|
قصيدة مرثية في ابوفيصل رحمه الله
ابشع خبر في الارض لجوا به النـاس=رحيل ابو فيصل ضحى يـوم الاثنيـن
منه يحـق لخاطـري يـوم ينحـاس=ومن حقها تعصى علي دمعـة العيـن
تبكي على فرقا الفهد طيـب السـاس=وتبكي مع عينـي اعيـون الملاييـن
اي والله نبكي حزن من قلب واحساس=على الفهد نـور الديـار وذرى الديـن
الحاكـم اللـي يعتبـر للعـرب راس=ويعيش في ظله اشعـوب وسلاطيـن
سجل له التاريـخ فـي كـل كـراس=للمجـد وافعـال الشهامـه عنـاويـن
معـالـم امـجـاده اجــدادٍ ودراس=غيث شمـل لدنيـن خيـره ولقصيـن
ياما علـى روس العـدى بالقـدم داس=وياما كسب جـولات شهـب المياديـن
لاجـاء نهـار فيـه الاريـاق يبـاس=يرسي وياقف وقفـة تقضـي الديـن
وشيخ من اطبوعه عطوف وحسـاس=على اليتامـا والضعـوف المساكيـن
وفكره على شعبـه رقيـب وحـراس=سـور يـذري دولـتـه والموالـيـن
وصرنا بعهـده للحضـارات نبـراس=تظـرب بهـا الامثـال دار الحرميـن
من قبل ابو فيصل كساهـا باالامـاس=وثوب الجمال اربـع سنيـن وعقديـن
ومن قبل ابو فيصل جعل حمر الاطعاس=خضـر تشابـه يانعـات البساتـيـن
ومن وزع المصحف على كل الاجناس=ومن سل سيفه دون مسجـد فلسطيـن
وشلون مانبكيه من قلـب واحسـاس=فخرٍ غدابـه عـام ستـه وعشريـن
ولايعتبر نعـي الفهـد مبتـدى يـاس=عاداتنـا في وجـه الاحـداث قاسيـن
وان غاب نوماس بدى وجـه نومـاس=تاريخ دولتنـا مـن اسنيـن وسنيـن
ومن فضل ربي ما على المملكة بـاس=مادام ابـو متعـب وسلطـان حييـن
حكامنـا لباسـة الـدرع والـطـاس=اخوان نـوره قمـع روس المعاديـن
نـدر حـرار فـوق الاوكـار جـلاس=مادامهـم حكامنـا حضـنـا زيــن
نبقى بنعمة الامـن والديـن غطـاس=والعـز والرفعـه وعـدل الموازيـن
وختام قولـي عـد ماهـب نسنـاس=الحمـد للـي ننحنـي لـه مصلـين
الشاعر| عبدالله بن مرضي الودعاني
التعديل الأخير تم بواسطة : عبدالله الودعاني بتاريخ 08-03-2006 الساعة 12:57 AM.
|
08-03-2006, 12:31 AM
العرض العادي
المواضيع المتشابهه
