أسعد الله اوقاتكم كلها
اليوم اخترت لكم قصيده لن أجعل لها مقدمه لأنها من النوع اللذي لايقبل المقدمات ,
وأقل ما أقول عنها إنها : كتلة مشاعر
/
؛
/
ياللي ورى حـدب المحانـي تمثنيـت=قلي كم اتلفـت بمحبتـك وافنيـت ؟!
وانـا هويتـك للنخـاع وعشقـتـك=انشهـد انـي يـوم حبيـت حبـيـت
ياما كتبـت انـي مخـاف المفـارق=وياما كتبت مـن الشمـوخ وتحديـت
طلعتنـي قـدام نفسـي ولا شــي=اسبلت دمعـي لآخـره يـوم قفيـت
والحين ماكني من اسبابـك افلسـت=وكني ماحبيتك وكنـي ماضحّيـت !!
اتمرنـي مـر الغـريـم لغريـمـه=اموت واعرف ياغلا ويش سويـت ؟!
(خنتك ؟ تجاهلتك ؟ ظلمتك ؟ عصيتك ؟=قصرت في حقك ؟ جرحتك ؟ تخليت) ؟
(ماسرع ذكرت انـي احـب اتسامـح=وماسرع نسيت اني لا صديت صديـت)
مرضـت فغيابـك ثلاثـيـن ليـلـه=مالك عذر ياصاحبـي يـوم ماجيـت
ان كنت تحسبني من حساب الاحيـاء=فأين حق العشره وجيـرة البيـت ؟!
وان كنت تحسبني من حساب الاموات=فأين وصـل القبـر وزيـارة الميـت
للمبدع العذب / فهد الصعـّاق المري
وسلامة قلوبكم