يا صاحبي ماني براعي مهاداه

[محمد الهتلاني]

يا صاحبي ماني براعي مهاداه=اما ارضني والا اجفني واستخيري
اما تعال وما طلبناك عطناه=والا تروح وجعل دربك سفيري
من شق شق يا اريش العين يرفاه=وانت الذي شقيت خافي ضميري
تضحك وانا صملان قلبي مطواه=تقول لي لين الفلك يستديري
ما نيب من يطرد سراب بمظماه=شاف السراب ويحسب انه غديري
عيني على شوف الولايف مضراه=جزوع لا شفت الجفا من عشيري
ما يستوي حب بليا مراضاه=بيني وبينك يالغضي ما يصيري