السلام عليكم ورحمة اللة وبركاتة
اذا تسمحون لاخوكم ابعطيكم بعض السوالف والمواقف اللى مريت بها او بعض الاخوان فى المقانيص بعضها قديم لة اكثر من 20سنة ولاكن بعض المواقف والتجارب ماتنسى بسهولة امل سعة صدوركم لطول بعض السوالف كما اتمنى المعذرة من الاخوة اللى ما يعرفون الاماكن اللى بنجيب ذكرها خاصة من الاخوة الغير سعوديين,على العموم امل ان تحوز على رضاكم,ان شفنا فية مرور من الاخوة الاعضاء وبناء على تعليقاتهم واقتراحاتهم نقرر الاستمرار او التوقف والان الى الاولى:
تقريبا فى عام 1984قررت مع واحد من عيال عمى اللة يرحمة ويسكنة الجنة المقناص للرملة .استأذنت من الوالد الذى رفض وبشدة غير معتادة لانة اللة يحيية ضارى على المقانيص ولاهوب يخالف الى طريت لة المقناص. الشاهد انى طلبتة ورجيتة اخيرا وافق وقال لى اسمع وانا ابوك,السبوع اللى فات قال لى الظابط الكبير فلان عن قصة صارت ل8رجاجيل قانصين الرملة على 3سيارات وفى ليلة وهم على العشاء جاهم موتر ما فية الا رجال واحد ومعة ولد شباب 14سنة او حولها ضيفوهم وبعد العشاء بغوا الضيوف المسرا قالوا لهم وين تروحون بهاليل اصبحو والصباح رباح . تعذر الضيف بربعهم اللى مضيعين محلهم وانهم متاخرين عليهم وسروا.
بعد ماراحو قال واحد من القنوص يالربع انا مستحس من هالرجال فى هالمقطعة ولحالة مع هالشاب واللة انهم حنشل وبيسرون علينا.قاموا القنوص يهزونة يالرخمة يالخواف وقاموا كا واحد ينتخى بندقة واللى رشاشة,تعذر منهم وقال انا ابا ابعد شوى والصباح رباح,يقول سرا الرجال على واحد من المواتر وهو مطفى النور عشان لو كان الحنشل اللى هو خايف منهم يراقبونة الا هم مايلاحظون هروبة.المهم الرجال مشى لة 10كيلو او حولها وبغى ينام بغى ينام ماش قلبة على خوياة ,يقول يوم صار الليل ليلين والا يسمع الرمى على خواياة ويطمر على موترة يبى يفزع لهم ويوم فكر ودبرة اللة قال لعمرة لانى لاحق عليهم وبعدين وش اسوى لو رحت,قعد يحترق ويحترق الا وقف الرمى شوى والا انوار السيارات وهى تستدير يمكن يدورونة . المهم شوى وشوى والاماعاد فية لاحس ولانور وهو يصبر الى ان طلع النور وهوعلى نار اللة لايبلاناولاايكم ويوم وصل اخواياة والا هم علىفرشهم مذبحين ومسروقين يوم بغى ينهبل ويوم رد لة فكرة والى يذكر سيارات وافتهم قبل يومين قنوص من قطروالا يمشى على جرتهم الى ان وصلهم وهو يفزعهم وقامو الالجوادومشت معة سيارتين الى وصلوا لهم احد المراكز الحدودية .الرلجال بلغهم بالسالفة وجات الاوامروطلعت الطيارات ودورو عن الحنشل ما لقوهم شالو الجثث ورجعوا بها وانا ابوك هذا اللى يخلينى اقول لك لا تروح. انا ذيك الايام فى الجامعة حوالى 20 او21 سنة ومتحمس للمطاريش و القناصة,طمنت الوالد وسمح لى.
المهم مشيت من الرياض انا مع ولد عمى اللة يرحمة وصبى يمانى مثل عمرى على شاص ومواعدين ربعنا 7 رجاجيل ذيابه شروا هالوجية معهم شاصين وحبة وربع شراع,كان هاك الايام مشاكل وتفتيش وبهذلة بالحيل فى خط السليل,ربعنا خايفين من المراكز والتفتيش فتركوا سلاحهم كلة وجابوا السلق اللة يكرمكم واللة انى اذكر هىك السنة كنا10 والسلق14 اىواللة يارجال اخوكم شارى لة رشاش نيكل توها جاية الرياض ذيك الايام اخذتة معى وسدس ايطالى ربع ما يذبح دجاجة هذا كل السلاح اللى معنا.
وصلنا السليلحول العشاء والى الربع مجهز لهم العشى واحد من جماعتهم ساكن فى السليل وتعشينا واللى علينا بالخير وامسينا .
اصبحنا وافطرنا وسرحنا مواعدين لنا دليلة من حرس الحدود حول شرورة , وحنا نروح مع هاك الجهة لان القنوص ما يجونها بعيدة بالحيل ,المهم وصلنا والى الدليلة معة موترين وخمسة رجاجيل,يوم زان الكيف.دخلنا البر قبل مانوصل شرورة ب50كيلو بعد مامونا السيارات والمقاضى.واللة ياوناسة واللة ياكيف ليتكم معنا واللة, مقناصنا نهار 15 فى الصبح و10 عقب العصر ورجلية. المهم بعد 4 ايام اعتذر الدليلة وقال لازم يرجعون عشان الدوام ووععدونا انهم يرجون يوم الاربعاء لان هاك اليوم كان جمعة.
اصبحنا السبت وقنصنا وانبسطنا مثل العادة,ياليتكم يالربع تشوفون القدور اللى على النارواللة ان القدر اللى للسلق مثل قدرنا,بس يستاهلون تبيض الوجة.ويوم جا الليل واللة بدت النفوس شوى تقول حسينا السواليف ماش الربع حسوا شوى بعد مانقصنا 5 مرة وحدة. المهم بكرة النهار كلش تمام وانبسطنا وصدنا وطرد وتصوير فديو واللة انة عندى بس اعذرونى ماعرف كيف اعرض لكم الصور والا الفيديو.المهم يوم جا الليل وضاقت صدورنا قلنا تدرون حنا جايين نصيد نبى نقنص فى الليل ونستانس,قمنا واللة ونرفع واحد من الشاصات على راس طعس ونركب على التندة سفتى برتقالى يشوفة الواحد من 10كيلو, واللة ونطلع على ثلاث سيارات كل سيارة مع طريق واليمانى عند العزبة . طبعا هاك الايام مافية ماجلان ولااجهزة اتصال ولاثريا, المهم بعد اكثر من ساعة لاحظنا نور سيارة رابعة غير سياراتنا الربع كلهم لاحظوا السيارة وكلنا رجعنا للعزبة والصدفة سيارتنا كانت اخر سيارة وصلت .يا اخوان واللة ان القصة حقيقية وصارت لى شخصيا. يوم نزلنا والاالسيارة وصلت قبلنا والا فيها رجالين,الرشاش هذا وقتة,خذة اللى كان معى فى السيارة وتوزا ورا السيارات وصوب الرشاش على واحد اتفقت انا واياة علبة واروح انا واسلم عليهم ويوم جيت ابجلس وامد المسدس الصغير لواحد من الربع جنب الضيف الثانى بدون مايحسون .المهم سولفنا مع الرجاجيل ولا هم من قطر يقولون انهم من خويا واحد من ال ثانى وان معهم سيارة متعطلة وهم توهم جايين من شرورة بقطع الغيار وانهم يوم شافو السفتى توقعوا اننا ربعهم ومغيرين مكانهم .والبنزين عندهم قليل وخافوا يتعطلون المهم يالربع الكلام بين الرجالين فية تناقضات غريبة ويترددون في الكلام وحالتهم ياجماعة الخير ماتصدق الثنين خلق اللة وفرق واحد الثوب تقل توة جاى من الكواى وش النظافة وش البياض وش هاك الشماغ والثانى واللة انك تحلف انة ماطب الحمام منسين وملابسة تقول عامل فففففففففففففففففى ورشة.
المهم قلنا ابشرو بالخير وانا اقوم لليمانى واحرصةعلى موترهم عبة بنزين لاكن فتشة وعلمنى وشفية ,رجع اليمانى بعد ما تفقد الموتر والى فية رشاشين فى الغمارة والبنزين مليان مايحتاجلة شى والى فية جركن ازرق كبير وشبك حمام يوم تقول ارتحت قلت هذولا قنوص وذا شبك الحمام معهم,قلطنا العشاء مير يلمسونة تلميس تقول توهم متعشين وقاموا وبغيناهم وتعذروا بخوياهم ومشوا.واللة يالربع ثوانى بدون مبالغة ثوانى ولانشوف لهم اىنور.
سبحان اللة الفلم اللى قالة لى الوالد كنة ينعاد قدامى بالكربون ,وانا مسولف لربعى بالسالفة اللى قالها لى الوالد.جلسنا نتشاور وسبحان اللة نفس المشاهد تتكرر وقام بعض الاخوان يقول يالخوافين يالجبناء, المهم الربع بينامون ولا همهم ولاشى وين انا ,وين كلام الوالد وين تحريصة.
المهم قمت انا واثنين قلنا ما ننام ولاكن مانقعد نحتريهم ونشغل ونلركب على جرتهم 40 كيلو ومشيهم مثل رى البندق مايلف ابد, المهم رجعنا للعزبة ونمنا وكملنا مقناصنا من غير شر والى الان ماندرى وش قصتهم.
طولنا عليكم اعذرونا ولكن عسى اعجبتكم واستفدتم وتعبى على الكى بورد مايروح فاضى,باللة يااخوان اللى مستمتع يشاركنا بتحليلة لقصتهم.
تحياتى,,ابو فهد
(((منقووووووله)))
04-12-2006, 12:22 PM
العرض العادي
المواضيع المتشابهه
