((القدس))
ياإلهي وش بقى فينا يشرف ياإلهي ** لا انتصار ولا اعتبار ولا شموخ ولاكرامه
اتباعيه وذُل وقل جهد وعذر واهــي ** وانكســارٍ ماعرفنا وش حلاله من حرامه
الحقائق والدلائل في زمان الذل هاهي ** واضحه وضوح شمسٍ ماتغشتها غمامه
وين صنّاع القرار اهل الأوامر والنواهي ** وش عذر قادات الامه والمناصب والزعامه
بعد ماكنّا الأسود اللي بحاضرها تباهي ** كيف صرنا بالحقيقه مثل سالفت النعامه
الخطر يحيط فينا والعقل بالغي لاهي ** والله إنا نستحقك يالعقوبه والملامه
يومنا نومٍ طويلٍ مابه الا الحلم راهي ** وإن حلمنا ماحلمنا بالفرح والابتسامه
وإن بدأ الليل ابتدينا بالملاهي والمقاهي ** ضحك ومزوح وسوالف نسأل الله السلامه
والقنوات الفضيعه تعرض انواع المشاهي ** رقص في رقص وتسابق للسفور والوسامه
من دعايه في مسلسل في اغنيه في لبس زاهي ** واهتمامٍ بالمظاهر والمراكب والإقامه
كيف حتى اعلامنا اصبح في طروحاته يضاهي ** النصارى واليهود وقلّ بالدين اهتمامه
والغريب اللي خذاني فعلاً وشد انتباهي ** التبلّد في قضيتنا الأساسيه علامه
جيت اذكر كل غافي بالمنام وكل ساهي ** مايرجِّع مجد الامه غصن زيتون وحمامه
شوفوا اسرائيل تفتك بالبلاد ام الدواهي ** مالقت فينا رجال ولاجيوووش ولاصررامه
اسرفت فينا وصرنا للمقاصل والمطاهي ** واطلقت شارون فينا والجحش صرنا طعامه
وكل ماشفت القهر والذل يممت اتجاهي ** يمّة أولى القبلتين وقلت قومي ياقيامه
ماتت النخوه وماتت كل بسمه في شفاهي ** ياعرب وين العروبه والحميه والشهامه
ياإلهي جيتك ادعو ياإلهي وانت جاهي ** يرجع القدس السليب وتنجلي عنّا الغمامه
الشاعر :- محمد بن عبدالله الجلبان
تقبلوا تحياتي,,
أخوكم فهد