(( عــلــيـا ))

[عايض الوقدان]

مساء الورد . . .


اضع بين ايديكم رائعه من روائع الرائع بندر بن محيا . . .


شاعر مبدع وانا من اشد المعجبين باسلوبه الشعري . . .


,
,
,

تهب الريح فـ أوراق الشجر ويغرد العصفور=وأنا تحت الهجير وصمتي أحياناً يكون ظلال
وتتكسر خلاخيل الرعد في بارق ٍ مغرور=وأحس اني تكسّرت وبقى في داخلي رجال
أطش بفم هذا الضي حزن وبعض من ديجور=وأغمض جفن من تحته سديم ٍ واقف ٍ مامال
يالارض أخذي سنابل وجهي اللي مانبت فيْ البور=تعب حتى أساريره غدت بعد الغياب أطلال!
خذي بعض الجهات ومن ملامح شاعر ٍ مجبور=وهو يذبح من عروق الزمن ساعه على الترحال
يالارض البارحه همّ الستاير والنجف والدور =وحزن أمي وجوعي والفراغ ودفتر ٍ دجال
خذت أغلى الدّموع مْن العيون وخاطري مكسور =وصوتي ينسكب فوق الورق واحس به لاسال
قبل ذيك المدينه والنعاس وبابها المبتور=.تعلمت البداوه والحضاره هي سراب اللال
أمانه قولي لـ(عليا) قراح الما وطهر النور=تراني طفل مامل البكا لو ملت الأطفال!
طفل مات بهدبها والخدود وشعرها المنثور =قبل يمشي بزهو ويلبس الغتره بدون عقال!
طفل كان يتشيطن فيْ السطوح ويدِّرج فـ السور =ويسرح فيْ النياق مواعد ٍ عشره وهو جمال
يشوف بعين عليا صورته وبثغرها البلور=.ويْتنفس غلاها ويهذي لامرّته بالشــال
يالارض الوقت خليّته مزيف واحترف لي دور =.وأنا مالي سوى عليا وحلمي والهوى القتال
فبعض أحيان أحس اني كذا ..شاعر وله جمهور=وأحس اني في بعض أحيان أقول أشياء ماتنقال
ورى هذا الكلام يحسّب الشاعر بليد شعور=.لوى معصم حديثه والقلم بيدينه الأغلال؟!
وخيول ٍ تركض بصدري وتجمح ويْغشاها عثور=وتعاود ركضها عقب المطيح ويرتجل خيّال
يجيني من قبل هالحال ..حال..وحالي المستور=رضيت بقسمتي لو "نصف تفاحه" على ايّة حال
يقولون البشر عنتر وهو عنتر يخاف الثور =وأنا أقول المخافه وارده في سيرة الابطال!
أجل ..ملّيت أنوّخ حيرتي لعتابي المقهور=ومليت آتسلل فالسطور المظلمه واختال
يالارض أخذي يديني مالقيت اللي يمد الشور =وأنا تحت الهجير وصمتي احياناً يكون ظلال

[عـسـاه خـيـر]

ررائع يا عايض ررائع في النصوص اللي تقدمها او بـ اختيارك !؟

صح السانك والسان شاعرها المميز / بندر بن محيا

قصيده اخذت من الخيال بشكل غير طبيعي وهذا ما يعطي للقصيده جمال أخر

الف شكر لك يا عايض

[عايض الوقدان]

المشاركة الأصلية كتبت بواسطة عـسـاه خـيـر

ررائع يا عايض ررائع في النصوص اللي تقدمها او بـ اختيارك !؟

صح السانك والسان شاعرها المميز / بندر بن محيا

قصيده اخذت من الخيال بشكل غير طبيعي وهذا ما يعطي للقصيده جمال أخر

الف شكر لك يا عايض

عساه خير /


صح بدنك ولا هنت على المرور الجميل والرااائع

مرورك شرف متصفحتي / لا خلا ولا عدم , , ,