكرم ينتمي له
قلته وانا لاهل المواجيب ميّال=امدح فعول اهل الفعول النبيله
وختامها ماحل من حول وحال=صلوا على محمد رسول الفضيله

:

صح لســـان الشاعر وبيـــّــض الله وجهه
ويستاهل أبو علي المدح ويـــــــــــــزهاه


تح ـياتي

[لبيك]

اي والله يزهاه


كفووووو ابن عمنا

و صح لسان العليمي على القصيده الرائعه



افتخر
كثير الشكر لروحك الطيبه

[جلمد المصاقيل]

صح لسان الشاعر سعد القحطاني

ويستاهل المدح اللواء / حسن بن علي بن دشن العــرجاني

[الملتاع]

صح لسانك يا الغالي على نقل القصيدة الرااائعة ويستاهل المدح اللواء حسن بن دشن

[ابوفيصل الشمري]

صح لسان الشاعر سعد القحطاني

ويستاهل المدح اللواء / حسن بن علي بن دشن العــرجاني