(((( قصيدة شروط الزواج والعم الجشع ))) ارجو ان تعجبكم

[نسل الأحرار]

شاب فقير خطب بنت عمه المليونير

وزود عمه طلباته عليه فقال قصيده يوصف ما جرى بينه وبين عمه الجشع
************************************************** ***************************
سبحان من يرزق بتوع الملاييـن

الرازق اللي ما يخيب الرجـا بـه-

لي عم عنده معـرضٍ للصواليـن

أموت واعرف بس من وين جابـه -

وإذا سألته قـال بعـت الدكاكيـن

ما يدري إني ما هضمت الإجابـه -

الشاهد إني رحت له قبـل يوميـن

في قصره العامـر ودقيـت بابـه -

قال ارحب ارحب عدّ ورد البساتين

يا مرحبا باللـي لفـا يـا هلابـه -



قلت البقا عـدّ النفـل والرياحيـن

يا شيخ شمل اهل الكرم والذرابـه-

قال اسلم الله يحفظك لي من العين

وآمر أوامر حضرتـك مستجابـه -

قلت الصراحة طالبٍ قرب غاليـن



ودي تزوجنـي كريمتـك يـابـه-

ثنّى وقال اهليـن والله وسهليـن

والكون ترخص لجل عينك رقابـه -

لكن ترا عندي شـروط وقوانيـن

قلت اشرط اشرط يا حبيب الغلابـه -



قال أولاً مهر العروسـة ثمانيـن

غير الرسوم وغير حق العصابـه -

والثانية عمك يبي منـك سبعيـن

رسم الأبـوّة والنسـب والقرابـه-

وام العروسة حقها منـك ستيـن

عشانها ست الحسـن والمهابـه -



واخوانها كلن يبي منـك خمسيـن

عداً ونقـداً تنـدرج فـي حسابـه-

وخواتها الخمس اعطهن من ثلاثين

عشان تتوثـق عـروق النسابـه -

وتجيب طقم عيار واحد وعشريـن



وخاتم من الماس المصفى ترابـه-

واكياس متروسة كعوب وفساتيـن

ألوانهـا واشكالهـا مـا تشابـه -

وموتر بسواقـه وفيـلا بدوريـن

أثاثهـا مـن بطرتـه ينحكـابـه -

واحجز لنا قاعة بقصر السلاطيـن

واحجز بهـا رقاصتيـن وربابـه -

وامنع دخول اهل اللحى والبزارين

واعزم أميـر المنطقـة بالنيابـه -

هذي الشروط اللي على بالي الحين

وذكرني اللي ما حسبنـا حسابـه -

قلت اذكر الله يا عـدو المساكيـن

واستغفـره لا يبتلـيـك بعـذابـه -

الظاهر إنك منت عارف أنا ميـن

أنا لو ارقا فـوق متـن السحابـه -

ما جبت حتى نص درزن مواعيـن

واضحك بكيفك واعتبرهـا دعابـه-

شروطكم هذي شـروط المجانيـن

شروطكم شغـل ابتـزاز ونهابـه -

شروطكم تقصم ظهـور البعاريـن

شروطكـم همّـن وغـم وكآبـه -

شروطكم والله سيوف وسكاكيـن

تذبح بنات المجتمع مـع شبابـه -

وين الرضا والعطف واليسر واللين

اللي ذكرهـا الله بمحكـم كتابـه-

وين الصفات اللي أمرنا بها الديـن

وين اختفى نهج النبي والصحابـه -

يا عم جعل اللي خلقنا من الطيـن

يرد عقلك مـن خطـاه لصوابـه -

ويجعل نصيبي عند غيرك قل آمين

ويحسن عزا الصابر ويجزل ثوابه -

قال انت لو فكرت تفكير صاحيـن

ما شفت في مجمل شروطي غرابه -

حنا بعصـر العولمـة والمزاييـن

ماهوب عصر الفلسفة والخطابـه -

الناس تسعى للرتـب والنياشيـن

وانت اهتمامك بالشعـر والكتابـه-

والشعر ما ينفعك لو هو دواويـن

ما دام جيبك مثـل بيـت الخرابـه -

يا بوك لا تسمع كلام المصاخيـن

واسأل مجرب عاش في وسط غابه -

قلت الله اكبر يا محـرر فلسطيـن

من يسمعك يحسبك ذيـب الذيابـه-

تراك شايب راس مالـك رياليـن

والبنت ما تسوى جنـاح الذبابـه -

قال انقلع مالت على وجهك الشين

لا عاد اشوفـك عندنـا يالزلابـه -

قلت ابشر ابشر لكن الباب من وين

واقفيت من عنده على صوت بابـه-

ارجو انها عجبتكم القصيده لك لا تبخلو علي بالرود

[ِِِAL 3ajmiah]

ذا بيتزوج العائلة كلها مو بس بنت عمه ..

هذي شحاذه مب مهر هههههه وقسم مدري على كثر مانسمع عن هالحكي هو صدق يسوونه ولا لا ..

تسلم أخوي ع القصيدة المضحكة والمحزنه بنفس الوقت

يعطيك العافية ~

[ليــه يازمـــن]

قال أولاً مهر العروسـة ثمانيـن

غير الرسوم وغير حق العصابـه -

والثانية عمك يبي منـك سبعيـن

رسم الأبـوّة والنسـب والقرابـه-

وام العروسة حقها منـك ستيـن

عشانها ست الحسـن والمهابـه -


هههههههههههه

شــروط تعــجيــزيه

لاهنت على النقل

الله يعطيك العافيه

[وافي بن وافي]

عزالله تستحق الاعجاب تناول طريف لموضوع مهم بقصيده سلسه ..نسل الاحرار.. صح لسان الشاعر.. وسلمت يداك على هذا النقل الممتع تقبل تحياتي وتقديري

[نسل الأحرار]

شكرا للجميع على المرور