مرثيااات "ضنـــــا مـــــرزوق" للأمير الراحل: جابر الأحمد الصباح رحمه الله...

[بنت ابيها]

"بسم الله الرحمن الرحيم"
السلام عليكم ورحمة الله وبركاته...

مرثيااات "ضنـــــا مـــــرزوق" للأمير الراحل: جابر الأحمد الصباح رحمه الله...

هاذي بعض المرثيات لبعض شعراااء القبيلة،،، واللي عنده مرثيه لامير القلوب لا يحرمنا أيها بشرط يكون كاتبها "عجمـــــــي" أو "يـــامــــــي"



مرثيه الشاعر:"حمد العزب" مقدم برنامج ديوانية شعراء النبط...

يا الله يا اللي كلنا نستجيره=يا من بيديه ارزاق خلقه ولاجال
يا خالق كونه وبأمره يديره=يا من طلبنا العفو من والأمهال
انك تصبّرنا.. وبالصبر خيره=واجبر عزانا يا الولي عالم الحال
مرحوم يا من عم شعبه بخيره=وعاشوا بخير ونعمةٍ مالها امثال
ومرحوم ياللي به على الشعب غيره=ماحب ينقصهم من قديم ولا زال
ويبكي عليه اللي عيونه ضريره=الشايب اللي طاح ماعنده اعيال
مكانهم قلب الامير ونظيره=والهم حساب العم والأبو والخال
شعبه بقلبه من كبير وصغيره=قضا حياته يبذل الحال والمال
دعواتكم يا أهل الوجيه السفيره=يا مرتّلين آيات عمّا والأنفال
ادعو عسا الله من عذابه يجيره=ويحط له من هل الخير مدخال
ليته يطالع يوم صارت حشيره=يوم النعش قفّا وللقبر ينشال
شالوه من بين الجموع الغفيره=وبكوا عليه وقفّوا والبكا طال
هلّوا عليه من الدموع الغزيره=من يوم شافوا فوقه الرمل ينهال
بكوا على سيفٍ غمد في جفيره=سيفٍ بيوم الواجبه يشعل اشعال
اللي وقف يوم الليال المريره=وقف بحزم وعزم ميقاف الابطال
يوم الزمان اركا علينا سعيره=وقل الرفيق وحدنا للشهب اللال
وقف بوجه اهل النفوس الحقيره=جحادة المعروف واطين الارذال
وعسا البقا في مواصلين المسيره=حكامها من عادها بر ورمال
آل الصباح اسنادها والذخيره=نسل الصباح أهل المواقف والأفعال
مع شعبهم صاروا اخوان وعشيره=كن الجميع عياله حرمه ورجال
وعلى العدو.. مثل السيوف الشطيره=وعز الصديق اللي عليه الدهر مال
حكم عساه يدوم خير وبريره=عسا السعد له دايم الدوم بإقبال
وعاش الكويت وعاش شعبه وأميره=دار ٍعلى هلها لها خير وافضال
وصلوا على اشرف من طلع بالجزيره=على النبي صليت ما سايل ٍسال
صلوا عليه إعداد نبت البذيره=وإعداد ما يمطر من الوبل همال

[بنت ابيها]

وهذي مرثية للشاعر: "حسن الرحيان"...

دسمان جيته والفجيعه تغطيه=يلبس سواد ولفته مظلماته
وقفت عنده قلت يمكن اواسيه=ويمكن احصل شي من ذكرياته
وطول وقوفي عند بابه واناجيه=وجاوبني القصر العظيم بسكاته
وعندي على بعض القوافي مشاريه=ودي اطوع حرفها وكلماته
وادري ولا كل الدواوين توفيه=ولا لغات الخلق ومجلداته
لكن بصدري شي ما اقدر اخفيه=واخاف صدري ينفجر بزفراته
وحزني تمكن وسط قلبي ويلويه=وروحي تعزي ذاتها في وفاته
ودمعي تحدر قلت ماني مداريه=ابكي وانا اذكر كل طيب بصفاته
اللي حكم بالشعب عدل يساويه=وارسى دعايم عزته بالتفافه
وقبل الصلاة يقوم لله يدعيه=يارب تقبل دعوته في صلاته
جابر تسامى والتواضع تساميه=واشمخ شموخ الروس لحظة ثباته
جابر حكيم العرب صارت باساميه=وعند اصعب الحزات يجمع شتاته
حكيم راي اعتز باسمه وطاريه=يعطي خفا ما يلتفت في هباته
وتنصى السفينة بالمصاعب موانيه=ويعلم الاجيال بملاحظاته
انجاز واحد بين الاعمال يكفيه=لكن طموحه فوق يشبه سماته
وابعد بقاع الارض جاها مناديه=وتحجج المحتاج دفعة زكاته
ما اكثر شعوب طالها فضل اياديه=من دون منه واسألوا عن وصاته
وابسط هموم الناس همه ويعنيه=ويكرم الانسان بمعاملاته
جابر ولي ايتام والله واليه=وابو الفقير اللي صعيبه حياته
وابو الارامل والضعيف احتمى فيه=جابر عليهم كان يضفي عباته
يا جابر قلوب المخاليق لبيه=لبيه قلبك لو فقدنا دقاته
جابر نحبه من صفات تباريه=جابر بدم الشعب والشعب ذاته
جابر نحبه حب ما هوب تمويه=جابر نحبه حب من طيباته
جابر امير قلوبنا حيل نغليه=ولا فيه بين الناس شخص بغلاته
يبقى الوفا فينا لسامي معانيه=لو غاب جابر ما نسينا سواته
ادعوك يا رحمن يارب تجزيه=جنات عدن ورحمتك هي نجاته
واسألك يا جبار عبدك تنقيه=ثبت يقينه والهمه بيناته
يا رب يا غفار تقبل حسانيه=يارب بدل سيته بحسناته

[بنت ابيها]

((وحزنا وحزنت كل القلوب.. بكينا وبكت كل الشعوب.. برحيل جابر الخير والعطاء.. برحيل امير الحب والوفاء.. جابر الثرات شيخ المهمات.. كرس حياته لبلاده وشعبه.. وامتلا بقلوب الشعب حبه.. دايم العدل والاحسان دربه..

لقد فقدنا اميرنا ووالدنا وحبيبنا قائد مسيرتنا وراعي نهضتنا صاحب السمو الشيخ جابر الاحمد الجابر الصباح..
نسأل الله العلي القدير ان يتغمد الفقيد بواسع رحمته وان يسكنه فسيح جناته.))
الشاعر:"سعد بن زمانان" مقدم برنامج ديوانية الشعراء في الأذاعة.

المرثيه:

جانا خبر سريع انتشاره=يعلن نبأ مزعج علومه شنيعه
خسارةٍ يا كبرها من خساره=فجيعةٍ للشعب واكبر فجيعه
على الذي يبكيه شعبه ودواره=وعليه يبكون البزور الرضيعه
صدمه وجسمي ابتدى بانهياره=بأول خبر يوم الأحد من مذيعه
تقول ضغطي ابتدى انحداره=والقلب نبضاته تخف وسريعه
ليل الاحد متساوي ٍمع نهاره=كل القلوب بموت جابر وجيعه
اللي حكم داره بحسن الاداره=وسياسته العبقرية فظيعه
امير فعلا ًيستحق الاماره=ساوى ما بين الشعب نهج الشريعه
طوّر بلاده واعتلت بالحضاره=حاكم بعدل ٍما حكم بالخديعه
قاد السفينة بالبحر في شطاره=ولا هاب موجه والحمل يستطيعه
زايد وقار الشعب زايد وقاره=من هيبة الجابر صعد للرفيعه
واجه صعيبات الامور بجداره=يوم إنها ضاقت علينا الوسيعه
عاد البلاد ويزدهر بازدهاره=عقب الدهر مستبشر ٍفي ربيعه
عنده بتصريف الامور اقتداره=من حكمة إله كل صعب ٍيطيعه
جابر رحل لاشك فعله مناره=يوضي على شعبه وطيّب لميعه
العالم باسره كبار وصغاره=عم الحزن بقلوب شعبه جميعه
مواقفه طابت وطابت اذكاره=مآثر ٍللشيخ جابر بديعه
ذكراه تبقى خالده مع مساره=عن السلف عسى الخلف في تبيعه
الشعب بفراقه تزايد إعباره=كل القلوب ابموت جابر وجيعه

[بنت ابيها]

وهذي المرثيه للشاعر: "خالد المنشرح العجمي"

لا والله فاضت الدمع عيني=هلّت عبايرها من اللي فجعها
جريت ونـّه ثم تزايد ونيني=ونـّة خفوقي يرتعب من سمعها
اجاذب الونات واصفق يديني=الحزن جن بسرة فؤادي قطعها
ابكي من الدنيا واعاتب سنيني=دنيا دنيه خاسرن من تبعها
يومن فقدنا الشيخ ذرب اليميني=ماعاد نرجى خيرها من سنعها
أنا أشهد ان الوقت قاسي وشيني=كم من مصيبة للنشاما دفعها
نيشن على جابر ذرا الملتجيني=اللي بنى دار الكويت ورفعها
عون الأرامل والكهل والجنيني=نفسه عن دروب المعاصي ردعها
ريف الضعيف وبسمة الحايريني=كم دولةٍ متشتتة هو جمعها
زبن الدخيل ولطمة العايليني=ذرب الفعايل دبرته ما صنعها
جابر الأحمد ناطح الضالميني=خمس الفرايض للمنادي ركعها
راح وترك شعب الكويت الحزيني=كم دمعةٍ لفراق جابر دمعها
يقول جار الحض بينه وبيني=حزنه تثبت بالعروق وشلعها
خلاّ بلدنا حيرة الحاسديني=الديره اللي بالجواهر رصعها
ما فارق العينين في كل حيني=له صورةٍ بعيون شعبه طبعها
الدايم الله والبشر راحليني=الموت حق وكم نفس خدعها
هاذي الحياة وكلنا صابريني=الكل منا ذاقها ثم بلعها
يا الله عساه بجنة الخالديني=يمشي على ريضانها ويرتبعها
وشيوخنا يا جعلهم سالميني=يكفيهم اشرار العباد وطمعها
معذور من باح الحزن والكنيني=يشكي من جروح الزمان ووجعها

[بنت ابيها]

وهذي المرثية للشاعر "محمد عبيد العجمي"...

اختفت شمس المحبه وصارت الديره كئيبه=من الشمال ليا جنوبه ألبست حزن وكآبه
ول يا صبح ٍطعنا... في أمير ٍنلتجي به=كل فرد بمجتمعنا يونس أن السهم صابه
نعرف ان الموت حق ٍ،بس من يرخص حبيبه=دام هو ستر الكويت ليا عوتْ سحم الذيابه
آه لو الموت خصمٍ.. كان طوّعنا صعيبه=لابتك يا عز داره... لابةٍ يا ويّ لابه
كان ما فاتت أفعالٍ.. ما بقي شئ ٍ نجيبه=حنا شعب ٍدون رمزه.. الرجل يرهن شبابه
آه لو الموت يشرى.. كان سوقه نعتلي به=ما أحدٍ يقرب لسوقه لا يبيع.. ولا شرابه
وش نذكـّر.. وش نعدّد.. ضيّع الحسبه حسيبه=بشت مع بشت يتشابه، والأوادم ما تشابه
عمبر رجال السياسة.. كاده.. ومسكه.. وطيبه=تعجز البيض وتحسَّر ما أنجبن مثله أمشابه
قرم،جزلات المراجل لانتهت،به تبتدي به=لا تحدّث يسلب الألباب في رد الاجابه
أنحنت جل المراجل لسيدي قدر ٍوهيبه=فيه الدين،وفيه جود،وفيه وصل، وبه صلابه
من مثل جابر بعدله.. لا بحمله.. لا بطيبه=والله أنّا لو ندّون ينتهي حبر الكتابه
من مثل جابر لرملا أوّ عودٍ في مشيبه=كافل ٍلأجيال شعبه في حضوره وبغيابه
من مثل جابر ليا ضاقت علينا نقتدي به=لا أختلف راي ٍوراي ٍأحسمه حضرة جنابه
من مثل جابر أمير ٍللقلوب المستصيبه=جابر ٍعثرات شعبه يوم سو الشر صابه
من مثل جابر تبسّم في ليالينا العصيبه=يضحك حجاجه لشعبه.. وبالخفا يكتم صوابه
من مثل جابر رهن عمره لجل شعبه ضريبه=واحتمل صكّات بقعا،لين طهّر له ترابه
من مثل جابر لشعبه، يوم ديرتنا سليبه=عز شعبه ما نقصهم لو كبر راس الذبابه
ومن مثل جابر ان حلت في بلد مسلم امصيبه=تلقى جابر هو الأول من يعنيّ له اركابه
ومن مثل جابر جمعها بكل لهجاتٍ غريبه=وحّد العالم بصفه لين جاب الحق جابه
ومن مثل جابر جعل أعلى المنابر تحتفي به=مجلس الامن وحضوره وقفّ إجلال ومهابه

[سعود الخويطري]

فكرة رائعه جدا



الله يعطيك العافية وجزاك الله خير




والمرثيات تعبير عن وفانا للشيخ جابر




وياليت نرى الكثير من المرثيات في هذا المتصفح



تقبلي سلامي

الخويطري

[بنت ابيها]

الله يعافيك أخي:
سعود الخويطري
وجزاك الله خير على مرورك الطيب...

[ابومحمد الشامري]

لا هنتي يا بنت ابيها على المرثيات الجزلة في ابو مبارك ابو الجميع الله يرحمه ويسكنه الجنه ما قصرتي يا السنافيه على الجهد المميز.

[خالد المحفوظي]

صح لسانش يا بنت ابيها على الجهد الرائع والله يرحم ابو مبارك ويسكنه الجنه

[كويتي عجمي]

بنت ابيها تسلم يدج يالغاليه على هذي المرثيات الجميله في ابونا جابر الخير
رحمه الله وسكنه جنات النعيم

وصح لسان شعارها