حكمة مرشد البذالي ,,

[الجلغم العبدلي المطيري]

الشاعر الكبير المرحوم بأذن الله مرشد البذالي

وكم فيها من الحكم والموعظه ..

1 قل لأبـو نـواف مافيهـا عـذار
إنتويـنـا بالسنـافـي للمسـيـر

2 كان أبو نايف تحصّل لـه مـدار
دوره وإلا دفعنـا لــه بشـيـر

3 قل لأبن عون الوعد تالي النهـار
بالمثلـث لايـسـج ولا يحـيـر

4 إعتجل يـوم الهـوا ذعـذع ودار
إترك الراضه وعذرن فيـه ميـر

5 كان عندك بالبنـاء تالـي جـدار
أجلـه والعيـد مافيـه إتعمـيـر

6 يم أبو سلطـان عـزم الفكـر دار
يـم غيـره لا تقـول ولا تشيـر

7 خلهن يمشـن مـن الديـره لـدار
المواتـر صافيـه والـدرب قيـر

8 مثل ابو سلطان لـه حـق يـزار
جيتـه بالعيـد مظهرهـا كبـيـر

9 سجتن عنـده تزيـد بهـا العمـار
يدله الخاطـر ويرتـاح الضميـر

10 في محل كـد جلسنـا بـه مـرار
مدهـل الحكـام والزاعـل عثيـر

11 مجلـس يؤخـذ بعيـن الأعتبـار
/ صاحبه ياعز منهو لـه عشيـر

12 دلـة فيهـا مـن الحبشـي بهـار
ومنسف يشبع ضيوفـه والقصيـر

13 نادر له نطحت الموجـب شعـار
فاهمـن بالمرجلـه درس غزيـر

14 ما لبس ثـوب الشهامـه مستعـار
وارث طيبه مـن الوجـه السفيـر

15 أحمد اللـي لـه تواريخـن قـرار
بالكـرم وبسلـة السيـف الشقيـر

16 إنشـد التاريـخ يعطيـك إختبـار
عـن تواريـخ السديـري بتعبيـر

17 أقـر ديـوان الخليفـه كـان دار
شف مقاله عنـه بالخـط الأخيـر

18 شف مراكيضه على قـب المهـار
يوم سفك الدم غـادن لـه هديـر

19 كان أبو سلطـان همساتـه كبـار
تابعن عـود علـى دربـه يسيـر

20 والعلوم كبـار وأحلاهـا القصـار
زبدة الموضوع وأحـلاه القصيـر

21 مابنيـت الملحمـه بيتـن جـدار
كود ناسبها علـى فعلـن شهيـر

22 كان للمعروف هالوقـت إشتهـار
السديري مع هل الجـودا خشيـر

23 ما بنى السمعه على ملس العـذار
ما بناهـا إلا علـى فعلـن ثميـر

24 أنشد اللي سمـع بفعـول الكبـار
نور الأول يقتبـس منـه الأخيـر

25 يوم وقتي عقب أبو زيـد إستـدار
إجتبرت بجابـر العظـم الكسيـر

26 شمت للي فيه خصلاتـن إخيـار
الذكى والدين والعـرض الستيـر

27 لـي بربعتهـم معـزه وإفتخـار
ربعـة الطيـب تنسيـك الحقيـر

28 أفهم الطيب الخنيني مـن البخـار
يوم فاح المسـك شميـت العبيـر

29 قالها اللي له بعرف النـاس كـار
يفهم الشبر الطويل مـن القصيـر

30 الرجال طيور توصـف للحـرار
كل طيرن فـي جناحينـه يطيـر

31 وين طيـر يحتريلـه كـل جـار
وين طيـر مايصيـد إلا الشعيـر

32 لو تقـول إن الشجاعـه بالطيـار
كان فضلنا القطـاه بمـا يصيـر

33 وين طير وإن هوّا شـق الستـار
وين طير يذعره صوت الصفيـر

34 النداوي له علـى الصيـد إقتـدار
والحمامـه بالمحـل وتستـديـر

35 وإن جهلت الزين والجنس الدمـار
إنشد اللي فـي معرفتهـن خبيـر

36 أخذ لك منـي كلامـن بإختصـار
فرق بين الصوف من سلك الحرير

37 فرق بين الحب وأنخـال الشـوار
أصلهن واحد لاشك الـذوق غيـر

38 ربعة الطيـب تزيـدك بإنتصـار
ترفعك رفع العمـد بيتـن نظيـر

39 والردي عرفه مثـل بيـر هيـار
تنقبـر فيهـا ويدفنـك الحفـيـر

40 حقة الطيب تجيـك مـن الفقـار
والردي يعطيك كرسـوع البعيـر

41 لا ترابـع واحـدن بالعهـد بـار
وإن وفى له مـرة خيـره كثيـر

42 التجـارب خلهـا لـك مستشـار
لاتبي غير التجارب لـك شويـر

43 لاتجـي مدخـل يدينـه بالخبـار
مالقى صيده لقـى دابـن ضريـر

44 والرجال إبهم فهد وإبهـم حمـار
وأنت فكر بالفهـود مـن الحميـر

45 وانت في دورك عليك الـدور دار
لاتحسـب إنـك مخـلا يالفقيـر

46 وقر العالـم وتلقـى لـك وقـار
وإن حقر حقرت لوك إبـن أميـر

47 والشرف لايستـوي فيـه إنهيـار
الشرف هو مقضب السيف الشطير

48 والقناعة مرجلة والضعـف عـار
وأطلب النجدة من الوالـي القديـر

49 لاتجـي للنـاس طلباتـك إكثـار
كـل ديـوان تجـي يمـه مغيـر

50 ما خبرنا بأهـل الشحـذه تجـار
غير فقره كل نفـس لـه تعييـر

51 خل عـز النفـس للعـوره ستـار
لو فراشك في طرف بيتك حصير

52 وأنت للعـوده مـن الله بإنتظـار
واحـدن مالـه وكيـل ولا مديـر

53 مـدة الله تمتلـي منهـا النـقـار
تجعـل الغـدران بالملـزم تحيـر

54 يجعل الوادي مريـف بالخضـار
عقب ماهو يابـس قشعـه هشيـر

55 الكريم معـان والفـارس مجـار
مدّي الواجـب ونطـاح الذخيـر

56 الغنـى بالـذل مذمـوم مــرار
والفقـر بالعـز لأمجـادك يثيـر

57 طربة الدنيا مثـل لعـب القمـار
لو جمعت المال شفت تالي المصير

58 لو جمعت من الذهب حمل القطار
عند نزح الروح ما أنت بي له دبير

59 صار بين الوارثيـن بـلا مشـار
ينعزل حق الكبير مـن الصغيـر

60 وأنت حقك خامتـن عشريـن وار
ذيك هي حقـك ولا فيهـا خشيـر

61 فصلوا منها الكفن هـو والـوزار
إقرشوا بك يـم مثـواك الأخيـر

62 وإسدحوك بحفرة في وسط غـار
يطـردك منكـر وقدامـك نكيـر

63 واهني اللي مشـى طلـق شكـار
سالم من ظلم عمر ومـن عميـر

64 لـوّه بالدنيـا بحلاّتـن إعـسـار
يرتجـي بالآخـره فرحـة نظيـر

65 مـن رحمـة الله وقبلـن العـذار
رحمة الله تغفـر الذنـب الخطيـر

66 والأثيم من الصراط أقرش وعـار
وإن سلم من ويل طاح بزمهريـر

67 ياإلهـي كـان مـافـيّ إقـتـدار
ألتجي في رحمتك وأنـت المجيـر

68 الشباب أقفى وأنـا بآخـر نهـار
وأرتجي فزعتـك يانعـم الشويـر

وسلامتكمممممممممممممممم

[فزاع]

صح لسانك يالعبدلي ورحم الله الشاعر البذالي قصيدة رائعة لا هنت يالقرم على الإختيار و النقل.

[حبيب]

صح اللسااانك يا العبدلي والله يرحم الشاااااعر


ولاهنت على الاختيااار الموفق


تحياااتي

[محمد الشامري]

صح لسانك يالمطيري

ولسان شاعرها

ولاهنت على النقل الجميل للقصيده الجميله

[محمد الهتلاني]

لا هنت يا العبدلي على القصيدة الرائعة صح لسانك

[فهد بن محسن]

تسلم يا العبدلي والله يرحم الشاااااعر مرشد البذال


ولاهنت على الاختيااار الموفق


تحياااتي لك

[حمد القحطاني]

الله يرحم البذال
صار قلبي وعيني بالعذاب أخشرا \\\\\\\\\\\\\\\\ كل ماحن قلبي هل دمعي وراه

[راكان اليامي]

لاهنت ياحمر العين ومليون نعم في البذالي والله يرحمه