((للــشــعــر رأي آخــر..))

[خلاوي الشمالي]

بدونها .. شي طبيعي دمعتي ، سالت
. . . . . . وبقربها .. كل حزن يمر / مو لايق ، !

يروح كل الحزن ، لاضقت ثم قالت
. . . . . . وشلون أغمّض عيوني وأنت متضايق ؟ !

[خلاوي الشمالي]

ياللي تبضـع مـن جروحـي وتتسـوٌق
انصت لبيتي هذا .. وخلك معي رايق !!

مابيك تضحك معي .. لاشفتني مـروٌق
ابيك تبكي معـي .. لاشفتنـي ضايـق

[خلاوي الشمالي]

هنا بين الزهور .. و غيمة الود .. و سنا شمسك
.......هنا .. كانت مواعيد الغرام العذب بآخرها


هنا .. كان المكان يعطرّه روح و شذى همسك
........هنا .. كل الحروف بطلّتك يبست حناجرها


هنا .. أجمل ورود العشق , قالت : يا غلاي امسك
........نيابة عن مشاعر عاشق عيونك .. و شاعرها


هنا مرّيت .. مير آخر عهد بمْصافحة خمسك
........ضحى صبّت عيونك حرّ دمعك في محاجرها !


تعبت اعيش لحظات العمر .. في ذكريات امسك
..........و تعبت اعدّ نجمات المسا الموحش .. و اسامرها


و على كثر الظروف القاسيات .. اللي تبي طمسك
........تحاصرني ملامح وجهك البدري .. و احاصرها !


متى تعشب شرايين الخفوق بهمسك .. و لمسك ؟!
......و تعيش اوّل مواعيد الوصل .. و تموت آخرها

[خلاوي الشمالي]

قال : غابوا الأحبه ! .. قلـت تعـودوا
قال : مليت منهم ؟ .. قلـت : ماملهـم

قال لي ,, ( راحوا أحبابك ) ولا عودوا
قلت ,, ( راح ) اللي أغلى منهم كلهـم

[خلاوي الشمالي]

أيـا ذلولي دَرْهِمِيْ ضاقت علي كل الحلول
يمكن الحظ إنـعـثر ! يمكن ليالينا قـسـن !

يمكن صفت دنيا الجفا ضاقت على راع الرحول
أو يمكن احلام الخيال بـ شاطي الواقع رسن

وكل شـي يمـكن يصـير وش عاد تبغاني اقول
الاسئله صارت كثير .. طوّل مداهن و ايئسن

احــلا الليـالـي انتهــت ولا لها عـمـرٍ يـطـول
عانقن درب الجفى و من طبعه القاسي قسن

الليل قصة غربتي واصبحت من شـوفـه مـلـول
و اليا ابتهج ليل الشقا / نجوم ليلي ما نعسـّن

يا مـا دمـحـت من الـخطا ولا حـسبـت انها تطول
عروق قلبي يـ الغضي من فعلك القاسي ايبسن

عـيش الغرور اللي تبي ..عانق سحاب اللي تطول
ماني على ما انـتَ تبي / طبع بدوي سيف و رسن

هذا الذي عاش بـ خفاي يا صاحي الرمش الكسول
اهل الـطـّنا و ريح النفل والي على الموت اكتسن

و اهل النفوس الغاليه و شوف الذود واهل الاصول
بيوت الشعر و اهل الكرم و صفرٍ على النار اجلسن

وهـرج النشـامـى و الـنـقا و الـعـز و أخـبار السيول
بـدوي و ابـقى بـدوي ..عـلـم الـردى مـا دنـّسـنْ

ما اوطـّي نفسي لـ بشر / نفسي عزيزه يـ الخجول
لـو حـامت نسورك على شيهانة القلب ! أفـلـسـن

و لـو انك حيـاتـي كـلـها .. مـا عـاد لك عندي قبول
حتى خيالك مـ اذكره , و لو تنشد عيوني .. نِسـن

ابـي أقـول آخـر كـلام / ثم دَرْهِمي يا أغلى ذلول
( خسارة ايامي معك ! لو هن على عمري انكسن )

[مترك العمره]

الاخ العزيز/ خلاوي الشمالي

تسلم على هذه الصفحةة الرائعه التي تميزت بإبدعاتك من ابيات الشعر لما فيها من الجزالة وشتى اللوان الشعر

متابعتي وشكري وتقديري

[برستيج]

ابداعات راقيه

لا هنت يالمبدع

[خلاوي الشمالي]

وش عاد لو حنا خسرنا بطوله
... تفداك يالاصفر جميع البطولات

فرحتنا في كم جوله وجوله
... وخسارتك هذي تراها سهالات

حنا نحبك حب محدٍ يطوله
... ونساندك ولو خسرة المبارات

انت الملك واللي حواليك دوله
... تأمر وتنهي في جميع الوزارات

لك الولاء واجب علينا نقوله
... ونطبقه بافعال وشهود واثبات

القادسيه شاهدتله فعوله
... غصبٍ على كتاب بعض المقالات

اكثر جماهير الخليج اشهدوله
... وعشاقه بكل الدول والولايات

وانا من ايام الصغر والطفوله
... بنيتله في وسط قلبي عمارات

وارجع واقول اللي بديته واقوله
... واحطها بقوسين واربع علامات

((وش عاد لو حنا خسرنا بطوله))
... ((تفداك يالاصفر جميع البطولات))

[خلاوي الشمالي]

المشاركة الأصلية كتبت بواسطة مترك العمره

الاخ العزيز/ خلاوي الشمالي

تسلم على هذه الصفحةة الرائعه التي تميزت بإبدعاتك من ابيات الشعر لما فيها من الجزالة وشتى اللوان الشعر

متابعتي وشكري وتقديري

الله يسلمك

الابداع هو مرورك هنا

يشرفني تواجدك

[خلاوي الشمالي]

المشاركة الأصلية كتبت بواسطة برستيج

ابداعات راقيه

لا هنت يالمبدع

تسلم